𝐑𝐚𝐰𝐧𝐠𝐛𝐚𝐰𝐥 𝐭𝐮𝐫𝐚 𝐜𝐡𝐡𝐚𝐧𝐝𝐚𝐦 𝐤𝐚𝐧 𝐥𝐨 𝐧𝐢 𝐜𝐡𝐢𝐚𝐡 𝐥𝐨 !

Zoram Kohhran Ţhalai Pâwl lian ber, KŢP thupui pakhat, “Rawngbawl tura chhandam” tih hi thu dik ziktluak lo a lo ni mai lo maw, tih turin inkharkhipna khawvel chuan zawhna a rawn piantir ta tlat a nih hi. Bethel Ministry rawngbawlna kal tlanga kan lo hriat theih chu, khatia India ram inkharkhip a han nih chiah khân, vai rama kan misawnari rualte’n rawngbawl ngaihna reng hre lova khawsak hreawm an tihzia, Tv Frederick-a hnenah an rawn sawi ta a nih kha. 

Mizoramah ngei pawh ţhalai zawna rawngbawltu, nuho, pho pâwla rawngbawlna a han chawlh tak ţhuapah khân, Zoram ringtu tam zawkte thlarau nun chu thlaler ram ro hre hru ang maiin, chiahzawptu tuihna reng nei lovin a ro ngawih ngawih a. Rah chhuah tur reng nei lovin kan awm ţhuap mai zawng a nih kha. Chu chuan eng nge min zirtir kan tih chuan, rawngbawl tura chhandam kan lo ni chiah lova nih hi tih thu hi a ni ta a ni. Rawngbawl theih loh hun a lo thleng ta chiah a, ringtu nun a buai ta tlat a nih hi.

Tichuan, kha leh chen Zoram ringtute’n kan lo hmuh ţhelh, kan thlarau mit men fiah tâwk lohna avanga emaw kan lo tih ni si lo chu, chiang takin kan hmu fiah chho ta a lo ni. Engvanga chhandam nge kan nih? He zawhna hi nasa taka kan lo chhan ţhelh rei tawhna chuan, chhanna dik min zawntir ta ruai mai a lo ni. Chhanna dik lo hmanga kan ringtu nun kha leh chen kan lo khalh kal tawhna chuan, “Ka mite chu hriatna an tlakchham avangin an boral” tih hi kan nun a lo nihzia min hriat thiamtir ta a nih hi.

Rawng kan bawl theih hun lai kha han ngaihtuah let ta ila. A nuamin a hlim pawh kan va hlim ţhin tak êm! Mahse, biak in leh puipuina hmun aţanga rawngbawlna a zawha, in lam pana kan hawn hnua mahni chauha hun kan han hman chiah khân, kan nun khawharna chuan rang takin min rawn chenchilh nghal zat zel a nih kha ti raw u? Camping leh fellowship neih zawh hlim chiaha mahnia han tal hran hian, kan nunkhua hi a har ngawih ngawih zel a nih kha. Rawngbawlnaah hian hahchawlhna reng a lo awm lo tih erawh, kan hre chhuak thei der si lo!

Sam Bu 1-na thupui kha eng nge ni kha? Êngthawlna tak tak tih a nih kha. Ringtu nun dik tak chanchin, Sam Bu 1-nain a sawi kha eng nge ni kha? “Ani chu tuiluang kianga thing phun, a huntea rah ţhin, a rah pawh uai ngai lo ang hi a ni. A lawmna chu Lalpa dânah a ni zawk a” tih thu kan hmu a ni si. Jeremia pawhin, “Tui kianga thing phun, luikama zûng kai, khaw lum lo thleng pawh hlau lo, a hhahte hring reng si, khawkhen kum pawisa lo, rah chhuah ţhulh chuang si lo ang hi a ni ang” a lo ti thlawt a nih kha! Mahse, Zoram ringtu tam zawk erawhin khawkhen kum kan pawisain, khaw lumah kan chau zo ta zawk si.

Rah reng kan chhuah thei ta bawk hek lova nih kha. Zorama ringtu nun bulpui bera kan neih rawngbawlna hian, Lal Davida leh Jeremiate’na ringtu dik tak nun an sawi hi min thlentir phâk hlawl lo a lo ni. Kan piang thar lova, van ram kan kai dâwn lo kan ti lo. Kan ringtu nun hian ţhelh lian pui a nei kan ti mai zawk a ni. A nih chu kan ţhelh lian tak chu eng nge? Chhandam kan nih chhan kan hre chiang tlat lo hi a ni. Eden Huana Pathianin mihring a siam chhan kha eng dang a ni lo. Nitina a pawl tur, a lênpui tur, a nunpui turin a ni mihring kha a siam ni. 

Adamate Pathian nena nitin an lêndun lai kha chuan, mihring nunah khawharna hnawh khah theih loh a awm ngai lo a. Pathian nunah pawh a awm bik bawk hek lo. Mahse, sual avanga kan inţhen aţang chiah khân a ni, mihring chhûngrilah hian ruak, engmahin a hnawh khah zawh loh a rawn pian tak tlat ni. Chu ruak hnawh khahna zawng reng rengin mihring hian, a lei kum a chhiar tlingtla ngei ngei ta ziah bawk a nih hi. Nun ruak hnawh khahna dik hmutute chuan, “Nitin ka hnenah awm reng ang che Lalpa; Kei pawh i kianga awm ka ning lo” an ti thei ta bik tlat a.

Nun ruak hnawh khahna dik hmu zo lotute erawh chuan, “Ka nun ruak luahtu awm lo beidawng hian” tih hla an sa thung ţhin. Chuvangin, tun aţang chuan Pathian nena nitina lêngdun tur leh inpâwl ţhin turin Pathianin min chhandam tih kan hriat a, chu nun chu kan zawn phawt chuan, tuiluang kianga thing phun ang kan ni mai dâwn a lo ni. Chung mite chuan alawm, hei leh chen kan inkharkhip tawh chung pawhin Zoramah, nitin rah chhuah an ţhulh ngai loh! An hunin a daih loh khawp rawngbawlna an hmuh reng theih ni! Zoram harh rawh!