𝐃𝐮𝐡 𝐯𝐚𝐧𝐠 𝐫𝐞𝐧𝐠𝐚 𝐩𝐢𝐚𝐧𝐠 𝐩𝐚𝐰𝐡 𝐤𝐚𝐧 𝐧𝐢 𝐥𝐨 𝐭𝐢𝐡 𝐬𝐮𝐚𝐥 𝐛𝐮𝐦𝐧𝐚 𝐡𝐢 !

Tunlai hian kan ramah, a bik takin ţhangthar zingah, “Kan duh vang renga piang pawh kan ni lo a, engvangin nge Pathian hian min hrem dâwn si? Pathian fair lo tak a ni” tih thu hmanga Setana’n a bum mêk an rawn pung hluai a. Pathian awm ring lo intite thu hla a nih rualin, piang thar duh si lova hremna pumpelh dan kawng zawngtute hnialkhan pui ber pakhat a rawn ni ta mêk a nih hi.

He Setana bumna hi mihring ţawng leh ngaihtuah thiamna aţanga chhan kan tum dâwn lo a. Pathian thu nung hmang zawkin, he ţawngkauchheh hi kan phetthla mai zawk dâwn a ni. Paula chuan Ephesi lehkhathawn kal tlangin, leilung pian hma daihin mihring lo piang chhuak tawh phawtte chu, thianghlim tur leh sawiselbova nun hmang tura Pathianin min lo thlan lâwk diam tawh dan min hrilh a. 

Davida fakna hla, Sam number 139 kan en chuan, chhul ata kan riruang tur zawng zawngte hi Pathian hriatpuina veka duan an nihzia chiang takin kan hmu bawk. Pathian hriatpui lohin mitkhapkâr khat lek pawh nun kan hman lohzia nen lam min hrilh a nih hi. Leilung leh a chhûnga awm zawng zawngte pawh, Pathianin ama tân veka a siam an nihzia Paula’n min hrilh bawk. 

Chuti chung chuan duhthlanna neia siam kan nih miau avangin, Pathian ring duh lo mi, suahsualna kawng zawh thlang zâwk an awm tur thu pawh, chiang takin a kan baibul hian a sawi lâwk diam bawk. Mahse, mihring chuan a ngaihtuahna thûk ber hmangin Pathian a chhui a chhui turzia, rin loh theih dan kawng a dap turzia a hriat lâwk vek avangin, chutiang mite chu kan ramah Pathian thute rintlakzia lantir turin an rawn inlâr ta reng a nih hi.

Chung mite tân lah chuan thurawn a lo pe lâwk diam tawh a. “I thinlung zawng zawngin Lalpa chu ring la, nangma hriatnaah innghat suh” tiin, tun huna mahni ngaihdan leh ngaihtuah thiam dan dana innghat chunga, Pathian awm ring lo leh hmangaih Pathian ni chung sia phuba lak chîng Pathian a nih bawk si vanga sawisel mektute hi, kawng dik zawk khawhhmuh a la tum hram hram chu a ni si a. 

Pathian duh dan ang taka lo piang i nihzia, khawvela mihring piang tawh zinga fing ber tia baibulin a sawi Solomon-a chuan hmanah lo finfiah daih tawhin, “Lalpa’n thil zawng zawng hi chhan nei ţheuhin a siam a. A ni tak e, mi suaksualte pawh ni ţha atân” tiin min lo hrilh diam tawh a nih hi. Heng mi suaksual a tihte hi, hre reng chunga Pathianin a siam chhan anga nung duh lo, chhuanlama, “Duh vang renga lo piang pawh ka ni lo” titute hi an ni si a. 

Kan thupui lo pian chhuahna bul ber chu, mahni hmasialna leh mahni inhmangaihna a ni tlat a. Pathianin mihringte a siam chhan, Pathian duh dana nung tur leh a thuhnuaia intulut tur a nihna pawm duh lova, mahni duh dan dana nun hman duhna, Setana ze pui ber pakhat, siam a nih anga nun duhkhawp lohna aţanga lo chhuak a nih miau avangin, a thinlung chhûnga chatuan dahtu Pathian awmzia ringhlel ngam si lo a, hrem hlau site chauhthubarawhna leh chhuanlam mai mai a ni tih i hre mawlh ang u. 

A tawp bera ka han tarlan duh chu hei hi a ni. Pathian hi ahring hranin amah ngei heng mite hnenah hian rawn inlârin, an nuna zawhna leh harsatna an neihte hi rawn chhang dâwn ta pawh ni se, baibul thute hmanga chhanna kan pêkte bak hi sawi belh tur, kan Pathian hian thu dang a nei dâwn chuang reng reng lo. A hnen aţangin chhanna danglam pakhatmah hriat belh tur an nei ngai bawk hek lo ang. 

Heng mite buaina bul leh harsatna zawng zawng chhanna engkim chuanna, baibul hi Pathian thâwkkhuma ziak a nihzia pawm duh lotute hian, an mihringpuite thu ziak leh ngaihdan an ngaihthlak leh an chhiarte aţang thovin thutlukna an siam tih hi i hre reng ţhin ang u. Baibul chhûnga thu nungte ring duh hauh lo, an harsatna tinreng chhanna inziakte pawm duh hauh si lo, chhanna dang dapa kawng dang chhuitute mai an ni a.

Anmahni maia Pathian rinhlelhna leh awm rin lohna, Pathian mizia leh a remruat rinhlelhna leh awih duh lohna nei an ni ngai lo. An hriatna khawlkhawm aţanga thutlukna siam ve mai chauh an ni zawk. Tin, baibul hi thu nung a nihzia hre tur pawha belchiang ngai lo, zir chiang ngai lo an ni deuh tlangpui zel a. Baibul aia chuan lehkhabu dang leh ngaihdan dang erawh zir chîka, belbula innghah nâna hman thlang zawkte an ni cháwk. Nakinah erawh tu zawk nge ti dika, tu zawk nge ti sual tih erawh kan la hre ngei ngei dâwn a ni zawk e.