Tahrik ni 15, Sahmulphah thla tlai lam taka Kristian Hospital (Serkawn Hospital ni lovin) lama kan han in admit zet kha chu pui tak a ni.
A kal khan kal thei chai hek lo le, nurse chhe lo ve tak mai khan nawrlirhna (wheelchair) khan min lo hmuak ran mai kha a nia. A mi nawrna kut kha a no teh e!
Tlangval ve ta fam tân chuan han intih pachan luih ngial tum mah ila, ka tum nasat poh leh ka hlawhchham a zual a ni ber e. OPD lamah min han endik zung zunga, ECG leh X-ray ti turin min han khalh kual vel ta a.
Ka hriatna thazam (nerve) nasa lutuk vang khan din pawh ka ding ţha thei lo, nurse kuah hnap chung zel khan chhui ngai (test) chu ka'n paltlang ta hram hlawm a. Heng titute hi nula vek an ni kher erawh hmai a uang mawh ngei mai!
Tichuan, ka awmna tur hmun, LP Thangzika Cabin 4A lamah min nawr chho ta a. Kan nula-i khan chho zawngin mi han nawr kal zo lo nghal phawt a!
Tlawmngai rual an lo awm hlauh a, an zarah himdam pialin ka Cabin chu ka lut ve ta rawih a nih kha. A hnu darkar chanve velah chuan pindan aţangin tiang pawh hawl lo khan mahniin ka tei kual leh sek thei si, an thin a rim teh e!
Ka nat dan kha mak miau hek, ka khurh laklawh tawh chuan tihngaihna reng a awm lo. A chhuah loh erawh thung chuan ka tlan ziai ziai lo chauh thei thung si kha hriatthiam har tak a ni reng a ni.
Mahni chauha ka han awm fal hnu chuan ka inrem fel e, ka tia lawm maw le. Kun hniam ngai piahah ţhu hniam chunga ka han inrem fel kha ka tho thei ta awzawng lo mai a!
Patling ţhankin meuh tawh kha puitu ngaiin Bethlehem daia vantirhkoh zai aia zawi bik lo turin ka au ta ruah ruah mai a. Thawktute'n min han pawm tho pawsi nalh lohzia mawlh mai kha!
Pindana awm hle hle thei ta lo chu tiang nen kawngkharpui (gate) lamah ka chhuk sek mai a. A nawra nawr ngai tâna an siam zawl lama kal ta mai lo chuan intithei fahranin step ka han rap thaih mai chu!
Ka tiang, ka kut leh kein min zo awzawng lo chu niin! Nurse zirlai bang haw runpui lai takin putarte ang mai hian muang fan raihin kan tlusawp ta niaih a nih kha! Thla neiha thlawh bo vang vang kha châkawm tak a ni!
Bual in lama ka tho mai thei lo lam chu sawi ta lo mai ila. Zan khat chu zan reiah ka tui a hal ta a. Chhuar lam panin ka han indap, tui bottle chhin lo nghet lo, kei lah nghet bik bawk si lo chhuata tlusawp nuaih pahin tui chuan mi leih huh ta vek mai a!
Chhuatah ka thal chiau pur nurse ka va auin min han hmu zet kha chu insum har a ti teh e. Nurse puihna vekin thawmhnaw ka la hahthlak zui! Ka zak ve ţep nia maw le.
Min enkawltute khan mawng lam san pe thei tur khan mi kha an han duhsak em em khawp a. I inthiar tawh em, i ek a uih nge rim a nei lo, i zung tur tur nge i zung feih feih tih kha darkar bi danah min zawt a ni hawt e!
Damdawi ei hun kha an buaithlak leh mai mai pek khawp a! Zing dar 5 rik hmain chiu ngei ngei ka ngaih bakah BP endik a ngai zing tin a. La tho hman ngai hek lo, mangphan ruai hian kan intlingtla a ni nitin e.
Nurse pakhat erawh kha chuan min enkawl reng se ka tihzia kha aw. 'U Rem...' min tih hnap tawh kha chuan damlo nih intheihnghilha zanriah eipuia sawm mai kha ka nap ta ţhin!
Falkawn lamah Viral Count lam ti turin keimahin ka kal leh pek a. Lirthei khalh mai kha chu ka harsat lo. Ka mau thiang kha lirtheiah dahin tlangval taka step lawn tum kha ka nia.
Vawi hnih ka pen hman tihin ka'n tlusawp leh ta niaih mai a nih kha! Ka tho mai thei lo, ka kut lah a pilh pheng phung bawk si. Vai nupa chhangchhe tak, fa pakhat ve ve pawm hian min rawn hmu ta a.
An nu hnenah a fapa chu pe leh chhawngin min han kaitho leh rih ta dah a! Ka tiang kha keng hle hle ila a ţha mai tur! Hei lo pawh sawi tur a la tam mai ka ti.
Zan mut reh ţhep ţhawp lai taka sapţawnga han ţawngvaih tlat mai te, Cabin khâwk rum rum khawpa sermon pate thlak zan bakah chetchhiatna dang dang ka va han ngah bik tak zozai em!
I duhtawk em em tawh teh ang, tunah pawh ka pilh leh phung tawh hi 😂
No comments:
Post a Comment