Pathian hla phuah i chai teh ang !

           Bible hi ngun taka kan zir chuan, kan Pathian hi hla phuah thiam a nihna te, mi ril (philosopher) ropui ber, politician themthiam ber a nihna te hi in lo hmu ve ţhinin ka ring a. Chung zingah chuan hla phuah lungrûn thiam tak a nihna hi i han thlir thuak thuak teh ang. Hla tam tak a phuah zingah, tun huna kan ram dinhmun nena inhmeh tak, Zawlnei Isaia Bung 5-na bik hi lo en ta ila.

 

            He Isaia bung 5:1-7 inkârah hian Hebrai Hla Hril (Poetry)-a hla hrilna hmanrua; Wordplay, Assonance, Alliteration, Rhetoric bakah, thlûk sei dan ri hrang hrang leh mood hrang hrang kan hmu kim biai a. Bible-a hlate ka han thlir tak tak châng hi chuan, W. Shakespeare-a thu leh hla lakna hnâr hi khawia mi mah ni lovin, Bible aţang hian a lo ni, tih a lang chiangin ka hre nawn ţhin.

 

            He bung 5-na hla hi kan en chuan, tehkhinna (allegory) mawi tak kan hmuh rualin, tehkhin thu (parable) kan hmu bawk. Chutih rual chiah chuan, sûnna hla (lamentation) kan hmu tela, thu tluang hmanga tehkhinna (metaphor) pawh kan hmu bawk. He hla hi Mizo Bible chuan, ‘Grep huan hla’ tiin mawi takin a thupuiah a dah a. Lemchan dawhsâna mi pakhatin lemchan a rawn sawi hawnna, Sililoquy hmangin he hla hi Isaia hmangin chham chhuah a han ni ta phawt a ni.

 

            Châng 1-2 hi Isaia hian a ţhian thiltih angin a rawn chham chhuak ta a. Chu a ţhian chuan, lei ţhatna hmunah grep huan a rit a. Uluk takin a huan thlo faiin, grep nazawng ni lo, grep hrui ţha ber chi a phun ta a. ‘My well beloved hath a vineyard in a very fruitful hill’ tiin, grep huan chu Israel fate niin, grep chinna huan, lei ţha tinrengtea avurna hmun, pal phui \ha taka a hung chhuah chu Jerusalem a nihzia kan hmu ta a ni.

 

            Tehkhin thu hmang vekin Israel fate chu grep zawng zawng zinga, grep ţha chungchuang ber ‘Choices Vine,’ a bik taka grep hrui tam tak zinga a thlan chhuah nalh a nihzia hlain a rawn chham lungrûn hliam hliam ta a.  Isaia hian a ţhianpain he grep huan a enkawl ulukzia te, ran leh sa laka a him theihna tura a hung phui ţhatziate min chham khum bawk. Tichuan, châng 3-na kan han kai chiah hian, Pathianin he hla hi a rawn chham chhunzawm ve ta a ni.

 

            Châng 3-na hi ngenna ngenngawl tak hmanga bulţan niin, he châng chhiartute hmuhhmaih rual loh turin, Dramatic Irony an tih mai, thil dik lo a awm a ni tih chhiar theih turin Pathianin hla a rawn chham ta a. A thu chheh letling chiaha awmze nei, Verbal Irony mai bakah, grep huana thil thleng tura a beisei ang ni lo lutuk lo thleng vangin, Pathianin Situational Irony a rawn hmanna kan hmu chho ta a ni.

 

            Grep anga tehkhin thu sawi zelin, tihelna ţawngkam, ‘Wild Grapes’ tiin Sarcastic Pun, ‘Grep Suak’ rah a seng tak mai nachhan leh, eng nge thiam loh a neih tih zawhna ri chu, Isarel fate hnenah Pathian hnen a\angin a lo ri chhuak ta a. Chuvangin he hla hi Protest Song tih pawhin he hla hi sawi theih a ni bawk ang. Hmasâng Israel hunah chuan, mipuite koh khawma an awm chhan pakhat chu, thubuai chai turin a ni ţhin.

 

            Pathian pawhin chu chu Israel fate lakah beisei vein, ‘O inhabitants of Jerusalem and men of Judah, judge, i pray you, betwixt me and my vineyard’ tiin, kei leh ka grep huan inkâr thu hi min ngaihthlaksakin, thubuai hi han rem teh reng u, tiin châng 3-naah hian a rawn chham chhuak ta a ni. Israel fate a enkawl seilen danah thiam lohna a neih leh neih loh, thutlukna siam turin anmahni kutah thuneihna, Public Prosecutor hna a nghat pah titih ta bawk a.

 

            Châng 4-na kan en chuan, Pathianin Isarel fate hnenah thubuai a appeal ta a. Chu thubuaia chu Rhetoric zawhna pahnih hmangin a chhilh zui ta bawk tih kan hmu thei ang. ‘What could have been done more to my vineyard, that i have not done it?’ tiin, theihtawp bak chhuaha grep hrui ţha ber chinga, grep huan enkawla a tih tawh bak eng nge tih theih a neih tawh chuan, tiin Isarel fate hnenah zawhna a zawt ta a.

 

            Rhetoric zawhna pahnih, Pathian leh a grep huan inkâr thuah hian, Pathian dem zawnga chhanna reng reng reng sawi tur a awm tak loh avangin, châng 5-6-ah hian Judgment Order a rawn chhuak ta rup mai a! He grep huan hi ţhiaha a awm tur thu leh, a pal hungna lama tihchhiat vek a nih tur thu a rawn puang ta dum mai a nih hi!

 

            Tichuan, châng 7-na kan han kai chhoh hian, tehkhinna (Allegory) nungchang chiang taka tarlanin a rawn awm ta a. Metaphor nena rawn chawhpawlhin, Grep huan chu Israel chhûngte an ni a. Juda mite pawh a kung duhawm tak an nih thu min hrilh ta a ni.

 

            Israel fate ang bawk hian, Pathianin kan hnam hi hla min phuahsak ta se, he hla aia a ngaihnobei zawkna tur a awm chuang ang em ni? He hla tluk bawk hian Pathian hi, keini a Grep huan (Zofate) kan rah chhuah danah hian a lawm ka va ring zo lo ţhin êm! Hawh u, inngaitlawm takin, simna lamtluang zawhin, Grep rah dik takin rah i tum tawh zawk ang aw.