𝐆𝐫𝐚𝐦𝐦𝐚𝐫 𝐤𝐚𝐧 𝐥𝐨 𝐭𝐡𝐢𝐚𝐦 𝐟𝐚𝐦𝐤𝐢𝐦 𝐥𝐨 𝐚 𝐧𝐢 𝐳𝐚𝐰𝐤 𝐥𝐨 𝐦𝐚𝐰 ?

            He thu ka’n thai dawn meuh chuan, kuang lo nawr chu sawi loh, naupangin puitling leh upa te thu leh hla lo kalh ve tum hrangah ka inngai hial a. Mahse, heng kan û zawkte leh pute khawvel kha, tun lai khawvel hian a luahlan hneh tak êm avang zawkin, ţhalaite khawvel chuan a hriat loh hriat tuma a beihna kawngah, upate khawvel a nêk sâwk sâwk zel tih min hriatpui ka ngen ta a nih hi.

            He mi thuah hian kil tin hawl kual tur ka neih laiin, chanchinbu emaw lehkhabu lama chuang tur nia ka hriat loh avangin, sa tî khêl buai chiam lovin sa ruhkawlah i bur nghal châwt mai ang. Pu Buchhawna aţanga PC Thangzikpuia Grammar Bu thlengin, Mizo irawm chhuak Grammar lehkhabu 10 chuang a chhuak tawh a. Thangzikpuia hma lam zawng lehkhabute hi, chhul khat chhuak ang an ni.

            A chhan pawh hnam dang, a bikin sapho Grammar bu leh kalphung (Preposition aiah Postposition tih loh) ang deuha Parts of Speech awmzia, a mal te tea an nihphung, hman pawlha an nihna, thumal khat nihna ngaihtuah lova ziah zawm leh zawm loh tur dân zam chungchang thute an nih vek avangin, chhul khat chhuak han ti pawh ka ni a.

            Thangzikpuia erawh chuan heng zawng zawng bakah, kan ţawnga mi tam tak buai rûkna, thumal ziah zawm leh zawm loh rel fel kumkhua tawhna turin, Grammar kalphung thar a rawn vawrh chhuak ta bik a. Chu chuan Elizabethan Era aţanga Romantic, Medieval, Renaissance Era etc-a kan lo hmuh ţhin, Mizo thu leh hla huangah ngei pawh kan hmuh fo, ngaihdan thar ngaihtheih lohna a rawn harh thar leh ta niin alang!

            “Grammar awmzia chu : Mihring taksa peng hrang hrang, chhûng lam leh pawn lam, mit lawnga hmuh theih loh timûr, natna hrik thlentu Virus thlenga an nihna hriat chianna aţangin, mihring nihphung dik tak, mi hrisel nge mi bäwrh, a khan sâng nge a hniam chi, a cher tur nge a thau chi, a chal kawlh zawng nge hmulphurh ngah chi tih kan lo hre thei ang hi, Grammar chu a ni e.

            He Grammar sawi fiahna aia chiang zawk kan sawi theih chuan, mi tin hmuh turin tarlan ni ta se. He mihring taksa peng tin kan tihte hi, Grammar-ah chuan Parts of Speech an lo ni ta a. Heng PoS hriat chianna aţang chauh hian, thumal ziah zawm theih leh ziah zawm theih loh pawh, awlsam takin chhut theih a lo ni ta mai a ni. Chu taka chu Thangzikpuia Grammar Dân rawn vawrh chhuah chu a ni ta a ni.

            Literature huanga Prose bika hman tur Grammar chu, heng PoS leh mala thumal an zuk sawi fiahna chu a ni ta a. Mi tam takin kan hriat loh erawh chu, Poetry hian he PoS Grammar bakah hian, Grammar of Poetry a nei hrang leh zel tih hi a ni. Chu chu hun danga sawiah khêk ta ila. Chu Grammar of Poetry kaltlanga Poetical License kan tih takah hi, Prose lama hman tura duan erawh a ni ve lo niin ka hria.

            Tichuan, kan thupui awmzia ni ta chu, tun hma lama Grammarian kan neihte khan, thumal tin awmzia aţanga thu awmze nei lo chhuah dana hi an hre fuh tawk lovin, an thlir pha lo a ni lo maw, ka ti ta a ni. Chu bakah Thangzikpuia Grammar rawn vawrh chhuah hre thiam chiah lo, Noun thumal pakhat nihna kha, a dawt chiaha thumal azira ziah zawm leh zawm loh a sawi man lo fê fê an awm niin alangbawk.

            Bungbêl thumal hi lo thlir ta ila. Bung leh Bel hian inlaichinna an nei hauh lo. Bung kan tih hi thingzai bûng a ni lo, bêl erawh kan hria. Mahse, kan ţawngah bêl aiin bung zawka hi thuneitu zawk a nih miau si avangin leh, amah chauha awmze nei a nih miau loh avangin, thumal pahnih belhkhawma Noun thumal awmze nei lo piang Bungbêl chu, ziah zawm ngei tur a ni.

            Mahse, inhnialna tichhuak tam êm êmtu Ruahsûr-Ruah sûr hi lo en ta ila. Ruah chu amah mai pawhin eng nge a nih kan hria ang bawkin, sûr awmzia pawh ka hria. Noun thumal ruah kha Verb sûr hian awmze hran daih neiah a chhuah lo chang ni lovin, an pahniha kaihkawpa thumal awmze lo chhuak ta pawhin, ruah nihna an kalsan chuang loh avangin, ziah zawm loh tur, tiin a rawn tlângau ta mai a ni.

            Thangzikpuia hian thumal tin nihnate a han chhui chiangin, PoS-a an nihna sawi chat chat chung zelin, a ţanhmun tinghehna turin entirna fiah tak min pe thei zel a. Chu a ţanhmun chu Grammar khawvelah, tih ţhan dân, khawtual dân tih hmanga paihthlak theih ni pawhin alang tlat lo. He ngaihdan a rawn vawrh hi Grammar dânah a dik lohna emaw, a aia ţha zawk leh fiah zawka duan chhuah hi kan mawhphurhna ni zawkin alang.

            Mi pakhat chauhin Mizo Grammar dik a duang chhuak thei bik lo a. A siam famkim thei bik bawk hek lo. kan thlah lo kal zel turte tân leh, nakinah pawh ţhangthar leh zualin Mizo Grammar dik a lo pian chhuah dan an thlir huna, ngaisâng tak leh chhuanawm an tih ngeina tur zawkin, a huhova Mizo Grammar puitling kan neih theihna tura thawhho thiam zawk i tum hram ang u, ka han ti a ni e.