Mizoram sum dinhmun pawh hre lo CM kan nei.

Kum 15 chuang ka lo buai ve ziah tawhna chu; MNF an sawrkar laiin Congress han ni ila aw, ka tih loh leh Congress an sawrkar laiin, MNF han ni ila chuan aw, tia Ruling thil tih dik lohte, Opposition anga han hailan châkna ka nei ziah hi a ni.

 

COVID hrilêng avanga Mizoram sawrkar-in harsatna a tawh chungchangah, CM Relief Fund khawn a han ni a, sawrkar hnathawkte hlawh hial ţham ţhen ngaia a han lan takah chuan, mipuiin kan sum dinhmun dik tak hriat hmasak kan duh ta a.

 

Tichuan, nimin lamah kan FM Pu Zoramthanga chuan thu chhuah a rawn nei ta a. Langtlang taka kan sum dinhmun hriat kan inbeisei laiin, "Mizoram sum dinhmun dik tak tuma'n a sawi theih loh!" tih hi kan thu dawn chu a ni ta a ni.

 

He thupui hi duh tawk mai lovin, 'Rin thu pawha sawi a harsa, Pathian chauhin a hria' tiin, a mize pangngai ang bawkin thu a han uar zual sauh a! Mipui tam tak chuan he a thu sawi hi, van rim nâmah ngaiin, baibul thu tlukin an lo lem leh duak ngei ang!

 

Pu Zorama hian zawhna hrulah thu dik ni si hmanga mipui rilru hruai pen hi a thiam êm êm a. Pu Hawla ve thung erawh chuan, a mi den dan tur ngaihtuah lovin thu a sawi bâwl ţhin. An dangdai ve hranpa ngawt mai.

 

Mipuite'na CM/FM hnena kan zawhna chu hei hi a ni zawk - Tun dinhmunah Mizoram hian pawisa engzat nge kan neih? tih hi a ni. Mahse, kan CM thung chuan, “Covid Fund, CM Relief Fund-a kan chhun luh hi engtin nge hman a nih?” tih hi mipuiin Sawrkar hnena zawhna kan zawh niin a sawi ta hlauh a!

 

Tichuan, he zawhna hmanga min han vehthlem kual hnuah, “Inrinsiak ta ila, (Budget) a chanve hmuh ring, hmun thum a ţhena hmun khat hmuh ringte pawh kan awm ang” tiin mipui zawhna hrulah thiam takin min han chhang ta zer zer mai a!

 

“Khawvel a buai a, India ram pawh a buai a, rin thuin kan kal” han tihte hi a huaisâr thlak hle a. Khawvel hi a rin thuin a kal awzawng lova, sawizui chiam lo mai ang. “Kum hmasa lama sum lo kal dante enin, beiseinain kan sum dinhmun tur kan sawi thei” han tih leh lawi site hian, mipui hnena thu sawi tur hian inbuatsaihna ţha a neih lohzia a tarlang chiang ngawt mai.

 

“COVID vangin GST aţanga India leh Mizoram sum hmuh tur hriat theih a ni lo” tih hi thu dik a ni. Hei hi chhanna min pêk ni mai se la, a hriat thiam theih em em a ni. COVID hmaa India-in pawisa a ngahzia leh sum a tam turzia sawi nâna Jal Shakti a rawn hmang ziahte hi hmang chhunzawm tawh lo se, a va lawmawm dawn êm!

 

Ministry of Jal Shakti hi hunbi tiam nei chhûnga tui khawl tura India-in ruahmanna a siam a ni a. Thil danga pawhpen theih sum a ni lo! “COVID hi tawp mai tur a nih loh avangin, sum hman dan tur leh khêk dan tur ngaihtuah a ngai” a tihte hi thu dik awm sa reng a nih hi!

 

Inrenchem tur chuan a hminga Mau hmanga hmalakna tur an duan denchhena mi 14 lai, MoS rank leh intuamhlawmna an pêk zawng zawngte hi titawp turin mipuiiin kan ngen a, kan sawi chamchi reng a. Mahse, Pu Zoramthanga hian a Party MLA duhsakna a pêk hi hlih a tum hlek lo niin alang.

 

Tun dinhmunah Mau hmanga hmalakna a neih mumal theih loh a. Chuti chung siin mi 14 laite chuan thla tin MoS intuamhlawmna sum an hmang ral mawlh mawlh reng a. Sâwtna awm si lova a thlawna sum luantirna mai a ni. Mahse, chutiang tih ai chuan sawrkar hnathawk leh mipuite sum thawhtir mawlh mawlh min la tum zawk mek chu a nih si hi!

 

Tin, PPE lei dan chungchang pawh, “A thleng hlim kan inchuh a, a chuk chak pawl kan ni hlauh. A ţha em tih en hman a ni lova, kan lak ang tho State dang pawhin an la a, thubuaia lak chi a ni lo” a han ti leh ringawt a. Kan ţhenawm State chuan an Secretary leh thawktu dang an ban tih ram pumin kan hre si!

 

A tawp berah chuan Health Dept hi lo sawi ta ila. Tun hun khirh kan tawn mek lai hian, sawrkar-in fak a phu kan ti a nih ngai chuan, Health Minister Dr Thangtea tluka hna tlin leh inpe, fak phu an awm lo ang tih hi mipui pawhin an sawi dan a ni.

 

Mahse, MNF chhûngkaw buai vang ni ngeia lang; Health Minister-in COVID do nâna vaibelchhe tam tham tak a dil chuan ngaih pawimawh a hlawh chiah lo nge, 19.527 cr chiah pêk an han nite hian ngaihtuah a ti thui hle a nih hi.

 

Heti hian ka ngaihtuah ta a. MNF hian langtlang takin CM Relief Fund an kalpui mek a. Hetih lai hian sawrkar laipui aţanga sum lo kal erawh, engtin nge hman a nih a, engzat chiah nge dawn a nih tawh a, dawn tura beisei kan neihte khawi aţanga lo kal tur nge, tih leh thil dang reng reng, mipui hriat ve theih miah loha kalpui tumna a awm mek em ni, tih ngaihtuahna neih loh a har ta a nih hi.