Pvt Sikul sum lakluh tamzia leh duham sizia !

Pehhel kal buai lovin sawi tlang nghal hrawih ila. Sikul din hi miin sumdawnna hlawk tak a ni tih hriain, kan mamawh aia tam mah tur Pvt sikul kan indin siak sup sup a ni ber a. Chuvangin mipui ngaihdanah pawh Pvt sikulte hi chu sumdawng dik tak an ni reng kumkhua dawn tih hi, anmahni ngei pawhin in pawm ngam tawh se, a lawmawm ngawt ang!

 

Dist lian pahniha sikulte ka han belhchian aţanga ka hmuh chu hei hi a ni. Sikul ţhenkhat chuan Admission-ah mi pakhat tân zel cheng 5000-7000 an la a. In luah manah ringawt cheng 40,000-80,000 thla tin an chawi bawk. Heng bakah thla tin tui, kawlphetha, ei leh in etc senso hi sikul lamin thla tin pêk tur an nei tih, kan hriatpui nghal mai bawk ang.

 

Hostel awmna manah mi pakhat zelah cheng 1500-2500 an la tlangpui a. Heti chung hian zirlai thawmhnaw a thlawna pe theite an la awm deuh deuh a. Tichuan, heng sikul ka han sawiah hian zirtirtu 15-25 bawr vel awmin, thla khatah ringawt an hlawhah cheng 100,00-350,000 sen a ni chungin, zirlaite hnena Fee khawn miah lovin, heng sikulte hian zirtirtute hlawh hi an la pe thei tlat a ni!

 

Dist hrang hranga heng sikul-te hi Admission leh thla tin Fee la tam lo pawl an ni a. Anni pawhin hetianga an mi chhawr leh innghahna zirtirtute an chhawmdawl theih lai leh, harsatna tawk miah lova sikul an la luah chhunzawm theih laiin, anni aia Admission leh Monthly Fee la hnem zawk zingah, zirtirtu hlawh pawh pêk tum lo leh, nu leh pa harsatna pawh hre thiam lova Fee an la khawn dû dû an awm hi chu, a tenawm thlak ngawih ngawih a ni ber!

 

Aizawla Pvt sikul tam zawk hi Admission Fee-ah cheng 15,000-25,000 chuang la an ni fur a. Thla khat Fee pawh cheng 2000-2500 leh a aia tam la an awm ţeuh bawk. Hostel aţang ringawta an sum lak luh hi thla tin cheng 300,000-500,000 dawn la lut thei pawh an awm ngei niin sawi a ni. Elementary zirnaah pawh thla tin cheng 1500-2500 Fee lan saw a tam zawk an ni bawk. Mahse, Pvt sikul tê deuh chinah chuan thla khata Fee cheng 1000 leh a aia hniam la an awm lo kan tihna a ni lo. Admission Fee pawh tam tham tak an la vek kan ti lo.

 

Mahse, tun huna a duham fal zual leh sawrkar ruahmanna pawh zawm tum lem lo, sawrkar nawrtute hi a hausa sa leh neinung sa, mi duham zual an ni zawk a. MSU leh MZP ngenna pawh pawisa lo ngam an awm hial a nih hi. Kan sawrkar nep êm avangin 50% aia sâng lo Fee khawn tura tih an nite hi an la vanneihpui ngawt mai. State dangah chuan heti mai maiin sawrkarin hma a la lo tih, a hmain ka ziak tawh a nih kha.

 

Mahse, duham vanga sikul dintu ni lo, naupang hma ngaia nu leh pa te dinhmun hriat thiampuina nei sikulte chuan, tun hun khirhah hian zirlai hnen aţangin Fee la miah lo leh mi nu leh pa, sawrkar hnathawk lo rual, eizawnna mumala kalpui thei lote hriat thiamna thûk tak an neih piah lamah, an mi chhawr zirtirtute thlenga an lo tuamhlawm tih hi hriain, nu leh pa te pawhin i bengkhawn ang khai.

 

Tuna Fee lak phuta iak iak-ho leh, zirlaite hnen aţanga 50% aia sâng lo Fee lak luih ţalh tumho phei hi chu sikul hlûn tak tak, sikul luah man chawi ahneka an sikul zauh mawlh mawlh reng theite an awm nual a. Tin, kum 10 leh a aia tam Pvt sikul lo kalpui tawh, mi in leh lo hmanga sikul lo dinte pawhin, kum kha leh chen hlawk tak maiin sikul an lo kalpui tawh tih hriat a ni.

 

Chuti chung si a, buai a han niha zirna chhunzawm theih loh a han ni dek dek a, an mi chhawr zirtirtute hlawh pêk tum miah lo leh pe duh lo an han awm nghalte hi chu, zirlai nu leh pa te hian mahni ţanghma hai reng reng mite hnena pawisa pêk belhchhah hi an bat lo ni teh reng pawh ni se, zahngaihna reng nei lova an zirtirtu chhawr an enkawl dan avang hrim hrim pawhin, Fee hi pe lo mah se, a awm ti fe fe an tam khawp ang!

 

Mizorama sawrkarna lo chelh tawh leh chelh mekte nep lutuk avangin hei leh chen hi, Pvt sikulte hian an duh dan leh lungawina zânin Mizoram nu leh pa an lo râwk tawh ţhin a. Anmahni khuahkhirhna dân pawh siam hlei thei lo sawrkar hnuaiah, beka thlantui far zawih zawiha zirlai nu leh pa te thawh chhuah an lo rût tawh ahnu hmanah, tun ang hun khirhah pawh 50% aia sâng lo Fee lak an la tum ţalh te, Pvt sikul hlun zinga 100% Fee lak tum an la awmte hi chu, Zoram hian dem ngam ila, kan tân malsawmna a ni zawk ngei ang.

 

Chhuanlamah Online ka kalpui an tihte hi bih chiang ta ila. Zirlai naupang aiin an chenpuite buaina thlen tamtu mai a ni zawk mek a. Nitina zirtirna kalpui ţhinna nena tehkhina, Fee lak nâna hman an han tumte hi nu leh pa te pawhin dodal nachâng hi hre ve teh se. Pvt Sikul-te hian thla 3 leh a aia tam Fee hi la lo pawh ni se, an tlakchhiat phah dawn chuang lo tih hi thu dik tak a ni tih nu leh pa te hian hria ila. Mi duhamte thuhnuaiah hei leh chen kan kun tawh hnuah hi chuan, mi duhamte duh dan tihpuitlin kawngah hian i phûr hurh reng lo ngam ve tawh teh ang u!