Hmelṭhat duhawmna ka ngen a ni lo,
Thla meuha beidawnna lo lang chhuak mek;
Vûr tluka thianghlim kut fai ni bik lo,
Lasi nula bahsam mawi, biangnotê.
I mitmeng ârsi vám iang ka ngainat,
I heh no, pangpâr pâr chhuah zahtirtu;
I khawite hnun khuavangte'n an chawi leh,
I zalpuan nêm, i sakruang chawlhna nen.
Chung chu pawn lam cheimawina tlereuh,
Uaia chul leh thuai ṭhin an nih si hi;
Hmangaihte khuavel lam pawh vaivutah,
Khuarei chuan a rawt dip ṭhin love'm ni?
Hmangaihna chu cheimawi chawp ni lovin,
Thinlung nun nêm leh rinawmnaa khat;
Thlemna lo thleng kâra rinawm reng tûr,
Chu ngei chu ka ngenin ka ngiat a ni!
Ngaihngam taka a ṭangah bei chung a,
Ka hringnun thurûk chhia ṭha tinrengte;
Vahkhuaite'n pârzu thlum hliahkhuh phena,
An phun ri an thuhrûk ngamna ang chu!
Ka lei hringnun nawmna vawrtawp kawltu,
I mi hmangaihna chuan theih loh reng reng;
Nei lo se, ka thlarau chawlh hunah lam,
Chák takin mi umzui thei zawk se aw!
Thlakhlelh chikima ka thlakhlelh a ni,
Ani hmuh chu vanneihna tak zet maw?
Thinlunga hmangaihna lo pâr mawi,
Ka tân vanduaina a nih si hi le!
Ani tawn loh min duhsak chiam ang maw?
Chuti ka tân hringnun pawh engmah lo!
Chhia leh ṭha hriatna zilhfung ka hmelma,
Tawnsabawp hmangaihna ka thlakhlelh hi!
Leilung mawitu duhawm, mi ringhlel suh,
Ka nungchang ka hriat thiam bik i ring maw?
A chhan hriat loh chhanna hriat hma loh zawng,
Chhanna pêk tûr che ka nei lova ni!
Tlâng rel leh khua sel ka tân a nâ lo,
Nang nen runhmun len dun rem lo zawk hi;
Hemhmun! vanduaina ânchhia! ka chau e!
Piang lo tawp ila, ka lawm a kim tûr!
No comments:
Post a Comment