Tum loh ang tak natnain min chenchilh ta !

Tahrik ni 29, Oct thla khan ka damsam loh thu post siamin tahrik ni 22 zan aţanga luak nen, mawng lam fel lo bakah pumpui titau ang ri bawrh bawrh reng thawm nen kâr khat chuang hun ka hmang ta a.

Paulate angin thil engkim ka tân ei a thiang a tik tlukin engkim ka kâ-in duh mah se, pum lamin thlawp hek suh; engpawh ei ila, chaw dangral ang maiin pumin mawng aţangin a paih chhuak nghal zel a!

Ka kam chhûngte lah nula senior, duh loh rai an sawi ang maiin a ţeu hlar a, ka âng phak chuap reng mai si. Rilţam em em mah ila, pumpui châkna leh leili hriatna chhe tê mahin an inmil lawi si lo.

Tih theih vak awm ta lo chu Venflon vuahin Drip (RL&Glucose) kan khai chhunzawm mawlh mawlh nangin ka taksa erawh a rãwp chak hle tho mai. Ka muhil ni ngeia ka inhriat laite hian ka bula mi awm nia ka hriatte chu ka be mawlh mawlh ţhin a.

A chang leh sapţawng hmangin mi ka bia a, ka be zo chiah tih hian ka harh nghal vei ţhin nen ka chhûngte phei chuan, 'A zãwl a be leh ta' min ti ta mai mai nia! Tlai lamah bazaar lam thil leia ka inhriatte kha zan ka han ţhangharhin ei kan tum ta ţhin a.

Ka dahna nia ka hriat hai vak vakin a tawpah ka mumang mai a ni tih ka hre hnuhnawh fo! Ka pum ţha lo chuan ka kâ chhûngah hlet chhuahin ka lei a rawn bawlin a nâ ta a. Chu chuan thil sakhat ei a ti har ta em em ţhin a ni.

A tawpah eng ka an theih tak lovah chuan takrik ni 2, Nov khan Dr Dawnga Polyclinic lamah kalin thisen test leh Endoscopy kan han ti ta a. Ka natna chu hai rual a ni ta lo. Ka hlauh loh ang ngeiin HIV chu ka negative (-) a.

Mahse, result dangah erawh filhlim lohna neuh neuh ka ngah mai a. Uluk taka nitin khêl lo va a thla tel tehmeuh inenkawl ka mamawh ta a. Fimkhur takin damdawi min chawhte ka han ei ta chu! Lehlamah hlet a chhuah nasa ta mai a!

Ni hnih khat lek hnuah ka nerve a chhuak nasa leh ta si. Kal pawh ka kal ţha thei lo va, ţhut leh mut ringawt pawh harsa tih chang a tam ta mai a. Ka la tawn ngai loh natna chi hrang hrang nen kan han inhmachhawn ta chu thiam a har zet mai!

Hei hi ka lo hre ta a ni. Mihring kan lo seilian a, tawnhriat hrang hrang nei chhovin hringnun sual dan kawng hrang hrang kawhhmuhin kan awm ţhin. Chu huna pawimawh ta bera chu chutiang lo dawngsawngtu thinlung puthmang hi a lo ni e.

Pathian zarah kan dam anga hlim leh lawm takin kan la inkawm tlang leh dial dial ngei ang. Mahse, kum upat tawh lama enkawltu samsei neih loh zet chu a mak a nâ ngei a lo ni e 😂