Ram pum Harhna hmelhmang kan hre lo a ni lo maw ?

            Kelkang Harhna kan tih kha, Harhna lian tham thleng hnuhnung bera ngaih a ni nangin, kha mi kum kha Mizorama thubuai ziah luh hnem ber kum zu ni tlat a! Faktea hun ata tawh kan ramah Harhna a lo thleng kan tih reng reng hian Bible ka lo en ve zel a. Bible-in ram pum Harhna a sawi ang hi a lo thlen awm ka hre ngai lo!

 

            Han chîk ve ta la, kan rama Harhna kan tih changtute hi, mi ngaiha mi hnuaihnung leh mi vantlâng deuh hlir an ni zel a. Frederick-a a lo lan pawhin, tihdam rawngbawlna hmun pantute chu nu berh tê tê, khual khaw hla taka mite leh damdawi in lama inenkawlna nei lo mi chhia kan tih tur ang hi an tam ber zel! Rawngbawltu leh Berampute an Harh hriat a ni ve ngai tlat lo!

 

            Zawlnei Joel-a en ta ila, “Chaw nghei hun serh thianghlim ula, inkhawmpui urhsûn tak ko rawh u…” a ti te te a. Chuta lo kal turte chu mipui zawng zawng, pitar putar aţanga nu hnute tui hne lai thlengin koh an ni. Mahse, heng mite chungah hian Harhna changtu tur mi pawimawh an awm ta tlat zel a nih hi. Ram hruaitu leh rorêltute’n Harhna an chan hi Lalpa’n ram dam nân a phut tlat a ni!

 

            “Puithiam, Lalpa rawngbawltute chu hulhliap leh maicham inkârah chuan ţap sela, ‘Aw Pathian, i mite zuah la…’ ti rawh se” tih a ni tlat a ni! Hosea’n, “Inthawina duh lovin, khawngaihna ka duh si a” a tih awmzia pawh, “Inkhawm tlut tlut ni lovin, thinlunga midangte khawngaihna nun in neih ka duh zawk” a tihna a nih hi!

 

            Tun hun thim kan hmachhawn mekah pawh hian, kan Puithiam leh Berampute Harh thawm hriat tur a awm leh chuang lo! Harh tum ai chuan, an thuchhuah han en hian, inkhawmpui urhsûn leh thil hlan bawk a ni an buaipui ber chu ni! Bethel khaw puithiam Amazia, Zawlnei Amosa hektute ang hi kan kawl furin ka ring tlat!

 

            A nih leh kan rama rorêltute leh puithiamte suahsualna chu eng nge? Zawlnei Mika chuan, “Thil ţha lo tih nân an kut a themthiama, hotute’n phut an nei a, rorêltute’n thamna an ngiata, mi liante’n an duhsam sual an hrilha, an thurual tlâng a!” tih hi a ni.

 

            Hetiang mi hi an nih tlat avangin, Habakuka chuan, “Dân thu chuan kori a tu hlei thei lova, rorêlna thu a chhuak ngai hek lo” tiin kan ram chanchin a lo sawi phah tak hial ni! No 4 zuar a piangthar, zu zuarin a zu zawrh a sim ta, damlo an dam ta, tih thawm kan hriat mawlh mawlh lai hian, puithiam leh rorêltute’n sual simin Lalpa an au ta, tih thawm erawh kan hre ngai lo!

 

            Chuvang tak chuan, Zephania pawhin, “A rorêltute chu tlai lam chinghnia an ni a, a zawlneite chu pawlawh leh bum hmangte an ni. A puithiamte’n hmun thianghlim chu an tibawlhhlawha, dân chu an bawhchhe nasa a ni” tiin Zoram min chhuahchhal phah tak hrep hi!

 

            Ngaihtuah chiang rawh! Hagaia’n, “Tam tak in chinga, tlem tê in seng si” a tih hi Zoram kohhranin thlarau bo man kawnga a hlawh chhuah chu a ni mek a. “In thawh chhuah zawng zawngah rona, ngêtna leh rialtein ka hrem che u a; mahse ka lam in hawi chuang lo” min tih phah ta hial zawk a.

 

            Zoram rorêltu leh berampute hian kohhran mite hi Harh se an duh viau rualin, anmahni lam zawk erawh Harh turin, Lalpa hmaah an puan ni lo, an thinlung an thler duh si lo a nih hi. Jeremia’n, “Ka mite hliam chu ngaihsam takin, ‘A ţha alawm an ti a’ an ţha hauh si lo” a tih tluk chauh kan lo ni.

 

            Kan ram hi kan Harh dawn a nih ngai chuan, rorêltu leh berampute hian hma an hruai zet a ngai a. Chu chu Pathianin a phut leh a duh dan pawh a lo ni e.