𝐏𝐚𝐬𝐭𝐚𝐰𝐫 𝐂𝐡𝐡𝐚𝐰𝐧𝐚 𝐈𝐧𝐥â𝐫𝐧𝐚 𝐥𝐞𝐡 𝐓𝐮𝐧 𝐇𝐮𝐧 𝐏𝐚𝐫𝐭 – 𝐈

           Mi ţhenkhatin inlârna an tuipui êm êm laiin, mi ţhenkhat erawh chuan, Isua kha zawlnei hnuhnung ber a ni, tiin inlârna leh hrilh lawkna hmu nep pawl an awm bawk a. Zawlnei hming kan phuahsak, Pu Saikhuma leh Pastawr Chhawna-te kha ţhenkhat chuan chhuah tuitang lo viau mah ila, an thu hrilh lawk dikzia kan hmu vek lawi a, a tuipui zualte phei chuan an âtchilh titih bawk!

 

            Pu Saikhuma inlârna (thu hrilh lawk) kan tih bawkte hi a thu a tluangin hriat thiam a har lo hle a. Mahse, Pastawr Chhawna inlârna (hrilh lawknate) erawh Isaia leh Ezekiela bu ang maia khirhkhan, Daniela lehkhabu ang maia hrilh fiah awlai lo an ni thung.

 

            Kohhran chungchang a thlûrna hi lo en ta ila. ‘Thlarau hruaina tel lovin tisa felnain an hruai a, kohhranin a pianna thlarau a hloh.  Nitin ţawngţaina an tlachham a, tisa duh zawnga kalna peng ţantir a lo ni. Biak in chhûng pakhatah pawh thu a hrang tam êm êm a, a ţhein hlim an duh a, a ţhenin an duh lo a’ tiin.

 

            He hrilh lawkna huai taka rawn tlangaupuitu chu Sailova kha a ni. Hrilh lawkna hi a hriat ve si se ka ring hauh lo. ‘Kohhran hian enkawl turin mi hausa, mi khawsak ţha leh mi thiam a mamawh lo. Thlarau mi a mamawh zawk!’ tiin a rawn puang a. Eng nge tisa duh zawng chu, kan tih chuan, thlarau bo manna lam hawi ni lo zawnga ke penna hi a ni mai.

 

            Chu nun aţang chuan biak in neih ropui, Sunde sikul inkai ţhatsiak, sap sitail-a changkang deuh deuha Pathian fak leh chawimawina, khawvel thil nena inzawma prawkrem hmanga mi hla ka au etc kan tihna zawng zawngte hi a huap thei awm e. Heng tisa hruaina hnuaia rawngbawlna kan tihte hian sâwtpuina nun tak min thlen ngai lo.

 

            Kohhran khata lawi ni chung si a, thu sawitu duh zawng bik riau kan neihna te, Pathian thu sawitute thu sawia duh bik riau kan neihna te, ţhenkhatin khuang hnih nena lam ringawt an buaipui laia, ţhenkhatin, “Lam ringawt a ni lo” an tihzia han hmuh ţhinte hian, Pastawr Chhawna hian hmuh sual a nei lo tiin huai takin kan ţang ngam a nih hi.

 

            ‘Kohhranah inpumkhatna a awm lova, an inrel tawna khawtlâng an lungrual lo. Mi ţha an vâng tial tial a, kohhran chu thûk takah a pil dawn ta ţhin’ tih a ni leh a. He thu hi Tual Upa Lallungmuana khan rawn sawi chhuak ţanin, Frederick-a khan ‘Fei khawh thlarau’ tiin a khar a nih kha. Tun lai chhana nula lêng rei deuhte hi zawhna han zawt la, ‘Mipa fel leh rintlak an vâng’ tiin an chhang fur ang che!

 

            ‘Lalpa ruai kiltute chu an va hniam êm! Lalpa’n a ruai chu a chawi hniam zel a, kiltu pawh a sawm hniam zel bawk. Chanchin Ţha kal dan hi a va hniam êm!’ tiin a sawi leh a. Hei hi Frederick-a rawngbawlna hian a rawn thlen diktir zet mai. Kei ngei pawhin, a rawngbawlna chhimtute chu tar chak lo leh nunau tê tê, damdawi inenkawlna pawh nei mumal lo, thawmhnaw ţha leh nalh pawh nei lo, mi chumchhia an nihzia ka ziak hial tawh a ni.

 

            ‘Bible hnuaiah hian hriak a sûr sung sung mai a, mi ţhenkhatte chuan bible thu chauh an duh a, a hnuaia hriak sûr hnuai awm an duh lo. Mipui tam tak chu hriak sûr hnuaiah chuan kan awm bawk. Ngaihdan a tam avangin pawl hnih kan lo ni ta mai a. Bible leh hriak chu ţhen hran kan tum a’ tih a ni leh a.

 

            Hei hi tun hunah hian a dik ngawt mai. Hriak hi baibul lam kan en chuan, thlarau malsawmna nena tehkhin a ni ţhin. Mahse, tun Home Crusade an kan han zawh khan, ‘Kohhran tinah Pathian thuchah hriltu tur kan nei a. Engvangelist bawh huam huam hnam kan ni a, kohhranah kan lung a awi lo’ tiin midang dem tum ran chungin anmahni nihna dik tak an rawn puang chiah a nih kha. Mi dang leh pawhin, ‘’Tihdam rawngbawlna chauh kan duh a, Pathian thu kan duh leh mang si lo’ an ti bawk.

 

            ‘Ram lo lang tur chu thlir r’u, thlir r’u’ a ti a. Khawpui ri ang mai hian a ri hluah hluah a. Chumi rik zawh ve leh chuan ram lai takah hian Thlalatu lian pui a lo ding chhuak a. Chhim lam a hawi a, hmar thla a la a, khaw chhak leh khaw thlang a hawia, thla a la zel a. Tichuan, a reh ta vung vung mai a. A chhia nge a ţha nghakin kan awm ta ţhuap mai a’ tih kan hmu leh a. Home Crusade a han zo a, kan reh ta vung vung rih chu a nih hi.

 

            Hei hi mi ţhenkhat chuan UID hmanga thlalak kha an sawi a. Kei erawh chuan tun huna Mizoram pum huap Crusade, TV kaltlanga kan neihah hian, Thlarau Thianghlimin a mite a chhinchhiahna niawm deuhah ka ngai a. A chhan pawh a hnuah, ‘Fiahna, fiahna!’ tiin a han tlangau a. Kan ram chu pawl ngaah kan lo insiam a lo ni a’ tih kan hmuh vang a ni.

 

            Chumi hnuah pawh, ‘Kraws êng aţang chuan âw mawi êm êm a lo chhuak a, ‘Kal zel ula, tuikhur thar in zel rawh u. Zoram hian a dâng rozia a hre lo a nih hi. A kal zel chuan Siamtharna chhumpui a lo zîng anga, chutah chuan in kal sualzia hmuhtir theihna a awm ang’ tiin siamtharna chu kan hmaa a awm thu a sawi leh a nih hi. Home Crusade result han en hian, siamtharna chang ţhup zawng kan ang tlat lo.

 

            A dawt lehah chuan kan rama thil lo thleng tur, a lo thlenna chhan tur leh thil dang dang a sawi thirho kan tum leh dawn nia.