𝐑𝐚𝐰𝐧𝐠𝐛𝐚𝐰𝐥 𝐜𝐡𝐚̂𝐤𝐢𝐧 𝐩𝐡𝐢 𝐫𝐮𝐚𝐢 𝐭𝐚𝐰𝐡 𝐬𝐮𝐡 !

Mupui ţam vanglai tluk zeta chaka rawngbawlna kawnga ke pen châk, ram sakawr zualko tha zat tluk zeta thil intihhmuh kawnga ţuan ţha Zoram ringtute hian, tun thleng hian Pathian nena kan inlaichinna kawngah tih fuh loh ngial ngial kan la nei ta reng a! Inkharkhipna khawvel hnuaiah, online hmanga rawngbawlna kawng inhawng bawh tuma hmanhlel tamzia, Utube leh Zoom kal tlangin kan hmu leh ta mêk reng a nih hi!

Ka phâk ang angin heng rawngbawlnate hi ka han chhim kual ngial a. An zinga tam zawkte rawngbawlna hi chuan, ti nungtu Thlarau Thianghlim chenchilhtu an nei lo niin ka hmu! Rawngbawl tura chhandam e maw inti tlat, pian thar hnu khawvel chu rawngbawlna chauh e maw ti tlat Zoram ringtute hian, rawngbawlna nung leh thiltithei kan neih theihna tura tihtur kan neih hi, kan hriat chian hmasak a ngai ta takzet a nih hi.

Kan entawn tur ber Lal Isua nun aţanga Thuthlung Thara rawngbawltu thawhhlâwk ber Paulate nun aţanga kan hmuh chian êm êm chu, rawngbawlna an ţan hmain Thlarau Thianghlim sawizawi leh hrual muma an awm hmasak zet dan hi a ni. Keini erawh kan piang thar zo chauh a, rawngbawl tura ke pen châka sahalin, chu lo chu tihtur hriat kan nei ta lo e maw tih mai tur a ni thung si. Hei ngei hi a ni kan hlawhchhamna bulpui pakhat chu a lo ni.

Lal Isua kha zawng, mi dang ang a nih miau loh avangin ni 40 leh zan 40 bak, hun a neih loh avangin intuaihriamna hun a nei hman lo a. A bak Baibula rawngbawltu hlawhtling kan tihte reng reng, a kuma kum tel intuaihriamna pal tlang hmasa zet lova rawngbawl tura pen chhuak an awm hauh lo tih hi, Zoram ringtute hian kan hriat chian a va hun ta êm! He mi hre lova rawngbawla pen chhuak, hlawhtling ta sawi tur an awm lo.

Zirtirte ngei pawh Isua’n a kalsan hnu khân, Thlarau Thianghlim an chan hmasak zet hma loh chuan rawngbawl tura chhuak lo turin amah ngeiin a hrilh lâwk diam a nih kha. Paula pawh Damasaka daia êngin a chhun thlûk hnu khân, thlalerah kum 3 zet Thlarau Thianghlim zirtirna hnuaiah tuaihriam hmasak a ni te te a nih kha. Chutiang zelin midangte pawh an ni tih, an chanchin kan hmuh theih aţangtein kan  hre thei a nih hi.

Kan rama rawngbawltu hlawhtling, Loncy-a, Mimi-i, Faktea, Fredericka- leh Dennis-ate pawh hi lo en ta ila. Tun huna Thlarau Thianghl;im chenchilhna nena rawngbawlna hlawhtling an kalpui theih hma hian, a kuma kum tel tuaihriamna an pal tlang hmasa vek a nih hi. Salim Zothanpuia hian kum 3 chuang tuaihriamna a pal tlang hnuah pawh, rawngbawlna hlawhtling tak a neih mêk laiin a lo la hriam tâwk chiah lo tih kan hmu mai a nih kha!

Pathian hian i lakah eng nge a phût tih i hria em? Mika kan en chuan, “Lalpa’n a phût che chu eng nge ni? Dik taka tih leh khawngaihna ngainat leh i Pathian nen thuhnuairawlh taka lêndun a ni lo em ni?” tih hi a ni. Chuvangin, nitin dârkâr tin Pathian nena lêndun hmasak phawtna nun hi a ni kan mamawh ber chu lo ni. Chu nun aţanga miin rawng a han bawl chinah tawh chuan, thiltihtheihna nen rawng a bawl zung zung tawh mai a ni zawk! Rawngbawlna aia tihtur hmasa awm hi kan hriat chiana kan nunpui a hun ta. 

Kohhran kal tlanga rawngbawlna kawnga inhmangte nun hi han en teh. Pathian nena lêngdun hman miah lo, tihtur chi hrang hranga inhmabuai kumtluan, mahse rah chhuah tur nei lo, zung pawh kai nghet hek lo, thiltihtheihna nei bawk hek lo hlir kan nih hi! Nghet taka zung kaih hmasak inzirtir lovin, rawngbawlna kawnga theihtawpa ke pen ve zel tura infuih ţhin Zoram ringtute hian, kan tihsual hi kan hriat chhuah a va hun ta êm!