Entawn rawngbawlna sim a hun !

Kan hriat ţheuh angin Baptist kohhran lamin ŢKP lama over tawh, chawlhni chawhnu lama tih tur nei lo val senior leh paho rual inpawl khawmna turin Baptist Mipa Pawl (BMP) Fellowship a din ta a.

A hnu deuhah Presbyterian of India lamin heng mite inpawl khawmna tur bawkin Pavalai a rawn din chho ve leh ta a. Chutih rualin nuho inpawl khawmna BKHP Baptist kohhranin a neih laiin Presbyterian lamin Kohhran Hmeichhia an nei ve leh a.

Tichuan, hmalakna neiin kum tin rorelna kaltlangin budget an han duang ta rup mai a. Mahse, kawng dang vaka rawngbawl dan tur hre ta lo chu rawngbawlna chuangtlai tih tur buaipui reng rengin hun an hmang ta hi kan ngaihtuah tawh ngai em?

Ţhalai rual tih dan entawnin kan nu leh pate'n music video siam an uar lai hunte kha a va la rei lo em. Zaipawl neih ve kha tihmakmawhah ngaiin mawi leh mawi lo pawh dawn zo lovin zan rei tak tak thleng hla zirin in an han chhuahsan ta a.

Hla an zirna kawnga tha an senral zozai ngaihtuahin an zaiin thiltihtheihna a neih lem si lohzia han thlir hian buaipui tur dik buaipui ni hian an lang tlat lo. Chu tah, paho rualin ţhalaite tih entawn niawm takin Chanchinbu an han buatsaih ve leh ta ngawt a.

Mahni Unit mai duhtawk lovin Bial Huap an la ti ang deuh deuh a. Ţhalai fellowship nena danglamna nei hauh lovin chawhnu inkhawm leh zan inkhawm, an pual bik hun an nei leh tawp a. Heng an thiltih leh hmalakna zawng zawngte hi kan sawisel a ni lo.

Mahse, nu leh pa an ni tih inhre lo ang maia rawngbawlna an kalpui erawh hi chu inenlet se a ţha ngawt ang. Âw-in vanglai a pelh tawh hnuah Zaipawl rawngbawlna neih lo tum ve tlatte hi a ţul viau nge hun khawhralna mai mai?

Music video siamte phei hi chu eng rawngbawlna huangah chiah nge an khung ang tih ka hrethiam phak tawh lo. Zanah rei tak tak chhuaha hla zir rual pawh an ni tawh bawk hek lo. Mahse, ţangkai taka rawng bawlna an kalpuite erawh a pawimawh tawp thung.

Ruihhlo ngai enkawl kawngah leh fahrah chhawmdawl kawngahte hian an chhuanawmin Setana thik tham rawngbawlna an kalpui niin a lang a. Chu tih reng laiin Kristian chhûngkaw dina kalpui kawngah erawh Zoram pumpui thlirin an hlawhchham si a ang hle.

Chu chuan ngaihtuah tur a rawn hrin chu hei hi a ni. Nu leh pa tam tak, kohhran kaltlanga rawng bawlna kawnga an hmanhlel reng laia fa nikhualo leh chhûngkaw buai an pung thur thur nia lang si hi eng vang nge ni ta ang?

Zoram Kristian chhûngkaw damloh chhan hi pawl pathum, ţhalai, nu leh pa pawlte hian kan hriat a hun ta. Rawng ka bawl kan tih mek lai leh kan buai em em lai hian chung lam nena inzawmna (connection) nei kan tam takzet zet a.

Za-a 90 chuang hian nitin hun fel tak bithliaha bible chhiarna leh zirna an nei ngai lo niin a lang a. Heti zat vel bawk hian fianrial hun an nei ngai lo bawk niin a lang. Kan nunah ei tur a awm loh danah leh Pathian thu leh hla aia khawvel thu leh hla kan ngaihven zawkziate hi zep chi niin a lang lo.

Hei hi Zoram kristiante ţhanlen theih loh chhan bulpui ber pawh niin a lang. Pathian nena lêng dun hman reng reng lo, Amah nena inpawlna hun pawh nei mumal thei lo khawpa rawngbawlna kawnga buai inti Zoram kristiante hian mahni leh Pathian inkâr chingfel hmasa zet a, chumi hnua mahni leh pawl inkâr dah pawimawh kan thiam hunah chauh nungin rawng kan bawl ang a, kan nunah ringlote'n ei tur an hmu thei chauh ngei ang le.