Hmangaihna Tuipui Fawn

(Forgotten Memoirs)

          Chu hun dangdai tak, leilung mawina leh duhawmna zawng zawng an tualchai hunah chuan; Thla chu tuipui kotlang aţangin muang fân raihin, vanlaizâwl pan turin khawvel pang leh lama a chawlh hahdamna hmun ata a rawn chhuak páw pheu a. Mitin a thlir phak chin tui thûk tak, dum kûk mai chu êng zùng hrang hrangte’n mawi takin an rawn chhun harh ta a!

       Ni thlârin tui fawn a chhun ên sep septe chu, bung hrang hrangah inţhen darhin, hmuhnawm êm êmin tuipui zau takah chuan an fawn darh ta siau siau mai a. Tui thûk lam pana tui fawn phei thliah thliahte chu êng zùng, râwng hrang inpawlh chiatte’n inchawih taka an chei laia khawvel mawina chu, mihring ţawnga sawi chhuah thiam rual loh khawpa hmuhnawm a ni. 

        Chu hun duhawm zual lai tak chuan; Ni pawh chuan kâwlkil tawp atangin min mangţha ve niawm takin, vawi khat chu a êng a rawn chhuah leh zuai a. Kâwlkil tawp aţanga vanlaizâwl thlenga van inkhawh chhuak chu, van kawngkâ rawn in hawng aţangin Siamtu ropuina leh mawina an rawn luang chhuak ta emaw tih mai turin, râwng sen, a sendâng leh a engte’n an pawlh ta chiat a!

        Tuipui fawn velte pawh chu râwng var, tle sep sep angin hmun tinah an in kap darh ta séng séng a. Kâwla ni thlâr lan dang danglam ang zelin, tui fawn lan dante pawh an in thlak danglam chhawk ta a. He huna Siamtu’n râwng chi hrang hrang a siamte’n, ngaihnobei taka min awmtlei dan leh ka mit hmuhna min rûksak vek dan chu sawi fiahna ţawngkamin a  sawi fiah zo mawh lo!

        Leilung siam tirh, hun bul inţan laia Siamtu’n a thil siam tinreng, lungawi taka a duhthusam an nihzia min hrilh ang mai kha a ni ta ve ang! Tichuan, ni pawh chu kâwlkil pang leh lamah hahchawl tawh turin, muangchangin a tawlh liam ta riai riai a. Darkâr khat lek pawh khawvelin mawina a hloh ngaingam lo niawm takin, zan lalnu duhawm ber chuan a zawlpui ni liam ta ai a rawn awh ta thuai a.

          Vanlaizâwl panna kawng zawha a êng no chék mai chu, nula duhawm takin lemchan dawhsâna ke a chhep ang maiin, a nozia sawi fiah thiam chi a ni lul lo! Zan boruak chu remna thlifimin a rawn tuam chho ta nghal bawk a. Arsite chuan ri mawi chhuah si lovin, an ênna kaltlangin thlain vanzâwl a panna thlasik ţumkawngte chu an lo kâp de neuh neuh a, vanzâwlah lam an thai tlang ta!

         Chu zan hun hriat reng hlawh tawh turah chuan, tlâng chhipa phul hmun zawl duaia ka âwm nghengtu hmeichhia chu, duat takin ka kuah nghet sauh a. Ka hmui pianzia nena inhmeh kumkhua tura Siamtu’n a bik taka mi siamsak nia ka hriat, a hmui kual no tak ka han fawh laite chuan, arsite chu lo hnai thar ta riau hian ka hria a. Van pawh chu ban phak maia hnaiah a rawn inhnuk hniam niin ka hre ta hial a!