Ka damloh nikhua reng a sei ta e !

Kâr hmasa thawhţan zan khan puar taka zanriah eiin tlai lutuk lovah mutmu ka tuah kha a ni a, mihring hian a hma lam hun a hriat lawk lohzia hi!

Zing lam dar 1 pelh hnu hretin ka harh hlawl a. Kha khua alo sik nasa mai hi a lo nia! Thei leh thei lovin inthiarna pindan ka va thleng chu ka kua hian mi nghak hman meuh lo, a khawh liam nghal pur pur bawk.

Eng pawh eiin lem mah ila, ka pum an thlen rual chiahin amahni ngainatna reng nei lo pum chhûng roreltu chuan kâ lamah luak hmangin taksa ata paih chhuahin an awm nghal zel a.

Chaw a ni emaw thil tuiril lam pawh ni se, keimahah hriselna thlen tur khawpa chambang rei thei an awm ta hlek lo mai. Tichuan, thisen chaw tal tiin drip khai kan tum a, thisenzam alawi ka lo nei lo chu ka pain min chiu duk thluah ta zawk a!

A tawpah Casualty lamah kalin venflon kan han vuahtir ta a. In kan thlen hnu chuan chawlh awm hlek lovin drip kan khai chhunzawm ta mawlh mawlh mai a ni. Luak dannain min han chiu ta bawk nen hmasawn bak tih tur nei tawh lovah ka inngai ta a.

Inrinnni a lo thlen phei chuan ka kâ chhah tup mai kha tlema phelh zawiin awm mah se, chaw erawh ka ei thei ngang lo! Buhhawp leh cornflake erawh ka ei ve bawrh thei ta mial a.

Pathian ni chuan mitthi kan neih avangin imkhawm ţhulh a ni a. Kâr khat la damloh chhûngin ţhalai pahnih an boral hman nia! Tlai lamah chuan ka natna tizual thar tur leh ka mental vaw tliak hnawp thei thil ka nauin pawi a khawih chuan a hma zawng aiin mi vaw chau leh ta tlat mai a.

Ka mut a suakbak a, ka mumal lo hle. Ka ngaihtuahna a chi chawm nuai a, ka lû a hai bur reng ta mai a nih hi. Nu leh pate lakah inthlahrun a nâ duhin khuma mut zawi reng ringawt mai chu a zahthlak ta a nih hi.

Ţawngţai dan tur ka hre lovin Pathian laka beiseina neih chin dan tur pawh ka bithliah thiam bawk hek lo. Ni khata damdawi mum ka hmawm tam lutuk leh atui lam chi ka in tam ngai lutukte hi ka hne ngawih ngawih.

Mahse, Pathianin he zirlai min pêk hi ka zirchhuak ngei tur a ni tiin chak lo chungin ka ke ka pen ţauh ţauh a. Tlang chhip chu ka hmuh phak loha a awm ka remti ta lo.

1 Peter 4:17 Rorelna chu Pathian chhûngteah hian ţan a hun tawh si a; tin, keimahni maha a ţan hmasak chuan Pathian Chanchin Ţha thu zawm lote tawpna chu engtin tak ni ang maw?