Nizan Bethsy pasal Upa Lalhriatpuia Chawngthu thu sawi pawimawh êm êm chu !

“Lalpa nena lên dunna (fellowship) neih aiin rawngbawlna kan dah lian tawh zawk a, mi tam tak phei chuan kohhrana thiltih tur (activities) tih leh rawngbawl chauh hi emaw Kristian nun dan tur kan ti zo ta. Kristian nun hi rawngbawlna nun a ni lo tih ka sawi duh a. Kristian nun chu Pathian nena inzawmna nun, Lalpa nena inpawlna nung, Pathian nena lên dunna nung neih ţhinna zawk aţangin, nungin Pathian rawng (rawngbawlna tak tak) an bawl thei chauh zawk a ni” tih kan ngaithla a, ngaithla liam puattu chuan, sawisel tur a hmu nghal mai ang!

 

Zoram Kristian-te mutân lian ber, mi hlate leh mi sual nia kan hriatte’n kan zinga tel an châk loh chhan, kan rawngbawlnain thlarau bo a man hleih theih loh chhan, rawngbawltu tam tak hmuh tlin loha an awm chhan zawng zawngte, nizan khan Pathian hnen aţanga hriattirin kan awm ta a nih kha. Inkharkhip chhûnga Sermon-te hi Pathian hriatpui an nihzia a lo lang chiang êm êm bawk. Hun hmasa lamah tihdam rawngbawlna te, thu leh hla hmanga Pathian chibai bûkna te, kan nuna sual kan thup rûk leh tihsual kan neih zawng zawng phawrh lanin an awm a.

 

Hun tawp lamah Kristian kan nih anga kan chhuan rûk ber, tling kan intih rûk êm êmna, kan thiltih ţhat zawng zawng, Performance based Christian kan nih dan, nung si lova rawng kan bawl dan leh, kan ro rûk chhan, simna nun tak neih dan, chumi aţang chauha rawngbawlna nung neih dan kawh hmuhin kan awm ta a. Rawng kan bawl lohin, ti kan awm fur mai! Kan bawl renga a nung si lo a nih hi. Heti zat zaipawl, Speaker, rawngbawltu leh Upate uapna hnuaiah kan awm laia, Pastawr rualin heng mite thla an veng chunga kan rama suahsualna inlulinzia kan hriaa, kan sawi kan sawi reng a nih hi.

 

Adama anga tlai ni nêma Pathian nena leng dûn zeta, a bak zawnga Eden huana ramsa chi hrang hrang leh theirah tinrengte enkawl hna thawk ţhin te, kum 300 chuang Pathian nena lêng dun Enoka, kum 365 chhûng lei kum chhiar ţhin te, sawiselbo Nova anga Pathianin a lên dunpui ţhin te, Mosia leh Elija anga Pathianin a biaka a zuk pawl ţhin, Davida anga Pathian nena lên dun thlahlel reng renga a lei kum chhiar zo mi ang hi, Zoram Kristian zingah hian kan tam lo a lo ni. Keini zawng, Zawlnei Mika’n kan laka Pathianin a phut, thuhnuairawlh taka Pathian nena lên dun, a tih aia buaina ngah zawk Kristian kan ni si a.

 

“Rawngbawlnaah kan buai êm êm chungin kan sawi duh lo mai mai a. Kan nun a rovin kan thlarau nun a chau êm êm a. Camping leh Crusade thlahlel reng rengin kum kan chhiar ţhin. Kan rilru tak sawi duh ila, Camping leh Crusade hi kan sâwtpui lutuk tawh lo, kan ti ang! Lalpa’n a thlakna min pe ve tawh dawn a ni ang; Pindan chhûngrila Pathian nena lên dunna, mimal anga Pathian da;wra lên dunna nun hi!” han tihte hi thu dik tak, sawi kan hreh êm êm si chu a va ni êm! “Lalpa hmaah i nun inhmu turin, i pindanah ţawngţaiin thuhnuairawlh takin simna nun nei rawh. Chu chu he ramin a mamawh chu a ni si a!” tih hi kan hmabak chu a ni ta.

 

“Lalpa hmaa miin a nun a hmuh fiah chinah reng reng, a nunah sim tur a hmu ngei ngei ţhin” tiin, Joba ang chiah, a ţhiante kaltlanga Counseling khum mawlh mawlh tawk, mahse Joba anga mahni thiltih ţhat chhuan tur lo hmu lian tlata, Joba bung 42 aţanga bung 37-na thleng, Pathianin Joba a rawn chhan hma zawnga mahni nun inhmu fiah thei lo khawpa, kan thiltih ţhatte phena ro leh chau tak chunga biru ţhina rawng bawl hram hram, mahse han in enlet tak taka sâwt si lova rawngbawlna buaipui Kristian kan nihna hi kan inpawm ngam a hun ta.

 

“Kohhrana kan thiltih (performance) hi a ţha êm êm a. Kan thu sawi nung lo deuh mah se, kan rawngbawlna hian Krista hnenah thlarau bo hruai miah tawh lo mah se, kan inkhawmnaah mi hla zawkte’n rawn tel ve châk miah tawh lo mah se, inkhawm kan kal ţhain kan la taima si a, kan la lam peihin thilpêk kawngah kan la ţhahnem avangin, Joba ang mai khan sim leh chuan tur neiin kan inhre tawh lova, kan mang pawh a ang bawk hek lo. Kohhran leh rawngbawlnaa buai ţhin Kristian-te hi kan nuna buai ve tawh turin Lalpa’n min duh a ni” tih thu kan hnenah a lo thlen phah ta a nih hi! ‘Midang vei reng renga hun hmang ţhin Zoram Kristian-te hi, mahni invei ve tawh rih turin Lalpa’n min duh a ni” tiin, midang veina leh kohhrana rawngbawlna zawng zawngte chu tihtawpin a lo awm ta a nih hi.

 

 

Zoram Kristian-te aia mi fel leh thianghlim zawk Joba nun thleng pha lo, rawngbawlna kawnga hmanhlel si Zoram Kristian-te hian, hei hi a ni kan mamawh chu ni! Sawisel kan huatzia te, mi sualte nun thleng phak lo rawngbawlna kawnga kan hmanhlelzia te, kohhran sawiseltu apiang kan thinhrik dan te, kohhran bela a thlazar hnuaia rawng kan bawlna kan chhuanzia han en hian, Pathian hmaa mahni nun chhûngril hmu fiah thei lo, sim leh chuan tur hre reng reng lo kan nihzia kan inhre ngam dawn em le?

 

 

 

 

Upa Lalhriatpuia Chawngthu hi chhim lamin Speaker a neih zingah chuan ţhalai tak, Pathian hman mek niin, nizan a thu sawi kha mi tin tâna darthlalang fiah êm êm, kan mamawh Pathianin min rawn hriattirna thu a ni a. Tv Frederick a hun aţanga nizan hmasa thlenga Speaker zawng zawngte thu sawi a rawn khaikhawm zet a.

 

Heti zat Sermon ţha ber ber kan ngaihthlak tawh hnuah pawh, Isua’n he leia Pathian ram rawn dina, mite chu an sual sim turin, a chângin dimdawi taka an hnenah thu a sawi ţhin ang leh, a châng erawh chuan chung lam thinrimna paipawn chunga mite nihna dik tak a sawi rorum ţhin ang bawk khan, Zofate hnenah Pathianin thuchah sawiin a mawlh mawlh tawh a.

 

Mahse, Lal Isua meuh he leiah thuhril kawnga mi tam zawk laka a hlawhchhama, mite’n an sual an sim ahneka amah an khengbet ta hlauh zawk ang maiin, Zofate zingah pawh thu sawitu zawk lo chirhtheha, lo nuihzatin, mi ţhenkhat phei chuan Celebrity ang hialah kan thuhriltute lo chhuahin, anmahni ngaisângtute ţheuh lo khaikhin duh pawlte kan awm ta hial a nih zawk hi.

 

“Pathian thu ropui tak leh khal tak tak ngaihthlak avang ringawtin simna a lo thleng thei lo. Nâ taka thu sawite, kan ram sualna insawi khumte hian simna hi thlen dawn ni se, Zoram hian kan sim daih tawh ang. Pathian thu hmanga invuak vak vak pawhin simna a thlen chuang bawk hek lo. Simna dik tak chu, he nun hi Lalpa hmaa a inhmuh fiahnaah zawk Simna a lo thleng ţhin” tih thu dik leh ropui kan ngaithla ta a.

 

Joba nun rawn tarlangin, Joba chu Pathian ţihmi, mi insumthei, mi fel famkim a ni. Amah ang bawkin Lalpa tâna inthawina hlan reng ţhin, chhûngkua ang pawha Pathian chibai bûk ţhin, Joba ang bawka inkhawm ţhulh ngai lo, thawhlawm pe ţha, zaipawl leh kohhran hnuaia pawl hrang hranga kumtluana inhmang ral ţhin, mite pawhin an nun an teh chânga, ‘Ani zawng mi fel leh Pathian mi’ an tihte chung thu tarlanin a awm ta a.

 

Tun huna kohhran mi tam zawkte hi, Joba ang bawka an nihna aia an thiltih leh rawngbawlna langsâr zawk kan ni fai deuh vek a. Kohhrana kan thiltih (performance) hi a ţha êm êm a. Kan thu sawi nung lo deuh mah se, kan rawngbawlna hian Krista hnenah thlarau bo hruai miah tawh lo mah se, kan inkhawmnaah mi hla zawkte’n rawn tel ve châk miah tawh lo mah se, inkhawm kan kal ţhain kan la taima si a, kan la lam peihin thilpêk kawngah kan la ţhahnem avangin, Joba ang mai khan sim leh chuan tur neiin kan inhre tawh lova, kan mang pawh a ang bawk hek lo.

 

He laia a thu sawi pawimawhzia tihian han ţhial chho ta ila. Tun dinhmunah chuan zalenna hnuaia Kristian kan nihna anga kan thiltih (performance) ţhat zawng zawng kan tarlan tak, sawiselna a lo thlen pawha mahni insawi fihlim nâna kan leklam ber, Pathian rawngbawlna dik leh fel ber nia kan hriat zawng zawngte chu, tih theih pakhatmah kan nei ta lo a. Tun hunah tak hian, Adama leh Enoka, Mosia leh Eliza, Tirhkoh Pauala leh zirtirte anga Pathian nena nitina lêng dun ţhin hi kan tam a rinawm ta hlek loh a nih hi!

 Zawlnei Mika sawi angin, ‘Pathianin a phut che chu eng nge ni? Khawngaihna ngainat leh thuhnnuairawlh taka nitin Pathian nena lêng dun’

 Mahse, zalenna hnuaia kan awm lai pawh khan, mi hlate chu kan zingah tel an châk lova, ruihtheihthil ti ţhinte pawhin, ‘Ani Vanram a kai chuan kei pawh ka kai ang’ tiin, kan zinga tam zawkte nunah Pathian an hmu ngai bik hlek lo a nih kha. Mi sual kan tihte hian Pathian ţih tak taktute hi an hai ngai lova, an hre dikin a zah pawh an zah ţhin a nih hi.