Utopia

 

Khawvel zawn ţhin; Zo-khawtlang nun duhawm ber chu !

 

(Pathian hriat hma hauha Pathian thu zawmtu Zofate!)

 

He khawvelah hian mi tam takin ram pakhat, duhthusam ang thlapa nuam leh khawtlang nun duhthusam nunpuina ram an lo zawng tawh ţhin. Chu khawtlang nunah chuan inhauna, inhmelmâkna, thlei bik neihna, nunphung inthlau, rukrûk leh mi rawk chinna, eirûkna leh suahsualna reng reng awm lo tur angin an suangtuah ţhin.

 

Hun liamtaah kalin hun ral tawhah i han kir leh dawn chhin teh ang. Ka pi leh pute kha an hausa lovin an changkang lo va. Tuma tlawhpawh loh ram pilril berah chengin an khawsak a hniam em em. Mahse, chhûngkua leh khawtlang nun inrelbawlna kawngah tuma tluk rual loh, Bible-in nun dan ţha a sawi ang zawng zawng, a taka hmangtute an lo ni tlat si lai hi a ni, mak ngawih ngawih chu! 

 

Kha hnam, rinawmna kawnga inelna thianghlim nunpuitu, thingfaka in do, mi lian leh tê inthliarna awm lo, pachhia leh fahrah chhawmdawlna etc ang khawtlang nun kha he khawvela mihring an lo pian achin khawiah mah hmuh leh hriat tur a la awm ngai lo! Biblea vaukhanna leh thufing, vantlang nun dan tur inziak zawng zawngte hi bible an hmelhriat hma hauha zawmtu leh kengkawhtu an nihna kha engvangin nge tun thleng hian chhuichhuah a la nih loh chu le?

 

Zofate Utopia-ah chuan khawtlang nunah invawnna fel tak a awm theih nân mi tinin aia upa an zah thiamin an thute pawh hnial enah an en ngai lo. Chutiang inkaihhruaina chu Mosia khan Israel fate hnenah Lev 9:33-kaltlangin, Lû-a kelsam \ote hmaah chuan i ding zel ţhin tur a ni a, tar hmel chu i zah tur a ni a tiin a lo sawi daih tawh a. Khawtlang nunah mi tumahin \awngkam feikibâr, thinkhei zawng leh in\awngelna a awm loh nân; ţawngkam ţhain sial a man, an lo ti diam a. Solomon-a pawhin he thu vek hi Thuf 12:14-ah miin a ţawngkam chhuak rah chu a seng ang a, ama kut thiltih ngei chu a hnena hlan a ni ang, a lo ti daih tawh!

 

Kan pi leh pute kha sa leh râl beia khawsa ta reng reng kha ni mah se, mihring hmelma lian ber chu tu a nih an hai hauh lo. Chuvang tak chuan; Mihring hmelma ber chu mahni a ni, an tih laiin Lal Isua chuan Mat 10:36-ah mi a hmelmate chu ama chhûngte zinga mi ngei an ni ang; tiin a lo sawi diam tawh a nih kha. Kan pi leh pute’n kan mi huat zawngte pawi kan sawi loh nân; Mi anchhe lawh chu mahni chungah a tla duh ngai e, an lo ti ţhin a. Mosia pawhin Lev 20:9 kaltlangin; a nu emaw, a pa emaw anchhe lawh a ni a, a chungah a thisen mawh chu a awm tur a ni, a ti leh zel a.

 

Kan pi leh pute khan mi nupui khuaikhem kha thil mawi lo leh tenawm a nihzia hriain vaukhanna thu; Uire chu sakeiin a seh duh an tih lain Mosia pawhin Lev 20:10-ah mi nupui uire, a \henawm nupui uire chu, a uirepa leh a uirenu chu tihhlum ngei tur a ni, a lo ti hmiah bawk. Kan pi leh pute khan nu leh pa an chawisângin an zah thiam hle a. Nu leh pa pawisa lo ding chhuak an vâng hletih thufing an neih chu Kol 3:20-a; Naupangte u, engkimah in nu leh in pate thu zawm rawh u, chu chu Lalpaah chuan a lawmawm si a, a tih nen angkhat reng an lo ni l h a.

 

Lo leh huan neia ei zawng an nih avangin ramri fel tak kha an nei thlap ţhin a. Mahni ram ni lo pui neih tum chu thil mawi lo tawp a nihzia hriain; Huan mawngtawlh chu nu thihna, ramri sawn chu pa thihna an lo ti diam a.  Duet 19:14 kaltlangin he thu vek hi Mosian Israelte hnenah, LALPA in Pathianin luah tura a pêk che u ram, in luah tur rama a hmaa an lo phun tawh in ţhenawm ramri chu in sawn tur a ni lo. A ţhenawm ramri sawntu chu ânchhe dawngin awm rawh se, a lo ti tawh a nih hi.

 

Kan pi leh pute bawk khan thufing deuh mai neiin; Kawi pawh a kawm a ţhat chuan a rah a \ha, a kawm a ţhat loh leh a rah a ţha lo, an lo ti ţhin a. Kan Lal Isua pawh khan Mat 7:17-ah; Chutiang bawkin thing ţha apiang a rah ţha ţhin a; thing chhia erawh chu a rah chhe ţhin, a lo ti diam tawh a nih hi. Thufing dang hman uar tak an neih; Sunhlu kungah thei dang a rah ngai lo tihte hi Lal Isua’n Mat 7:16-ah Hruihlingnei kungah grep rah an lo ngai em ni? Lenhlingah pawh theipui an lo ngai em ni? a tih an entawn a ni hran chuang lo!

 

Tin, khawtlang inawpna a ţha ang bawkin hringnun awmzia an man hle a. Thu fing tak tak hmangin an nun kha an thunun ţhin. Khawchin leh nau chin a hriat loh an an han tite hi Jakoba 4:14 hian a entawn ta em ni zawk tih mai turin; Naktukah chuan engnge lo awm dawn in hre si lo, a lo ti ve leh zel a. Tin, mahni mihringpui biak chhiat loh inzirtirin; Lampui chang khatah mi an be chhe ngai lo an tih erawh an entawn phak rual loh tur Gen bu a; Kalkawngah inhau lo tûrin fimkhur rawh u, tih nen hian angkhat reng an lo ni.

 

Solomon-a khan Thuf  27:15-ah; Khawcheng leh hmeichhe an hmang chu angkhat an ni; chutiang nu chu in khap bet thei dawn em ni? a tihte hi kan pi leh pute pawhin fel takin; Khaw cheng ngeu nguau leh nau \ap meng ker kur chu thlem ban theih a ni lo an ti a. Thuhnu dawn takin , Jak 4:1-in; Chutichuan, “Lalpa’n rem a tih chuan kan dam ang a, chu mi kha mi kan ti ang,” a lo tihte hi; Khuanu’n zah a ngai ang a, kan tihlawhtling thei mahna an tiin an sawi ţhin.

 

Lo nei mi kan niin ram kan chhuahin tuihal leh rilţam chang a awm ţhin a. Chung hunah chuan mi lo-ah kan kalin lo-a ei leh in theih kan ei mai ţhin. Mahse, mi thlai thar leh ei theih kha phurh haw erawh a rem lo thung a. Chutiang bawk chuan Israel fate khan, Lev 23:24 kaltlangin; In \henawm grêp huana in kalin in duh tawkin in ei thei a, amaherawhchu in emah in khung tur a ni lo, an lo inti ţhin.

 

Solomom-a’n Thuf 27:10 kaltlanga; Lamhla taka unau aiin lamhnaia ţhenawmte chu an tha zawk, a tihte pawh hi; ţhenawmte hi kan chhûngkhat an ni ngai e, tiin pi leh pute khan an lo sawi ţhin a. Mizovin; ţam tawk apiang a tui an tih lah Solomon-a vekin Thuf 27:7-ah; Mi rilţam tân erawh chuan thil khâ zawng zawng pawh a tui a lo ti lehzel a.

 

Thenawmte hlutzia hriaiin; ţhenawmte do aiin khaw sarih do a thlanawm zawk, an lo tite kha Thuf 14:21 chuan;            Tupawh ţhenawmte hmusit chuan thil a tisual a ni, a lo ti ve leh zel a. Mikhual thlen chungchang thlengin; Mikhual hnenah engtikah nge i hawn ang ti lovin, eng chen nge i la cham ang ti zawk rawh, an intih hi Paula chuan Heb 13:2 kaltlangin; Mikhualte chungah hmangaih chhuah theihnghilh suh u; chutiang tiin ţhenkhatte’n hre lovin vantirhkohte an lo thleng si a, a lo ti dim diam tawh a nih hi!

 

Chuvangin kan pi leh pute khan Pathian thu an hriat hma hauhin Pathian thu an lo zawm dim diam tawh a. Khawtlang nun duhawm ber hnuaiah nun an lo hmang liam tawh ţhin a lo ni. Engvangin nge Kristian kan nih hnua heti tak maia kan nungchang a khawloh zawh taka kan nun suar ang a chim tak mai tiin mak ti takin he thil hi ka ngaihtuah ta vawng vawng mai a. Ngaiteh, a ngaihna reng hriattirin ka awm si lo! Khawi aţangin nge heng thute hi an lo inzirtir tih ngaihtuahna erawhin thil tam tak min ngaihtuahtir lo thei lo a ni zawk e.