Lingering Memoirs

       A hun thu hlaah chuan Favang hun nuam takin thlasik lam pana a hun a singsak lai vel niin boruak pawh a vawt nuam ţan khawp mai.

        Tlai lam niin kan piahah chuan Reiek tlang a cham phei duai a. Kawt zawl, phul hring cham diai chunga kan lên laia ngaihngam taka ka kawnga min kuah a, ka dara muang taka a lu nghattu chuan lung a tiawi hliah hliah mai a ni.

        A ţawng sep septe chuan daifimin phaitual hnimte hnena an mamawh a phuhruk sak ţhin ang maiin ka thinlung an tiharh thar zual a. A ţawng paha a der ni hauh lo va a han nui her herte chuan ni zûngin pangpâr hnena chaw a pe ang maiin chakna thar diai min pe a nih kha.

         Khawvel mawina tizual tur tawk chiahin a rim a tui a, rim dang reng hre tawh ngai lo tur pawh ni ila, ka vui ngaiin ka inring lo. Hlimna dik leh hmangaihna tak zawnga zinkawng thui tak zawh a, beidawng taka hun ka hman liam ţhin laia ka hnena chu angel rawn tirtu chu thlarau sual pawh lo ni mah se, lawmthu ka hrilh tho ngei ang.

         A sam a ţawn bu leh siau ţhinte chuan lungawina hmunah min chentir a. A mitmeng lian lam dum ţha takah chuan khawvel thar ka hmu ţhin. A kâreh zau nalh tak mai han nui mawizia kha aw! A bula ka awm phawt kha chuan thil engkim mai khan awmze duhawm tak an nei vek kha a ni a! Kâwla tlai ni tla êng mawi ber aia hmuhnawm chu ka en kham thei mawlh lo va ni.

         Amah vangin hma lam hun ruahmanna chuan awmze dik an neiin naktuk thlirlawkna pawh a dik vel vek a nih kha. Kâr lo awm tur leh thla lo thar turte chu nghahhlelhawm takin awmzia an nei vek hian a hriat a. Nitin kha a bulah chuan hun nuam ber an ni vek ta ţhin a ni. A ni, kha mi ni leh zanah khan a vawi khat nân ka nunah hmangaihna zia dik tak, a nihna duhawm ber leh nawmna azawnga nuam ber mai chu ka tawn a, ka tem tak ni.

     Tunah erawh hmân an ni ta mai si a.