Sipai za hotu mak tih êm êm ka nei a !

            Zawlnei Isaia’n dawt reng a sawi lo, tih a lo lan fiah theih nân, ‘Jentail-te Galili chu! Thim hnuaia ţhute chuan ênna nasa tak an hmu a, thihna hmun leh a hlima ţhute chungah chuan êng a lo chhuak ta’ a tih ang takin, Lal Isua khan a rawngbawlna kha Galili ramah a rawn ţan ta a.

 

            Galili hmuna Lal Isua che zet chu a thawm pawh a nâ ngiang reng a. Damlo tawh phawt, thla êm ât thlengin an dam ta biai mai a nih kha! He Nazareth tlangval thawm hi, Tv Frederick-a’n tihdam rawngbawlna a rawn ţan a, a kawr chung hak ringawt an deh pawha damna chang an awm ta nen khan, ze khat, chhûl khat chhuak an nih avangin, Zoram mipui pawhin kan sawi luai luai reng a nih kha.

 

            Galili aţanga hla lo tê-ah chuan ram pakhat, Kapernaum khua a awm a. Chu khaw awp tura Rom sawrkar-in sipai hotu a dah pakhat pawhin Nazareth tlangval chanchin hi lo hriain, an khua a rawn pelh hun tur hi, tlumtea thlir takin a lo thlir ve reng a. Theipui kunga lawna, Lal Isua lo lan hun Zakaia’n nghakhlel taka a lo thlir aia a duhthawh lohna bik a awm lo.

 

            Lal Isua’n Kapernaum khua a rawn thleng ta tih a hriat ve leh, rang takin he Rom sipai rorum tak hian tlawm leh zah pawh dawn lovin Lal Isua hi a pan ta râwih a. A chhan pawh a fapa a zeng tlat a, nasa takin tinatin a awm ţhin vang a ni. Mahse, he sipai za hotu hi mi danglam tak a ni ta tlat mai a ni.

 

            A in chhûng tak ngial pawh Lal Isua ke nghahna tlakah a ngai lova, Nazareth tlangval hnenah chuan thu a sawi ta zawk a. Ka hnuaiah sipai an awm a, thu ka pêk apiang an ti ţhin. Ka hnuaia awm apiangte chu, ‘Lo kal rawh’ kan tih leh a lo kal a, ‘Ti rawh’ ka tih pawh an ti mai ţhin, tiin Isua hnenah a sawi ta a!

 

            He thu tawi tê a sawi, thûk leh ril êm êm si hi a awmzia Isua’n a han man chianzia mai chu! Heti hian a sawi chhuak ta hial a nih kha, ‘Israel-te zingah pawh he mi ang reng renga rinna nasa hi ka la hmu lo!’ tiin! He sipai za hotu thu sawi awmzia chu hei hi a ni :

 

            Natna tinreng chungah hotu a awm a. Engkim chungah thuneitu a awm bawk. Chu miin ti rawh a tih chu tuma hnial theih a ni lo. Chu mi chu Pathian bak a ni thei lo, tih kha he sipai za hotuin Isua hnena a sawi chu a ni a, Isua pawhin a thu sawi chu a awmzia hai lovin, ‘I rin angin i chungah lo thleng rawh se’ a ti ta a nih kha!

           

            Keini chu kan ni ve lo a nih hi ti rawh u. Vawi tam tak Fakte-a, Mimi-i, Pu Vala, Loncy-a, Frederick-a leh mi dang dang kaltlangin, Lalpa hi engkim chunga hotu a nihzia kan lo hmuin kan lo hriatpui tawh ţhin. Tihdam theih loh Cancer tihdama awmin, nausen thi tawh pawh tihnun leha a awm chung pawhin, kan rinna chu a ţhang lian thei chuang lo!

 

            Hei vang hian a ni Isua pawh khan heti hian sipai za hotu awm lai reng khan tih tak ni, ‘Chhak leh thlang aţangin mi tam tak an lo kal ang a. Abrahama, Isaka, Jakoba te hnenah an ţhu ang. Ram fate erawh chu pawn thimah an ţhu anga, tah chuan ţah leh ha ţhial a awm ang’ a lo tih tak ni!

 

A châng chauh hi chuan…

 

            Mipui sawrkar, ngaihtuah ngah êm êm leh hman lo bawk si hian theihtawp chhuahin, thil thleng hrang hrangah ruahmanna siamin, hmalakna nei ţhin mah se, khawi maw lai laiah fel hlel leh tih dik loh a nei leh nge nge ţhin.

 

            Hah rimtawngna hnuaiah thuthlukna siam sual a nei fo a. Thu lakna hnâr (input) dik loh vangin thil a tisual ve thei ţhin. Chutiang hun a lo thlen chuan, anmahni thlang tlingtute an chet hian, Democracy nihna a lo lang ţhin.

 

            Mi hang zinga US President ni hmasa ber, Barack Obama khan, ‘Tih tak takah chuan, mipuite’n sawrkar hi an ngaihven tak tak a nih chuan, sawrkar ţha leh hruaitu ţha kan nei nge nge zel a. Democracy rama chengte kan lo thatchhiat zawha, dân lo anga kawng awlsam zawk kan zawn erawh chinah, sawrkar ţha lo tak lo awmin Politik pawh a bawlhhlawh ngei ngei ţhin’ a lo ti reng a ni.

 

            Chuvangin a châng chuan sawrkar hi ben harh fáwk a ngaih châng a awm ţhin a. Chutiang hunah chuan kawlawm thaitute hi mite dem hlawh an ni duh fo. R. Vanlawma achin, Revd Chuauţhuama thlengin,  kan ramah hian ziaktu dik leh huaisen nih ngam hi, hmar arsi ang pheuhin an lo lang zeuh zeuh ta chauh a!

 

            Ka hlauhthawn ka sawi lawk, panhnah leh kuhva lakluh a ni tawh dawn lo a. Ramri uluk zual zawka ven a nih mai bakah, lirthei pawh Dist mamawh mil zela lo lut tawh dawnin, lirthei leh bungruate pawh damdawi bawlhlo hmanga phuh hmasak vek tur, tih a ni ta hi a lawm ber zinga mi ka nih ka ring.

 

            A châng chauh hi chuan ât ngam a ngaih hun a awm a. Tlawm zawka ţan thiam a ţul hun a lo thleng bawk ţhin. Kum 15 chhûng thu ka ziak chhûng hian, ‘Pathian leh a thupêk chiah hlau rawh’ tih hi ka thupui a lo ni tawh a, a la ni reng bawk ang.