Ka pa nen zanriah kan kil rual thei lo !

Sikul ka ban meuh chuan; chawhnu khaw sä tak hnuaiah darkar chanve dawn lirthei khalh ka ni bawk a, ka chau kher mai!

Kan in ka han thleng ta, thlanmual ang mai hian a lo reh ţhiap a! Ngaihtuahna tam tak insual kârah kawngka chu ka hawng ta riai riai a.

Thil tawh phawtte chu an awmna ngai vekah rinawm takin an lo awm ţhap a. Tukverh ka han hawng chu khawthlang aţangin khawharna thlifim rawn thaw heuh heuh chuan timur min siam ta séng séng a.

Muangchang lem lo takin ka thawmhnaw phelhin hnathawh thawmhnaw nen eirawng ka bawl zui ta nghal a. Tu nu mah cho loh ka nei bik lo tia ka lo inrintawkna; dal chu hmel mawi thei ang berin ka kang ta a ni.

Lakher anthur ka tlak pah a. Hmun ka han hawl pah zung zung bawk. Bathlar leh in chung lama pangpâr leh thlaite chu an tui a hal tawh ka rin avangin duat takin an kham hnâp khawp tui ka pe ta hlawm a.

Chu lai hmun vela ka nu sulhnu hnutchhiah, a hnathawhna hmanrua eng ilo let rem rumte chu ka thlek zuai zuai a. Dam taka Tripura an thlen ngei beiseiin in lamah ka chhuk leh ta a.

Ruahpuivanawn a sur laia vanin ren hauh lo va tui a sah lai tluk zetin ka taksa pumpui chu thlanfim leh thlanpuite'n an bual huh zawh vek tawh avangin bual in lam panin ka inbual ta chu favang tlai nêma thlifimin min chhem dai sáwng sáwng mai zu nia!

Chaw chhum bak engkim ka peih fel ta a. Heti taka buai si hian kei leh ka pa bak ina awm kan awm hauh si lo! Ka pa hnen aţangin biakhlatna a lo kal a, pen kualna tur a lo nei zui leh nghal a!

Dar 5 chanchin thar thlir pahin mei thuk nâ lo taka chhem nungin chaw ka chhum ta a ni. Chanchin thar ka en zawh chuan dawr lamah naktuk result tihchhuah huna naupangte lawmman tur chithlum mum tam tawk leh chocolate thlan bik ka han lei leh te te phawt a.

Tichuan, in ka zuk thlen meuh chuan ka pa pawh a lo uipa ţhut leh vung tawh a! Dar 5:30 a hnai tih ka hmu thut chu innghirnghona chhe tê a lo thleng nghal dawn tih ka man thiam ta nghal a!

Hauruang aţanga in ka thlen hlim khan ka inhnawh puar nghal kha a nia. Ka pa hi tunhma lama an kalphung la vawng nghet em em mi a nih tlat avangin dar 5 a pelh tawh hi chuan a awm hle hle thei tlat tawh ngai lo!

Ka pindana ka awm lai vek chuan thleng nghah ri ka hre ta nghal reng a! Kei lah ka pum lamin vauna awka chhuahin chaw lam hawi lo turin min vau chawpchilh nghal bawk si! Pafa chauh niha zanriah han kil za loh chu dikin ka hre si lo.

Chhuanlam siamin thil pawimawh ka ziah mek thu leh ka la puar thuin ka inpha mar thei ta hram a. Ka pa erawh chaw ei apianga lungawi taka a awm ang bawkin amah chauh pawhin a chaw lak chu a ţha leh kher mai!

Pafa ni si kan khawvel inpersan lutuk kan ni hi a mak a. Kan chhûngte pawh hetiang kan ni tih hre reng chung hian vawi tam min hnutchhiah dun ţhin hi a mak leh zual! Zanin pawh in zau takah inbe mang lovin zan kan ban tlang leh ngei ang le!

Tak a; chhuanlam ka siam, thil ka ziak ka tih kha tuna i thu chhiar mek hi a ni tih hrethiam nghal rawh! Tin, chaw châkna thlarauin ka pum lam a la tlawh miah lo tih ka inpuang nghal law law bawk e!

Thlalak : Kan unauza, kan mo, ka nu leh pa leh an tute.

A hmun : Chanmari, Aizawl.

A hun : Ni 13, Mim Kût Thla, 2019.