Hnêmtu Zahngai Lo !

 

 

Aw ka thinlung, mi zilh bansan lul rawh,
Chhihhri-a tui luang tlang ang mai a ni,
Ka bengin i thu hla a dawnsawn ţhin,
Luak tichhuak ri mawi tum sual luih ang hlauh!
 
Kei ang êma hmangaihna dai thûk zet,
Nuin fa a hmangaihna tlukpui ang,
Thihna hrui valh hial pawh bát ngamtu chu,
A hliam pawh a thûkin a nâ reng e!
 
Kei ang bawka hmangaihnaa luangliam,
A kuam tin zawh chhuak thlapa hlimna chhar,
Kei ang taka hmangaihnaa chawm thau,
A ţang tluka hmun nuam dang tawng ngai lo!
 
A hmangaih ber vanga nitin hlim ţhin,
Ka rimtawng zia ang zela mi hnêm thiam,
Ka khawharna ruam zau tak zawh ve tawh,
Ka lunglênna khawvel ngainatu chu!
 
A ni, ka hliam ang hliampui tuar ve tawh,
Ka chhûngril keh sâwmna ang thinlung nei mi,
Ka mittui khuah dïl ang lo khuap ve tawh,
Ka lungngaihna tlângchhip chuan ve tawh chu!
 
Chutiang mi an awm ve reng a nih chuan,
Ani chu han hruai la, mi hnêm ang hmiang,
Nguina thlifim paipawn chunga nui thei,
‘I awm dan bansan rawh’ titheitu ngei chu.
 
Chu mi chuan nang ang bawka nui chunga,
Khabe tuai paha, ‘|ang fan fan’ ti lo a,
I lungngaihna puan hlip rawh ti zawka,
Damna khawvel mi kawhhmuh theitu chu.
 
Thu fing hmangtea mi tuam dam theitu,
Vanduaina meuh pawh amah leh amah,
Intheihnghilhtir ţhak khawpa hrai rui thei,
Han hruai la, a thu ka lo zawm ang e.
 
Mahse, chutiang mi an awm thei ngai lo’ng,
Lungchhiatnain bu khuar nâna a hman,
Khawharna vawrtawpin lû nghah nân a neih,
Chutiang mi’n thurawn reng a mamawh lo!
 
Tu’n nge thurawn hmanga thinrimna beng dai?
Thu fing hmangtea lungngaihna tikiang?
Thinlung chawmawlhna hruihrual phelh tura,
Van meuh au eih thei an awm mawlh lo e.
 
Nunna chu thâwk lâk hlekah a nâa,
Thute vangin a rûm hlum lo chauh e,
Lungngaihna tlakbuakin a hrem hnena,
Dawtheihna thu sawi chu bansan lul rawh!