𝐑𝐞𝐯 𝐋𝐚𝐥𝐡𝐦𝐢𝐧𝐠𝐜𝐡𝐡𝐮𝐚𝐧𝐠𝐚 𝐙𝐨𝐧𝐠𝐭𝐞 𝐥𝐞𝐡 𝐓𝐡𝐥𝐚𝐫𝐚𝐮 𝐓𝐡𝐢𝐚𝐧𝐠𝐡𝐥𝐢𝐦 !

Hun lo taka mual min liam san ta, Rev Lalhmingchhuanga Zongte khân a thih hnuah pawh kan hnenah thu tam a la sawi deuh deuh dâwn niin a lang. A boral hnua an tihchhuah, ‘Mizo Buanpuite’ tih lehkhabu chhûngah hian Mizote tâna rohlu, a hlutna chhut phâk rual loh tur a inphum tam hle a. Chung rohlute chu a mal malin kan hai hawng dâwn a ni.

He a lehkhabua thupui ţhen hrang hrang zinga a tawp ber, Thlarau Thianghlim leh Mizote tih thu, phêk 5 leka seiah hian Zofate mutân lian berte zinga chhal ngam hial tur buaina, fiah tak leh chiang takin a rawn tarlang ta a. A ziaktupa ngei pawh hian a lehkhabua he thu a lo tel ve ngawt hi, mak a tih thu leh awm lo anga ngai an pawha an demawm loh tur thu a ziak lang ngat a ni!

“Aizawl khawpuiah mi pakhat ţawng bual bual i hmu a. Thu a sawiin a zai bawk a, haleluia pein amen pahin a inbingbilet a, a bawkvak thul! A thu sawi zahve aia tam zawkte lah chu hriat thiam rual an ni bawk hek lo. Mahse, thlarau mit meng intite chuan Thlarau Thianghlim pâwlna leh hnathawh a thleng tih an hai hauh lo” tiin an sawi te te a.

Heng mite vek hi chu lai hnaivaia pisa pawimawh takah lêng lutin, awfiser pawimawh tak an va dawr ta a. Thiam ang tâwka an vehthlem hnuah, chu awfiser chuan, ‘Min hre thiam mai teh. Dik chiah lova thiltih chu ka thei ngang lova ni’ tiin a lo chhang ta mauh mai. Mi hriat thiamna nei lo leh chapo ru riauin chu awfiser chu an ngai ta nghal a. 

Hmelhriat satliah mai ni lo, ţhian ţha tak an nih bawk si avangin mak pawh an ti hle. ‘A dik lohna a awm chuang em ni? Duhsak zawngte chu inpuih ve bawk tur a ni ngai a’ an ti ta a. Ani lah chuan, ‘Puih ngei che u ka duh alawm. Mahse, dân kalha inpuihte chu a dik lo alawm’ a ti ta tlat si a. ‘Dân tih ringawtte chu’ tia phun nâng nâng chungin an chhuak ta a. 

A hma lâwka thlarau lama meng inti êm êm khân, pisa chhûnga mi nuna Thlarau Thianghlim hnathawh lo thleng erawh an hmu thiam tlat lawi si lo. Mizote’na Thlarau Thianghlim nihna leh mihringa a hnathawh dan kan man lohzia rawn sawiin, “Thlarau Thianghlim chu Pathian a nih avangin kan nunah Lal, Thuneitu a ni tur a nih laiin, a mi hruaina kan zui tur a ni tih pawm thlapna hi kan nei ţhin lo a.

Ţawng hriat loha min ţawngtirtuah, min tihlimtuah, min tiphûrtuah, min chawk phûltuah, zai tinuamah, miottui titlatuahte chuan kan duh khawp mai. (Mahse) a thuhnuaia awm ai chuan hnamrua ang deuha neiha, eng emaw thawktu ang vela neih hi kan duh tâwk lek ţhin niin alang. Hei vang hian kan harhnate pawh hian mi ram harhnain an ram a siam ţhat anga kan ram a siam ţhat ve theih reng reng loh” tiin min hrilh a. 

A ni lah tak a! Thlarau Thianghlim hnathawh dan tur nia kan hriat leh, mihringtea hna a rawn thawh dan hi a iang ta lo lutuk ţhin a. Âw nêm leh zaidam takin, ‘Hei hi chu, kha kha chu thil dik a ni lo, chuvangin ti suh’ tia thlemna leh thang kan hmachhawn laitea kan thinlunga thu a rawn sawi hi, a rau êm êm lai a ni tih kan man duh lo zel a nih hi. 

Kawng dik lo kan zawh dâwn lai te, thil dik lo tih hriat ngawih ngawih kan tih dâwn laitea kan thinlung min rawn kalhtu hi Thlarau Thianghlim a ni tih pawm duh lo, hre duh lo, Zoram ringtute zingah hian kan va tam awm êm! Kan nuna Thlarau Thianghlim hnathawh lo thlentir kan duh dan leh, Ani’n kan nuna hna a rawn thawh dan hi a inang thei mawlh si lova nih hi! 

“Kelkanga lei han ei ţeuh zawha mi rethei chanai ei leh ţeuh ringawt kha engtihna mah a ni lo a, Pathian ten zawng tak a ni” tiin kan Pastawr hian a thling baw hâwkin a ziak ta hráwih reng a! Thlarau Thianghlim chu hmangaihna, thianghlimna, dikna, rinawmna, taimâkna leh tlawmngaihna kan nunpui theihna tura keimahnia thu rawn sawitu hi Thlarau Thianghlim chu a ni a. 

Chu taka chu a ‘RAU’ lai ber a ni tih Zoram ringtute hian kan hming tluka kan hriatchian a, kan nunpui hunah kan ramah hian danglamna a lo thleng ngei ang. Entirna a rawn pêk ang khi Zoram ringtu tam zawk khawsazia a nih rih si avangin, tunah rih chuan kan dam thei lo a. Sual lah kan ngam thei bawk hek lova nih hi!