Mizoram-in IAS a mamawh ngawih ngawih e !

            Chen ngai lohna rama kum tam tak zuk thang bo vang vang kher lova sawrkar hnathawk lian nih theihna kawng, kan ţhalai rualin an awn sup sup tawh lai leh, Mizote ngeiin IAS hlutna ngainep zawnga ngaihdan kan neih ngheh tawh hnuah hian, nu leh pa tam tak chuan fate kuta sa hrang hmuh len theihna tur dapin, an fate an vulh lian mek a nih hi.

 

            Mahse, hmasâng ata tawh IAS hlutna chu a la pangngai reng a. Buaina satliah lo, buaina tak tak a lo thlen meuh chuan, a ram ang leh a hnam pum anga min thlamuantute chu, kan ram hruaitute ni ngawt lovin, phai vai tlim hmûr zinga khawharna nena hun lo chhiar rak rak ţhin, mipui tam zawkin an awm ve tih pawh kan hriat loh, Central Service-a Zopa/Zonu nge an nihzia hriattirin kan awm thar ta a nih hi.

 

            Chennai khawpuia vaibelchhe tel mihring phu mûr mûr zingah, kan IAS val ţha Pu Avena chu Mizo ţhalai sang chuang dawnte thlavang hauhtu leh, khual khuaa zam chhe mai lo tur leh, mangang taka hun hmang lo tura heng ţhalai rualte ngaihngam taka Mizoram rawn hruai thlengtu leh, in lama phâng ru taka heng ţhalai rual chhûngte hnena lung damna thlentu hi IAS val ngat a ni.

 

            Hyderabad lama Mizo tangkhangte a hun taka ngaihsaktu leh, Mizoram an lo hawn theihna tura kawng engkima ruahmanna lo siamtu, Dr Franklin-a pawh IAS val ţha ngat a ni bawk. Chutiang bawkin Gujarat lama kan nulate an chenna in aţanga hnawhchhuah mai hmabaka an awm lai leh, ţanpuitu kut reng an hmuh zawh loh laia, an thlavang hauhtu leh thlamuantu pawh Pi Saii IAS Zonu ngat a nih hi.

 

            Mizote hi India rama khampang khuai ang maia kan la beh reng chhûng chuan, IAS/Central Service-a Mizo ţhalai a tam thei ang bera kan luh a ţulzia, tun hrilêng hian min rawn hrilh thar ta mawlh mawlh a nih hi. Tun hun khirh chhûnga kan IAS rualte pasalţhatna hian kan Mizo nula leh tlangval te thinlung nghawk harh awk awk se, tunah leh nakin zelah pawh a va thlamuanthlak dawn êm!

 

            Zorama nu leh pa zawng zawngte pawh, kan IAS-te thiltih hian kai harhin, an tu leh fa te Central Service-a lut tura ţhahnemngaihna nunin, an pumin bual chhuak se, a va ropui dawn êm! Kan IAS-te hian an thiltih kaltlangin, Sermon leh thu sawi ţha satliah mai ni lo, a taka anmahni ngei chet chhuahna kaltlangin rawng an bawl a, Pathian thu angin an nun an hmang ţha a nih hi.

 

            MCS ngaihhlutna lama luangliam mek Zoram ţhalai rual leh, anmahni fuih chaktu an nu leh pa te thinlung hi ţhiahin lo awm se, kan ram leh hnam hian a va hlawkpui dawn êm! MCS china tawp ringawt tura rilru siam mek kan ţhalai rual duhawmte leh, chu dinhmuna lungawi nu leh pa te hian, nakin zela India ram chhûng ngeia Mizote’n harsatna leh manganna kan la tawh theih tur dâwn chungin, hawh u, kan rilru sukthlek i thlak danglam ang u hmiang.

 

            He IAS nihna aţang hian nung takin Pathian rawng a bawl theih a. Ram leh hnam tâna kulh nghet leh rintlak ber nih theihna dinhmun a ni bawk. Thinlung chhûngrila ram leh hnam hmangaihna nei a, ka ram leh hnam tân ka thiamna hi engtin nge ka chhawr ve theih ang, titute chuan he IAS zinkawngah hian Pathian rawngbawlna leh ram leh hnam hmangaihna a takin a nunpui theih tih lo hre thar mawlh rawh se.