Vanlalsailova Tarmit

            Pi Lalsangzuali (Fam) hnu lamah, Zofate zinga lâr ber, mi en rawn hlawh ber, entawn nasat ber, ngaihsân hlawh bawk si, huhâng ngah tu nge ti ta ila, keia ngaihah chuan Vanlalsailova aia bûk rit zawk leh khin zawk an awm leh tawh chuang lo ang. A lârzia leh huhâng ngahzia sawina awlsam ber chu, YMA huaihawt thiltihah leh Zoram ţhalai pawl lian ber, KŢP-a miin amah an dawnsawn dan hi a ni. Kum 1995 leh a hnu lama lo piang ve dek dek rualin, chuti khati an han ti ve ngawt hi zawng, nu leh pa fing tak nei an ni lo tawp ta ve ang!

 

            Vanlalsailova Sermon aţanga Zoram Kohhran hlimthla lo lang hi a fiahin, a lungchhiatthlak hle a. A hma huna kan lo sawi fo tawh angin, Zoram kohhran hian mi fate hi piangthar tur chuan duh mah se, an pianthar hnu khawvelah erawh, zuk tel zui a, zuk ngaihven zui tumna tak tak a nei ngai lo. Zoram kohhran mi tam takte hi chu Davida’n, ‘An kâ chu ânchhe lawhna te, tihderna te, tihduhdahna tein a khat a’ a lo tih mi suaksual a sawina inhmeh zet zet hi kan tam mai a lo ni!

 

            Pathian thutak sawi chhuak hrâwk ţhin mite chirhthehna ram, thu dik hmanga tlangau ţhinte hmuhsitna ramah hun rei tak he zawn chhuah ram hi a kun tawh hnuah, lamţang reng reng an awm ngai dawn ta na nge maw, mi ţhate kâ aţanga siam ţhat tumtute sawiselna ri chhuak tinreng mai thla khawng ri, bengin a ngaihthlak ţhat ngam tawh loh hnuah, chau taka khumlaizawla mahni chauha khawhar taka âwrâwl chhuah ţhin mite chu Lalpa’n Vanlalsailova hmangin a rawn kän ta.

 

            A ngaihna reng reng hre lova kohhran selna, thinlung chhûngril bera cham reng ţhin, a tawpah Pathian thu châng nen lama chung sawiselnate dik sizia lo lang leh ţhin avanga, mite huat hlawh leh dem rawn ni tura miin ke a pen ţauh ţauh lai, a nuna engmah ei tur hmuh tur a awm chuan si loh avanga inthlahrunna nena tlangau lo thei si lo, miin an sawiselna hnaisailo tinreng screenshot nen lama hmuh tur a awm lai reng pawha, lâ khu ang maia chhûngrila mût reh thei si lovin a nawr kalte thlavang hauhna thawm lo ri chhuak ta hi a va mawi êm!

 

            “Tun lai mite rinna kawnga hma kan sawn theih lohna chhan, kan ngheh theih loh chhan hi, sawiseltu apiangte hmelmaah kan chhuah nghal ţhin zel vang a ni. Kan hla sakah, ‘Fakna hi kan tân thlemtu, sawi chhiatna erawh kan ţhian’ tiin tui êm êmin sa dual dual thei mah ila, a tak ramah erawh sawi chhetu leh min seltu apiangte hmelmaah kan chhuah leh hlauh thung si a. Kan hla sak hian kan nun a huaa, kan nun pawhin kan hla sak a haw bawk lawi si a nih hi” tiin, ţha leh fel inti êm êm Zoram kohhrante chuan Lalpa hnen ata chhuahchhal kan tawk ta a nih hi!

 

            A mak a ni, he thu ngaithlatu tam takte hian, tlawm takin, “Kan fel vang leh tlin bik vanga rawngbawl kan ni lo” ti ti mah se, anni aia sawisel hua reng reng ka tawng ngai si lo. “Thutak fa chuan thu a awih mai tur a ni. Tun lai kohhran hian beih a hlawh reng reng lo. Siam ţhat tumtu apiangte a ngaina lo a ni mai zawk! Kohhran rorêl leh thutlukna ţhenkhat, mipui aţanga sawiselna a lo awm hleka, ‘Kohhran nek nek hi chu an ro duh, an tluang duh lo’ lo tih fo chi pawh a ni lo” ti meuhin Lalpa chhiahhlawh a rawn au ta.

 

            “Theihtawpin mipui lam aţang pawhin siam ţhat tumin kan che ve a. Chu chu min ngaina lo a ni mai. Nek thiang lo kohhran pawh a ni lova, kohhran leh ko hrangtu pawh a intiat bawk hek lo. Mihring rorêl famkim lo lai apiang sawi chhuah hleka, ‘Kohhran i nek’ intih leh ringawt ţhin mai” tiin kan nihna ang khawl khawlin hriattir kan ni ta a. Mahse, Inrinni zan sermon ka tlipna ang bawk khan, mi fel rual awmkhawm, sawisel ngai thei reng reng lote chuan, siak lawr tutin mahni insawi fihlimna tur an hre leh tho ang!

 

            “Thutak sawi kawngah pawh rawngbawltute huaisen a ngai ta. Kohhranin min rawih nawn duh tawh loh hlau reng reng hian, thu kan sawi tlawr hluam ringawt zel a. Pathian aiin kohhran hruaitute kan lamţangah siam kan tum tawh zawk a nih hi. Anni nena inrem taka kan inthlah haw chinah tawh chuan, kan lung a awi haw ringawt tawh mai! Zahthlak, zahthlak! Sim rawh u!” tiin, he darthlalang zet hi chu a fiah tluk zetin, a hmai hmaah lan fiah mawi tum ngial pawhin, thei lo tur rawngbawltu an va tam ta êm!

 

            “Rawngbawlna hmuh loh hlau reng renga, kohhran hruaitute tlawn dui reng chunga thu sawi sawi tak mai chu!” tihte hian kan rawngbawltu tam zawk hi kai harhin, kan ramah hian kohhran tinah thutak sawi a nih hun a va nghahhlelhawm ta êm! Thuhriltuin a ding lama ţhute mitmei veng reng renga thu an sawi hmêlte hi en a ninawm zozai rei tawh lutuk a ni e. Lalpa chhiahhlawh huaisen chuan, “Hetiang thu sawi hi Lalpa’n a duh lo! Thutak au pui ngam mai rawh u” a ti ta hmak hmak a nih hi.

 

            “Thingtlang khua in 150 vela Upate ngam hle a, huai tak taka thu sawi ţhin, khawpuiin an ruai ta maw tiha ngawi leh hmûn, nui dui reng ringawt maite hian kan ze khelh a tilang chiang lutuk! Tu tân nge i thawh?” tih zawhna chhang ngam rawngbawltu apiang Lalpa’n Thlarau Thianghlimin a awmpui zel tawh ang. “Miin siam ţhat hna an thawh chu, chhel takin tuar ila, dawnsawn tur dawngsawngin, sim tur chu sim ila, rawng kan bawl chhan Krista thisen hi zahin, he thutak din chantir tur hian ţan ila tlâng zel zawk ang u” tih sawmna hi rawngbawltute hian chhang thei vek ni se, Zoram Thar a lo thleng mai lo’ng maw?

 

            “Sawiselna dawnsawn thiam avangin tunah chuan, sam pawh kan khuih pial ve thei ta. Kekawr kap fual pawh a lo chhing ve ta. Zai dan kikawi lutuk pawh a lo mam zo ta. Min sawiseltute hi hmelma angin ka thlir ngai lo” titu hian, rinna kawnga fak hlawh tawh, Rev Chanchinmawiate leh hranghlui mi huai kaltate hnung a rawn dawl ta a nih hi. Tu nge a ruala ke pen ve ngam rawngbawltu lo pen chhuak dawn? “Isua thihnaah kan lawma, a thawhlehnaah hlimin, a thutak lakah erawh kan hël lawi si” tiin kohhran chanchin puana awm hi tu nge a dik lo tingam ta ang?

 

            “Pathian thu hril, rawngbawlna aia eizawnnaa ngai ta kan tam lutuk!” tia Pathian thinurna lo irh chhuakte hian, kohhran ban pawimawhte hi a kai harh thei dawn em le? Vanlalsailova ngei hi, a rawngbawlpui leh ţhiante chuan, zep nei miah lova a thu sawi ang hi a sawi an hlauhthawnpuia, an venpui hial nia! Mihring ngaiha kawng dik niawm taka lang zawhtu mai an nih avangin, Lalpa Thlarau chuan an thu a va zawm lo chiang si êm! Pathian pawi sawi ai chuan, mahni mihringpuite pawisawi hlau reng renga rawngbawltu hi an va tam ta êm!

 

            Paula’n Galatia mite hnenah, “Mihring tihlawm nge ka tum Pathian tihlawm? Mi zinga tlaktlum tum ka ni em ni? Ni ila, Krista bawih ka ni lo ang” a tihte hian kan rawngbawltu tam zawk chu a hneh zo tawh lo a nih mek hi. ‘Zoram kohhrante harsa tih ber chu tih kher kher hi a ni!’ tih a ni leh bawl bawk! Mi ti kher kher Pathian bia, a rawn pian duh dan, rawng a bawl ţan duh dan, zirtirte a thlan chhuah dan, thihna kawng a zawh tur a thlan fet dan zawng zawng hre duh lo Zoram Kohhran hi, Lalpa hian ti kher kher nuna hruai luh a duh tlat a ni!

 

            Ngaihnathiamna leh hriat thiamna nun nena hei chen, kan ringtu nun kan lo kal liampui tawh hnu hian, kan thlen chinah ram a buaia, eirûkna a hluarin, khawi hmunah mah bûkna dik hmuh tur a awm tawh lo! ‘I lum loha, i vawh hek loh avangin ka kâ ata ka chhak chhuak dawn che a ni’ tia Thupuan-a kohhran a vaukhan kha kan ni tih kan inhre duh lo a ni!

 

            ‘Kan ram ţhanmawhbawk, eiru phate eirûkna khawvela eirûk pawh ni lo, ei lan pawh zak tawh lote sapatalna khawvelah hi, keini’n Pulpit tlâng aţanga kan hrawk tuarh tuarhnate pawh hian a tikhur zo tawh lo a nih  hi! Hawh u, Lalpa hnenah a huhovin i thlen teh ang u!’ tih hi kan damna tur niin, kan ti ngam ang em?

 

            A tam zawk hi chu tlanchhe sa nghal kan ni! Kohhrana Pathian ni inkhawm hmaih ngai lo zingah pawh, he rawtna duh lotu hi a tam zawk kan ni bawk ang. Chutih laia, kan ramah Harhna a lo thleng ta, la tikawisawi ngamte hi chu zah a hun ta! Harhna ni lovin Simna a ni Lalpa’n Zoram Kohhran lakah hian a phut zawk chu ni!

 

            ‘Kan duh apiang min pêk laiin, Simna erawh kan duh lo a nih hi’ tih hi Sailova kaltlanga Lalpa thu chhuak chu a ni tlat a ni. ‘Sum tichingpentute hian simna kutkawr bun ngam ula, retheite chanai ei ţhintute leh dawt sawi hmanga inphen chingte pawhin simna hmaikawr vuah ngam rawh u’ tia min sawmna chhang ngam hi, kohhran tin aţanga chhutin, 10% pawh kan awm ang em ni?

 

            ‘Taksa damna hi kan ngai pawimawh êm êm a. Taskforce thu kan awih êm êm a, a dam pawh kan dam. Taksa him nâna sawrkar thu kan awih tiat lek pawhin Pathian thu hi awih ila, kan dam mai ang’ tih hi Lalpa thu a va ni chiang êm! Nl Mimi-i kaltlangin kan kawtthlerah Simna lo au te chu, mi tam tak hmuhsit leh endawng hlawh a nih mek laiin, Vanlalsailova kaltlangin, Pathian thu a nihzia hriattirin kan awm ta e.