A ngaihna reng hre lo kohhran hruaitu kan mamawh !

Kawmiti leh rorel a lo thleng hnai a, hman remchan hunah fianrial tawi tê neiin ro min rêlsak turin Pathian kan au zuai a! Kan han ţawngţai zo ta chu, kan thinlung ngaihtuahnaah kalphung leh rorel dan tur ţha tak tak nia lang a lo lang nghal zut zut tawh ţhin.

 

Rorelin kawmiti kan han nei ta cheng a, rinna avanga thiltih ropui leh Pathian inpuan chhuahna lam hawia ke penna lam kawng reng reng kan zawh leh ngam tak si lohzia hi kohhrana inhmang chin chuan kan hre vekin a rinawm!

 

A ngaihna kan hriain ruahmanna siam hi kan thiam lulai teh a nih hi! Inkhawmpui huaihawt leh mikhual hmuah, ruai buatsaih leh thil engkim mai hi kan zeiin kan hnehsawh em em vek tawh a nih ber hi. A nih leh kan nun hi?

 

Jehosaphata lal lai khan ţum khat chu le, an siak leh ngho lawr tut chungin a maka maka tam, Moaba leh Amona thlah, ţiau vaivut zata tamte kha Israel fate bei turin a siruk lain an rawn thawk chhuak ta a nih kha! An thawmah ringawt pawh Jehosaphata kha a zam chhe der nia!

 

Khati zata tam hmelma beih dan tur lo ruahman ngaihna reng reng hria leh, buaina lo hmachhawn dan tur ngaihtuah chhuak thei pakhatmah an awm ta lo. Van Pathian thiltihtheihna mak mai lo chu innghahna chhan an nei ta lo tih an inhre ta a nih kha.

 

Tichuan, Lal Jehosaphata chu Lalpa hmaah inngaitlawm taka ţhingţhiin Pathian hnenah a ngaihna a han dil ta a nih kha! “ A tih ngaihna reng reng kan hre ta lo, i lam kan lo hawi mai a ni” a han ti kha chu Chungnungbera hian a han lawm mai mai khawp a!

 

Rang lutukin mipui zinga Jahaziela chungah a Thlarau leihin, “Indona chu Pathian indona a ni” a ti chawpchilh ta nghal reng a nih kha. Korinth khuaa mite hnenah, “Mi fing finna chu ka tiboral daih anga, remhre remhriatna pawh ka paihthla ang” tia a lo sawi ang khan!

 

Tun huna a kohhrante zingah hian fing tak tak leh remhre tak taka inngai hi kan tam ta em em mai a. Pathian remruatpuina pawh mamawh tawh lo khawpa intodelh kohhran kan ther ta fük mai a nih hi! Hei hi a ni Thlarau Thianghlim hnathawh daltu, a chet velna tikhawlhkham zotu chu lo ni!

 

Hawh u, Lalpa kohhrante u i inngaihtuah chiang teh ang u. Kan ram damlohnaah hian mawhphurhna lain rinnaa Lalpa vuan tlat chung leh mihring remhriatna hmang tawh lo hian thisen chhuak khawpin sual i bei tawh ang u khai!

 

Nitina thlan khur lama mi an liam zawih zawih tawh hunah hian a kohhrante hi kan ngawi reng dawn em ni? A seh theih apiang seh zawt zawt rengtu hmelmapa, hmun tina a inlâr mek lai hian Lalpa hmaah ţhingţhiin a lam kan hawi mai thei lawm ni?

 

Ka Lalpa hian rawngbawltu atân mi fing leh remhriat a mamawh lo ve. Chuti ni lo se Jeremia kâ hmangin, “Mi fingin a finna chhuang lovin mi chak chuan a chakna chhuang hlek suh se. A chhuang apiangin Lalpa chhuang zawk rawh se” a ti lo tur!

 

Rawngbawlna kawnga finga inngaite leh mi bengvar intite chung chu a pik e, tiin Isaia chuan a lo sawi daih tawh a ni zawk. Tun huna kan ram dinhmunah hian lungawi tak kan awm tawh lo va, kan ram hi nasa takin a damlo mek tih kan hre vek awm e.

 

Lalpa’n kan ram damna dawi min kawhhmuh hi hawh u, i ngaituah tawh zawk ang khai. “Inngaitlawm taka min zawn a, an nuna sual an hawisan chuan an sualte ka lo ngaithla ang a, an ram chu ka tidam leh ang” a tih hi a taka kan nunpui, kan ram dam nân a ngai ta a lo ni e.