𝐊𝐚𝐧 𝐏𝐚𝐭𝐡𝐢𝐚𝐧 𝐭𝐡𝐮 (𝐭𝐡𝐞𝐨𝐥𝐨𝐠𝐲)-𝐢𝐧 𝐬𝐮𝐚𝐥 𝐚 𝐧𝐠𝐚𝐦 𝐥𝐨.

Veng tinah biak in dâr a rawn ri rál rál a, Zorama chhûngkaw tam zawkte chu biak in pan turin kan che sáng sáng ţhin. Khawvel râlthuam ropui ber berte ai pawha sual hneh nâna rintlak zawk, Pathian thu thianghlim chuanna Baibul zakzekin, Pathian fate A hmaa an inlan ni ang mai khan, mipuite chu Pathian hmaa inlan turin, tihluihna reng awm lovin a hmei a pa, a pui a nawiin kan che chhuak ţhin.

Khaw tin thler fémahte chuan Pathian thu ţha tak tak, hriattirna phekah (Hoarding Board) tarin kan inhung chhuak vek a. Veng tin, khaw tina hmun rualrem ţha apiangahte biak in kan hung fir fer bawk. Kan ram chhûngah mai duhtawk lovin, kan chhehvel leh kâwlkil piah thlengin Misawnari kan tirchhuak bawk. Pathian thu lah kan titi tui ber te zinga chhiar hmaih hauh loh tur a la ni zui! 

Mahse, heti chung sia Setana leh a kawppui suahsualnain kan ram a ngamzia hi i ngaihtuah ve ngai reng em? Mit neia meng kur chung leh, hriatna beng nei reng chung si hian, Jeremia hun laia Israel fate chenna Jerusalem, hmêlmate’n an hual beh tlat lai ang mai khan a tê ber aţanga a lian ber thlengin suahsualnain min sal bet tlat a. Chhungkua dam him pial pawh kan awm tawh na nge maw, tih mai tur a ni.

Suahsualnain kan ram rorêlna luh chhuakin, mahni hmasialnaa khat tlat rorêltute chuan, ram mipuite tân ro pawh an rêl hlei thei tawh lo. Suahsualna lo lang chhuak hup beh nân mawi leh mawi lo pawh thliar thei tawh lo khawpin, mi ţha nia kan hriatte an khawsa mek a. Suahsualna peng hrang hrang kaltlangin thang an kam a, duhamna fahrinte chauh an thangkamah awk lovin, Pathian mi nia kan hriatte ngei pawh an awk mawlh mawlh reng a nih tak hi!

An chenna in leh pisa kaina hmunte chu, bâwma an thangkama an awh sava hlira a khat tlat angin, bumna hlirin a khat tlat emaw tih mai tur a ni zo ta. Jeremia’n an zawlneite chuan dawt thu hlir an hril a, an puithiamte chuan an thu thuin ro an rêl a, a lo tih ang takin Pathian tel lova rorêl leh thiltih, kohhran hmachhuan lawi sia hmalakna bak hmuh tur kan nei ta meuh lo. Chu suahsualna hnuaiah chuan mi tin duhamnain kan khat tlat emaw tih mai tur a ni zo ta a nih hi.

He suahsualna hian mi lian leh mi awmthei chhûngkuate chu luhkhungin, a luh chhuak fai vek emaw tih mai turin, vantlâng zingah lah a tlangnel êm êm tawh a. Mi tê deuh leh harsa zawkte chu a hlamthlem mahna, kan tih reng lai hian suahsualna chuan luhkhung loh alawi a lo nei lo. Kan pastawr leh upa chhûngkuate pawh an him bik chuang hek lo. Suahsualnain min ngam luat avangin kan ram chu HIV+, Cancer, Hepatitis, zun thlum etc vei tam ber kan ni ta!

Tun hunah zet chuan eirûkna chu thiltih tlanglawn takah a chhuak ta mek a, a sawi pawh kan sawi peih tawh meuh lo. Chuvang tak chuan suahsualna pawhin kaw dang hreuh belh zelin tun hunah ngei hian, taksa lama suahsualna hnuhma lang mai mai thei tawh lo, No 4 leh mipat hmeichhiatna hmangin chhûngkaw tam tak min luh chhuak leh ta a. He suahsualna hnuaia chhûngkaw rumna hre pha chin chuan, tuifinriat so bulh bulh tlukin chhûngkaw ţap rite chu an hai thei ta lo a nih hi!

Zoram ngaihtuaha milâr (zai thiam, model, miss, fashion)-te khawvel ţawpziate hi nu leh pa tam tak tân chuan, ngaihthlak ngam chi pawh a ni lo! Hurnain a khat a, ruihhlo leh sum bawihah, tisa châkna tinreng nen an chawhpawlh khawlo zo ta mek a nih hi. V Thangzamate’n, ‘Heti êm hian a ni maw (Zoram) i lo nat le’ tia rambuai laia tawrhna hla a phuah hun ai khan, tun huna suahsualnain min ngam luat avanga kan ram natna hi a nasain a râpthlak tawh zawk a nih hi!

Mahse, kan ram hruaitu, sakhaw puithiam leh mi vengva china kan ngaihte leh, mi nawlpuite erawhin, Jeremia thu angin, ‘Ka mite hliam chu ngaihsam takin, “A ţha alawm, a ţha alawm” tiin an thawi a, a ţha hauh si lo a’ an ti duh lek a. Chuvang tak chuan a ni, he suahsualnaina min ngam luat avang hian, ‘An lei chu thal ngul angin dawtah an hmang a….thutakah ţhang lovin sual lamah an ţhang zel, kei mi hre lovin’ tih hi kan dinhmun a lo nih zawh tak reng ni!

Kohhran pisa kaina hmunte pawh suahsualna hian a luh chhuah vek emaw tih mai tur a ni zo ta! Thatchhiatna, dawngdahna leh duhamna hnuhma hmuh tur a va tam ngai êm! Kan Assembly House chhûngte pawh luhchilhin mipuite chu, ‘Ka dawt phuahchawp a nih kha in lo rin’ tiin mi neksâwr zak ta lo. Israel fate chunga Pathian thinurna a lo thlen châng apianga an ramri him lohnate ngei pawh, kan ramah a lo thleng ta mek a nih hi!

Mipat hmeichhiatna kawnga kan han fihlim lohziate hi kan hre ţha duh tawh lo a. Inkharkhipna kaltlanga khap beh theih ringtu kan tamziate kan ngaithla ţha duh tawh lo. ‘Lei leh vana thuneihna zawng zawng ka hnenah pêk a ni tawh’ titu Lal Isua zia hi mi tam zawk nunah hmuh tur a awm ta lo! Lal Isua anna nei lo zawng hlirin kum 120 chuang ringtu kan lo ni ta hlauh zawk a! 

Zoram ringtu tam zawk - Isua anna nei lo!

Aizawla ka kal chânga tleirawl rual ka thlir ţhin hian, Korean tak tak emaw tih tur ka hmu tam tawlh tawlh a! Ka rawn haw lahin, kan sam kan chei dan lah a mak narawh e! Britney Spears a rawn lang a, 'Baby one more time' hla hit lutuk vangin, vawilehkhatah mi lâr ber a ni nghal a. Chutah, valgin ngatin pasal ka nei dawn, a la ti zui. Rotawtate ui lutuk chek tlawk tlawk kha!

Mahse, 'Like a virgin' tih hla sa a, mipa tam tak hmaa lo dawrh heng huang tawh Madonna a rawn ngaisang ta tlat a nih kha. A mi ngaihsân khan valgin tih mai mai eng hu-ah a lo ngai si lo! A tawpah a thianghlimna pâr an thliahsak a, a bialpa hmaah a kapkalak ta huau a! A nun kal chho zelah a che ţawp tulh tulh a. Nula thianghlim Mari nen inanna reng reng an nei ta lo a nih kha. Amah lah a itawm loh tulh tulh zui!

'She's so lucky she's a star but she cry cry for the lonely heart. Why do these tears come at night' tiin a testimony lungchhiatthlak a puan phah ta zawk a nih kha! Lâr nun ninawm a tem chho ta! Zoram kohhran member zaa 80 chuang zingah Pathian anna nei, Lal Isua ang tulh tulh nun nei kan awm lo! Engvang nge? Eng nge a chhan? Chhan dang a awm lo. Lal Isua bula thla khata ni khat pawh hun hmang ngai lo rual hlirin, Isua a an theih loh!

Kan mi ngaihsân zinga kan tal tam poh leh, anmahni an duhna kan nei ţhin. Vanlalsailova lâr vanglaia a lû meuh dan leh lam dan ringawt entawntu tamzia kha kan la hria ang. Ka nute rual generation pawh khan, Jackie Kennedy leh Lady Diana an ngaihsân êm avanga, an hmeichhe ngaihsân sam chei dana an sam siam dan an thlak kual ve khanglanzia pawh ka la hre reng!

Mi kan ngaihsân, kan va pawl tam leh an kianga kan chettlat tamnate apiangte nun dan hi, kan nun hian a lo lachhawng (copy) zel a. Speaker Faktea aţanga Frederick-a an tum pawh an tam hi! Sinai tlângah Mosia ni 40 a han thang a. Rangkachak bawng lim tichhe turin ni khat a rawn chhuk zuai a, ni 40 dang tlângah a han lawn leh a. Pathian a pawl nasat êm avangin, a rawn chhuk leh meuh kha chuan, a hmai kha Pathian ênnain a khat tlat a nih kha!

Israel fate'n an en ngam loh avangin, a dam chhûngin a hmai a tuam phah hial a nih kha. Josua pawh kha Pathian chenna biakbûkah Mosia rualin a lut ţhin. Mosia a lo chhuah pawhin a lo chhuak ve ngai lo. Mahse, Pathian Thlarau Thianghlimin a khat tih ziakin kan hmu a nih kha! Thu engmah sawi ve lo mah se, Israel fate khan a nuna danglamna hmuin, an hotu atân Mosia thih hnuah an pawm thlap a nih kha. Pubg khel uar lailenghote hi, an ţawngkam aţangin an hai theih ngai loh!

Mahse, Zorama Lalpa mi hriat, zing tin zan tin, kâr tin fianrial nun neia, ni khata Isua tâna hun eng emaw zat pea amah pawlna nun nei ţhinte hi chu maw, belhchian poh leh Isua zia an la a. Amah anna an nei tam tial tial a nih hi! An nitin nun hian Isua anna a nei tam tial tial a, an nunah; hmangaihna, khawngaihna, inngaihtlawmna, zawldawhna, ngilneihna, thinrim duh lohna, chetze mawi tinreng hmuh tur a awm ţhin!

Engvangin nge sualin min ngam êm êm?

I John 4:4 – Children, you belong to God and you have defeated these enemies. God’s Spirit is in you and is more powerful than the one that is in the world – Contemporary English Version.

Zoram Kristiante tluka baibul thu fiah ngam lo, hmang ngam lo leh, nuna sengluh tum lo hnam dang hi an awm ka ring lo! Corona hrilêng avanga kan titi tam berte chu; inkhawm theih loh, hri kai loh dan tur, sawrkar hmalak dan, ramri buai, hlauh tur leh venthawn tur, tih deuh hlir a ni. Khawiah nge ringtu thiltihtheihna, Krista kohhran khawvel êng a nihna, hrite hlau tawp lo tura baibulin min tihna tidiktu kan nihna, natna leh harsatnain a ngam loh ringtute chanchin hriat tur reng reng a awm lo! 

Antiokei khuaah kohhran a lo ding hmasa ber tih kan hria. Isua vana a lawn hnua kohhran ţiaktir chanchin ziahna chu, Tirhkohte Thiltih Bu hi a ni. Chu kohhran ţiaktir leh a tirhkohte thiltih tarlanna, Tirhkohte Thiltih Bua thil langsâr ber chu, Thlarau Thianghlim leh a hnathawh, kohhran leh mimal kaltlanga a thiltih chanchin hlir a nih kha! 

Tirhkoh Paula leh Appolova, khawvel ngaihah pawh lehkha thiam sâng berte'n, kohhran an phunna hmun a inang lo tih kan hmu a. Ephesi khuaa Paula a va kal khan, Apollova kohhran phunte a va hmu a nih kha. An hnenah eng nge a va sawi hmasak ber? 'In rin tirh lai khan, Thlarau Thianghlim in chang em?' tiin a zawt a nih kha! Ephesi kohhran kha an piang thar chiang hle. Mahse, an inkhawm satliah ringawt a, Thlarau Thianghlim erawh an nei si lo.

Kan rama Pastawr \ha ber bera kan neihte leh, Pathian hman êm êmte pawh hi Serampore hnuaia chhuak deuh vek an ni a. Bangalore kan awm lai khan, ţum khat chu Maţana Pachuau nen hian United Theological College (UTC)-a an Pastawr rual Fellowship (ni tain ka hria) ah kan tel ve a. Kan bang ta chu! Ka ngaihdan kha a insual nasa ta mai a. Hun rei fe ka ngaihtuahzui miah loh hnuah, Senate of Serampore hnuaia zir chhuak, vohbik an nih dan leh chung mite hnuaia Zoram kohhran awp a nih dan ka ngaihtuah ta a.

Pastawr zir chhuak tam tak ka zawt bawk. A hma deuh khan tuna an Principal nen, Liberal College an ni ka tihna chungchangah kan inhnial tawh bawk a nih kha. Tin, Pastawr hna thawk duh miah lote hnen aţangin an zirlai thiang zauzia ka hre zut bawk! Chuti chung chuan PCI leh BCM Thurinah chuan Baibul hi Pathian thawk khum, dik lo thei lo tih a ni lawi bawk si! Anni Pastawr rual lah chuan, khawvel taka Baibul hrilh fiahna lam an inzirtir nasa mai si a!

Mahse, rin ai takin Zoram Pastawr rualte hi an lo inthup thei a! Rev Zairema'n Josua ni auh din thlen theih loh danzia, an sawi tak tak maite erawh, ziaka hmuh tur a la awm ta fan a. Nilai zan thupui hal hial a ngaih ţum leh, chhim lama hmeichhe Pastawr thu ziak an chai laih ţum pawh a thleng reng a nih thung kha! Pawi ta ber nia ka hriat chu, heng Serampore chhuak Pastawr rualin, Thlarau Thianghlim leh a thiltihtheihna an ring bur lem lo nia ngaih theiha thil a awm leh, an ţawngkam leh min zirtir dan (sawi nek tham a awm) hi a ni.

Thlarau Thianghlim hnathawh leh thilmak tihte hi an tuipui lem lovin, an ngai ropui viau lo ni hian alang tlat a. Mahse, Lal Isua'n a aiawhtu min pêk, kan thurina Pathian pakhat ni bawk si a nihna lai tak, an rawngbawlna kawnga an dah pawimawh loh rah hi, kohhran hian kan seng ta a ni mai lo maw, tiin ka ngaihtuah ka ngaihtuah ta ţhin a ni! Thlarau Thianghlima thuam kohhran leh, mihring finna kaltlanga enkawl kohhran danglamna chu eng nge ni ta? 

Ephesi khuaa Apollova’n ring thar a siamte chungah Paula'n a kut a han nghah a, Thlarau Thianghlim an han chan chiah khan, Thlarau Baptisma changin ţawng hriat loh an dawng nghal a. Chu mai ni lovin, Pathian thu pawh thiltihtheihna nen an hril ta nghal a nih kha! Zoram kohhran chanchinah erawh eng nge langsâr ber? Tun hnaia an Pastawr lak thar, kum 5 chhûnga mite kha ka thlir ţhin. Khawvel thilah an va smart-in, an thu leh hla a va felfai ţhin êm! Kan felfaiin kan zahawm hle ringawt a, thiltihtheihna reng kan nei si lo a nih hi! 

Zoram kohhran zingah kan hmuh khât êm êm, Pentikos hnua kohhran lo piangtea langsâr ber si chu, Korinth lehkhathawna Thlarau rahte leh Thlarau Thianghlim thiltihtheihnate a ni kumkhua reng a nih hi! Apollova anga mi thiam, Thlarau Thianghlima thuam si loh, thiangzau zirna in sâng chhuakte awpna hnuaiah, Zoram kohhrante'n Thlarau Thianghlim hi kan hre chiang thei lova, hmelhriat dan leh neih dan pawh a nawlpui angin kan thiam hlawl lo a nih hi! 

Korinth bung 13-a Thlarau Thianghlim nihna - Hmangaihna leh, a zia chi hrang hrangte phei chu, kan neih mi-ah pawh kan ngai meuh lo a nih hi! Pentikos Thlarau Thianghlim kha chu thiltihtheihna leh hnehtu a ni si a. Mahse, Zoram kohhran tam zawk erawh chuan, chu Thlarau chu kan nei si lo a nih hi!  Zoram Kohhran a lo ţiah tirh pawha Thlarau rah, harhna ţum tam tak a lo thlen apianga dodal nasatu berte kha tute nge? Chhim leh hmarah kan Pastawrte kha an nih chiah kha! Kha ngei khan tun thlengin kohhran min la chhuahsan ngai lo a nih hi!

Kan biak in inkhawmah thiltihtheihna hmuh tur a awm ngai lo a. Biak ina thu sawitu leh zaipawl hla sakah thiltihtheihna a awm ngai bawk hek lo. Kohhran kan nihnaah pawh thiltihtheihna nei kohhran tia hriat kan ni ngai lo. Kan ram anga Pathian thu duh ram dang an awm ang em, tih zawhna ka in zawh zin tluk zetin, Pathian thu anga nun tum lo ram dang, keini ang an awm ang em, tih zawhna hi a lo lang chhunzawm zat ţhin.

Mimal zingah erawh Lalpa thiltihtheihnaa thuam zawng an awm ngei e. Chung mite avang chauh chuan Pathian thutiam nghehzia, rinawmzia leh rintlakzia kan hmu ţhin zawk a ni si a! Kan ramah hian Kristian an nih avanga man tur vai khawm ta se, Kristian ka ni ti nazawng, anmahnia Kristian an nihzia finfiahna (evidence) pakhatmah hmuh tur awm loh avanga chhuah zalen leh tur hi a tam zawk kan ni mai lo'ng maw? 

Hripuiin khawvel nuaiin, chu hripui hlauin kan khawpuite chu thlan ang maiin a reh ţhuap reng a! Eng nge kan tih tur tih, kohhran hruaitu emaw, pawl emaw, mimal emaw anga Pathian thu aţanga rawtna mumal la chhuak thei reng reng lo ka hmuhte hian, kan Baibul hi a tlawm ngawih ngawih niin ka hriat phah ţhin. II Chron 20 chho kha en rawh. Moaba thlahte leh Amona thlahte, a maka maka tamin Jerusalem an rawn rûn dawn ta mai a! Lal Jehosaphata'n a lo hriatin, keini'n hripui kan hlau ang bawkin a lo hlau ve ta chiam mai a.

Mahse, a hlauh êm avangin Judate hnenah chaw nghei tur thu leh, Lalpa zawn tur thu a puantir ta thung a! Judate pawh Lalpa ţanpuina zawngin an pungkhawm ta chiam a nih kha. Judate zawng zawng chu an fanau te te, an nupuite an fate nen LALPA hmaa an ding a, tih kan hmu reng a ni. Jehosaphata, lalho meuha chaw nghei, inngaitlawma Pathian an auh tak hnuah eng nge lo thleng ta?

Kan Pathian hi indona Pathian, sipaihote Lalpa ni miau hek, chung hmelma lo do chu a châk sakhai a lo ni a! Chuti taka a mi thlan, a fate manganna avang chuan, Judate chu râl beih buaitir pawh a tum hran tawh lo! Heti hian thu a sawi ta a: "He indona hi in beih a ngai lo vang: inzar ula, ding ngawt mai ula, in lama ţang LALPA chhandamna chu en reng mai rawh u, aw Juda mite leh Jerusalem mite u: hlau suh ula, zam hek suh u..." tiin! Zoram ringtute’n kan biak Pathian nen chuan a inang lo mang e.

Hmelmate chu anmahni leh anmahni a inbeihtir ta tak tak a! Judate'n hmelmate inkulhna an va thlen meuh chuan, an tlansan tak ei leh in tur tui ţha tinreng, an va tlan ta zawk a nih kha! Aw! He Zoram hian Lalpa ţihtu ram hruaitu nei se. Kohhran hruaitu, Lalpa chakzia tawng fiah tawhtu nei bawk ni se, Covid-19 vang hian kan zam lo tur! Lalpa hnenah zawng an ţawngţaiin, dilnate pawh an thlen ve ngei tak ang! 

Mahse, Jehosaphata lal a nih phat aţanga amah chawpa rorêltute zawng zawng hnena vaukhanna thu lo thleng, "Lalpa kan Pathianah chuan khawlohna leh thlei bik neihna leh thamna einate a awm lo a ni' tih thu a taka an nunpui miau avangin, ţanpui an dil meuh chuan Lalpa'n an rin phak bak bakin a chhang ta a nih kha! Keini rama rorêltute leh rawngbawltute erawh hi zawng, thlei bik nei, thamna ngaina, a rûka khawlohna fawmkem ţen ţun an nih hlawm miau avangin, Lalpa han au sasawi ve teh mah se, chhan ahnekin nitin hri kai kan pung tual tual ta zawk a nih hi!

      

Mahse, Pathian hnenah Jeremia’n, ‘Ka mite, ka fanute natnaah chuan ka nâ ve si a. Ka sûn a, thlaphannain mo vuan ta. Engah ka mite, ka fanu a hrisel theih loh?’ tia a vuina chu, Lalpa vekin a rawn chhang ţan ta a nih hi. Khaw tinah, veng tina ţhalai rualte chu Joela kaltlanga, ‘Indona buatsaih ula! Mi chakte chawk tho rawh u. Indo mi zawng zawngte chu lo hnai se, lo chho rawh se’ a tih angin chawh thawhin an awm ta mek a nih hi.

Hindu sawrkar hmanga Pathian thu kalh tlat, fa hrin tlem thupêk pawh lo zawm dual dual duh Zoram kohhran, tun hunah ngeiah pawh Hindu sawrkar thupêk engkim pawisa lova pungkhawm hreh lo, Pathian leh a kohhran khuahkhirhna thupêk erawh za-a za zawm thlip thlep duhte awpna hnuai ni lovah, Pathian chauh pawisatute hnenah Joel-a kaltlangin, ‘Nangni Zion fate u, Lalpa in Pathianah chuan hlim rawh u. Ruahtui hmaate chu a tawk chiahin a pe si che u a. Hruihte chu buhin a khat anga, uain leh hriak khurte chu a khat liam ang. Ka mite chu an mualpho ngai reng reng lo ang’ min ti ta a nih hi.