Fei Khawh Thlarau, Hriakthih-ate Buaina ! – Frederick Lalrindika – II

Home Crusade Sermon kan neih tawhte’n mipui mimir lam an hawi ţhuap renga, Simna Thuchah puan a nih mawlh mawlh hnuah, nizan kha chuan Pathian thinurna leh thikthu chhiatna chuan kohhran hrang hranga, Pathianin a rawngbawltu ni tura a Hriakthiha-te lam a hawi ta hruau mai a nih kha! Exodus kan en chuan, “Rimtui siamtu angin, hriakthih chu hriak thianghlim a ni ang” tih kan hmu a!

Mahse, kan rama hriakthih-ate zinga tam tak hi chu ri chher bengchheng, beng hriatna tichawmawlhtu, hriak bawlhhlawh leh Krista zuitute kâra hem thlak hmang mai an ni a. Pathianin he khawvel rimchhe takah hian, mi tin tâna thâwk lak tinuamtu, remna siamtu leh thlamuanna petu hriak rimtui ni tura hriak a thihate ngei kha, an rim a chhiata mite thinlung a luan chhiat ţhin vang hian, Pathian vaukhanna an tawh loh ring reng reng suh!

Chronicle kan en chuan. “Ka hriakthihate chu täwk suh” ti hialin Pathianin hriakthih-ate hi a humhalh a! Mahse, Jakoba lehkhathawn kan en thung chuan, “In zinga mi tam takte hi zirtirtuteah (rawngbawltuah) lo awm suh u, zirtirtuin rorêlna nasa leh zual kan tâwk ang tih kan hre si a!” tiin, anmahni a humhalh nat tluk zetin, an chungah ro a rêl fèt dawn tih hi, hriakthi-ate zinga tam tak changvawn a ni ngai lo!

Mipui pawh kan bang bik chuang lo! “Keimah ai chuan mi autirtu a pawimawh zawk a. Kei, Frederick Lalrindika ai chuan, thu min petu a pawimawh zawk” a tih lâwm lâwm lai pawhin, nimin lama Sermon kawmentu ţhenkhat chuan, rawngbawltute zawk lo ngaisâng a, ngaihhlut loh zawng lo la nei fân, kohhran bil anga thil lo la duh an la awm ta zel a nih hi!

“Mi ţhenkhat ve thung hi chu, Harhna sawi hnâwm zawnga ţawng ziah mai, intifing khekrek deuha Pathian thila lo inbrawlh ve ziah, Pathian nena kawmti duna, ‘Lalpa hei hi chu a ti dik chiah lo a ni’ tia ngaihdan fahrah tê tê lo rawlh ve ziah an awm a!” tih rumţhaihna thawm a lo chhuak bawk a nih kha! Kan Zoram zim tê-ah hian hetiang mite hi an va pung chak êm! Tin, “Engmah kan ni leh chuang lo ang, kan sâwtpui chuang lo” titute ngei pawh a rawn khâk a nih kha!

“Mipui ram hi chu Pathianin a au chim thaw khat niin ka hria. Danglamna pawh a thleng khat e. Mahse, kan rama Rawngbawltu, hriakthihate ram hi auh chim a nih loh chuan, mahni kohhran chawisânna intihveina te, rawngbawltute’n mahni thu leh hla bil tê tê an tlangaupuina kaltlanga kohhran mi ţheuh ni site inţhen hranna bawk a lo thleng leh ang. Tuna kan rama thil thleng mek, a hmusit zawng leh ngainep zawnga thu sawinate pawh a lo thleng leh ang!”

Hriakthiha-te buaina hi a lên tham êm avang leh, an pawi khawih hi a thûk êm avangin, Pathian tân ngaihmawh loh chi a ni lul lo ang. Anmahni avang hian chhûng khat ni reng si, biak in lawina hrang tlatte an lo awm phah a. Anmahni avang hian nupui pasal neih kawngah pawh buaina a lo thlen phah ţhin. Anmahni avang vek hian, ram rorêltu tur thlan kawngah pawh duh zawng aiin, mahni kohhran mi thlan zawkna a lo thlen phah fo a.

Anmahni avang hian, khawngaihna nun kan neih ţhin pawhin hleih nei zovin, kan kohhran huang bak pel khawngaihna kan nei hlei thei lo fo! Anmahni avang hian kan Mission Field-te chu kohhran hrang hrang ramriin a inbawhthuah kawkalh nuaia, ‘Kan Beram an rû!’ tih thawm ngaihnawm lohte a lo chhuah phah ţhin. Anmahni avang vek hian, Zoram chhûng khaw ţhenkhat, kohhran a din nual tawhna ngei pawh Ramthim a puanin a lo awm phah a!

He anmahni zia kaichhawngtu kohhrante pawhin, kohhran dangte chu nitin feiin an khawh an khawh phah ta ţhin a nih hi! “Kan lawmna ber tur chu, Pathian ram zauh hi a ni lawm ni?” tih a nih laiin, Hriakthiha-te zinga tam ber lawmna erawh a tling zo tawh ţhin lo a! Kan rawngbawlna rah a nih loh chuan, kohhran dang rawngbawlna raha lawm thei miah tawh lo an tam ta. Engvang nge? “Pathian kan hmangaih tawh loh vang a ni” tih hi Lalpa chhiahhlawh kaltanga chhanna lo chhuak chu a ni ta a ni.

“Isua hmangaihtute chu kan inrem ţhin” tih thu dik, a tidik lotua ţang zar zar Hriakthih-ate inrem theih lohna chuan, kohhran tinah zûng kaihin zâr a chhuah a. Kohhran mite chu inrem ahnekin, khawvel hmaah kan inkhing uaih uaih ta mai a nih hi! Kohhran bil kaltlanga kan thawhrimna, kan chhelna leh kan taimakna zawng zawngte chuan, ‘Pathian aia mahni rawngbawlna hmangaih zawktu’ nihna bak hlawh min pe lo!

‘Chuvangin ka khawnvar dahna ka la sawn mai ang’ tiin Pathianin vauna thu a chhak chhuak ta hlauh a nih hi! Mizoram Theological Association, kohhran hrang hranga Pathian thu zirte hian inzawm khawm an châkin, vawi tam Seminar leh lehkhabute hial tichhuak mah se, he khawvel thila kohhran bil anga kan hausakna, kan thil neih changkang pui puite chân leh midangin min hman ţawm hlauhna avangin taksa pumkhat, lû bera Krista nei thei lo kan ni mek a.

Chhuanlamah erawh Doctrine kan hmang a. Kâwrah Baptisma chan dan leh rin dan hran hran kan neih kan dah lal hmasa zawk ta ziah a. Chungte lah chu keimahni aţanga puak chhuah Doctrine pawh ni lo, Sapho hmuh chhuah, an nun leh ze mila an her rem mai a ni. Hei chen Pathian thu kan neih tawh hnu leh, Pathian hnung kan zui tawh hnuah pawh, Zofate lungrualna tlânga min hung thei Theology pawk chhuah theihna leh tumna pawh nei thei lo khawin, Denomination thuhnuaiah kan la kun ta cheu a nih hi!

Mahse, Pathian thu han en erawh chuan, Lal Isua hnungzui dan hi kawng khat bak a awm si lo! Eng hi nge kan buaina ber? Khawvel thilah kan hausa tain, kan neinung ta vet vet hlawm êm a nih hi! Chuvang chuan Feikhawh Thlarau kan chan hian min kalsan thei mawlh lo a nih hi! “Kan ram, Isua Krista betute chenna hi, ram dang mite’n damna an zawnna hmun, damna an channa hmun tur…” tia Lalpa chhiahhlawh au lâwm lâwm hian, Hriakthiha-te buaina hi ţhiat thei teh reng se la aw!