Nizan kan Synod Moderator thu sawi zet kha !

            Rev Chanchinmawiate’n chatuan ram min pan san hnu hian, Pathian thu ang diak diaka kawlh leh ţihkhai reng nei lova thu sawi ţhin, Berampute zingah hian an tam lo ngawtin ka hre ţhin a. Kohhran nge enkawl har ang mipui, tih ka ngaihtuah châng phei chuan, ‘In ţawngka chhuak chu chi-a al nen ni rawh se’ tih thu delhkilh neitu kohhran hruaitu dinhmun khirhzia hi, kan zuk hriat thiampui tawk lo fo niin ka hre ţhin.

 

            Nizan lama kan Moderator Rev R. Lalchangliana’n, ‘Simna’ tih thupui hmanga Zofate hnena thuchah a sawi kha, ka ngaihthlak nawn chiam pawhin, kâr hmasa lama thu sawitute thu sawi kha a lo thlawn lo tawp a ni tih a chiangin ka hria. Pathianin min awmpui ngei a ni tih hi rinhleh rual a lo ni lo e.

 

            Sailova’n ţhahnemngai taka, sawisel pawh huama, “Thutak sawi kawngah pawh rawngbawltute huaisen a ngai ta” a tih ngei mai kha, kan kohhran lû ber hian a thu sawi kaltlangin a rawn thlawp ta! Kan nihna dik tak, simna rah kan nuna hmuh tur awm chuang si lote chu a rawn phawrh fai ta léng a!

 

            “Kan Politik kalpui dan dik tawk loh vang nge, kan va han depdê ta êm! Kan va han rinawm ta lo ngai êm! Kan va han thatchhe zozai ta êm! Khawiah nge dikna hi kan dah tak? Mizoram anga Revival thlen zinna ramah Lalpa’n rinawmna hmuh a duh a ni! Simte nun aţangin rinawmna leh hmangaihna nun hmuh a duh a ni!” a han tih piap piapte khan, ‘Amen’ lo pe thei engzat tak awm ang i maw?

 

            Sailova bawkin, ‘Kan duh apiang min pêk laiin, Simna erawh kan duh lo a nih hi’ a tihte kha, kohhran hruaitu lû ber hian, a dik a ni tiin nizan khan a va rawn tarlang chiang êm! “Pathian thu hril, rawngbawlna aia eizawnnaa ngai ta kan tam lutuk!” a ti zingah kan Moderator hi chhiar hmaih tur mi a nihzia kan hmu bawk a nih kha!

 

            Kristian ram ni ve si, Kelkang Harhna kan dawn lai la la leh, tun huna hripui a lên laia chi vâng thutin mahni hmasial reng renga nun chhiar ţhin kan nihna te, Kerela State-in tuilian râpthlak tak a tawrh lai pawha, thil man a to phah chuan lohzia, keini ve lem COVID-19 vang mai maia thil man ti to uchuak hreh lo khawpa duhamnain a salbeh kan nihzia, kan kohhran hruaitu lû berin a han sawi ta hi harh phah nân hmang mawlh ang u!

 

            Sailova vekin “Kan ram ţhanmawhbawk, eiru phate eirûkna khawvela eirûk pawh ni lo, ei lan pawh zak tawh lote sapatalna khawvelah hi, keini’n Pulpit tlâng aţanga kan hrawk tuarh tuarhnate pawh hian a tikhur zo tawh lo a nih  hi!” tia lamţang a zawn chiamnate kha a lo thlawn reng reng lo a lo ni a!

 

            “Kan ram lui zim tê, lui kuang pawh zim tê ni si, lei kan han dawh pawhin engvangin nge kum 4 leh a chanve chhûng dawh zo turin enga ti nge Re-Estimate a ngaih tak zel mai?” tiin, eirûkna chu a chaldârah tak rawn khawngin, eirutute pawh a mupuiin a rawn kap ta siah siah mai a nih kha!  

 

            ”Rawngbawlna chanvo chelhtute pawh an ni ve thei ang, hlawkna uma mi duham, midangte chhiatna pawh pawisa lem lo niawm tak, nungchang danglam pu miah lova min hre chiang lotute zinga Krista hnungzuitu dik nihna pawh lantir ngam lo!” a tihte hi kohhran mi inti ve lawi si hlir an nih takzia a han sawinate mawlh kha a ni, Pathian thu chu lo ni!

 

            “Simna chuan rinawmna, dikna a rah chhuak tur a ni a. Ram pawn aţanga dik lo taka min thlem kawih tumtute hi dikna leh rinawmna hmangin kan lo hnar dawn lo’m ni? Thianghlimna leh hmangaihna a ni Lalpa’n Zoram ringtute nuna a hmuh duh chu ni!” a han ti piap piapte khan, kohhran mite nungchang dik tak a tarlang chiang a ni ti rawh u!