𝐆’𝐍𝐢𝐞 𝐥𝐞𝐡 𝐌𝐚𝐟𝐞𝐥𝐚-𝐭𝐞’𝐧 𝐀𝐭𝐡𝐞𝐢𝐬𝐦 𝐥𝐞𝐡 𝐂𝐡𝐫𝐢𝐬𝐭𝐢𝐚𝐧𝐢𝐭𝐲 𝐚𝐧 𝐬𝐚𝐰𝐢𝐡𝐨𝐧𝐚 𝐭𝐡𝐥𝐢𝐫𝐳𝐚𝐮𝐧𝐚 - 𝐈.

        July ni 15, 2021 khân, Victor dA scavenger YouTube Channel kal tlangin, tun laia rapper lâr tak G’Nie leh Delhi tlânga ţhuthmun rem chunga tunlai ţhangthar zinga Pathian thu chai thiam, Sacred Heart lama kan sikul kalpui ţhin Mafela-te’n, Atheism leh Christianity chungchanga inkawmhona an nei a. He inkawmhona hi thlirtu an tam hem hem hle a, mi 197,708 zetin he inkawmna hi an thlir zu nia!

Ţhangthar zingah Pathian awm rin loh chungchang thu leh, kan kristianna chungchang thu ngaihven an tamzia a hriat a. Chuvang tak chuan, Zoram mipui mai bakah kohhran hruaitu, Zoram hruaitute pawhin an ngaihven ţul tak a ni tih a hriat mai awm e. Zoram mipuite min barakhaih záwk tura, rapper G’Nie-a’n Pathian awm a rin loh thu a rawn tlângaupui khân, mi tam tak ngaihtuahna a rawn chawk tho a nih kha. 

Kha inkawmna kha tunlai ţawng takin a changkangin, an thu khel pawh a namailo hle. G’Nie-a’n a nuna zawhna chi hrang hrang a neihte chu, Mafela hnenah zawtin ani’n a thiam ang angin a lo chhang zel a. G’Nie-a buaina hi tunlai ţhangthar tam tak buaina, a rûka an nun eitu leh mi zinga an sawi chhuah ngam si lohte niin a lang tlat a. Chhanna mumal leh fel tak an dawng lo a nih vaih chuan, an hun kal zel tur thlenga nghawng thei niin a lang.

G’Nie-a hi Pathian awm leh awm loh hre lo, chhui phâk rual loh Pathian a nih ringtu (Agnostic) inti a ni a. Chuti chung si chuan, Pathian awm ring lo burtu (Atheist) a inti lawi bawk! Kan nitin nunphung, mihring khawsazia aţanga a han chhutin, Engkimtithei, hria, hmutu, hmangaihtu Pathian hi awm thei niin a hre lo niin a insawi. Tichuan, G’Nie-a buaina hi han hrut chho ta mawlh mawlh ila.

Engkim bulţantu Pathian a awm a, chu Pathian chu Kristiante Pathian a ni tih hi a pawm thei lo phawt. He thuah hian G’Nie-a hi a ngaihdan sawhsawntir a, Kristiante Pathian ngei hi engkim bul a ni tih pawmtir tura thu hla neih a har hle. Chutih rual erawh chuan nunna lo awm mai tur hian, Siamtu fing chungchuang tak, engkim tithei thawthâng, designer ropui lutuk awm lo chuan, tihpalh thil thu ngawtin Universe leh mihringte hi an lo awm ngawt thei lo tih hre tur khawp chuan, khawvel thiam finna tukverha dah phâk a ngai thung. 

Scientist ropui ber ber, khawvela mi thiam chungchuang lo piang tawhte pawhin an pawm a nih tlat vang a ni. Logic hmang pawhin hei hi chhut chhuah a har lo. Tihpalh thil thu liau liaua khawvel leh nunna hi lo awm palh ni ta se, zawng aţanga mihring hi lo piang ni ta ila, engvangin nge tun thlenga khawvel ang dang reng reng an la hmuh chhuah loh, engvangin nge zawng aţanga mihring lo piang kan la hmuh ngai reng reng loh, tih aţang pawh hian a chiang a ni.

Arsi tluklehdingawn chhiar sen loh zingah hian, khawvel ang reng reng awm miah lo hi tihpalh thiltu a lo awm a nih theih loh turzia kan chhut thiam mai em? A nih loh pawhin engvangin nge Universe dang a pian belh loh? Mihring ngaihtuahnain a chhut phâk lo kan tih reng lai hian, khawvel leh Universe insiam dan, vana arsi khing zozaite khawsazia khi hman hmanah Pathian chuan Joba leh Enoka bu kal tlangin min lo hrilh kilh kelh tawh zawk a.

Enoka bung hnihnaah chuan Universe chungchang thua Pathian Dân kan hmu daih tawh.

2) GOD'S LAWS 2.1 Contemplate all the events in the sky; how the lights in the sky do not change their courses, how each rises and sets in order, each at its proper time, and they do not transgress their law.

Joba kal tlangin, vanneihthlak takin Pathian ngeiin Enoka hnena vana arsi zawng zawngte hming a pêk dan te, an awm dan a rêl felzia thu a lo sawite ngei kha, Joba bung 38 chhovah a rawn nemnghet leh ta zel a. Heti taka chiang hian khawi sakhaw dang pathiante mahin thu sawi tur an nei ve ngai lo! Tihpalh thil thua he leilung hi lo awm mai a nih lohzia, a chhûnga nungcha leh thlai, thing tinrengte awm dan tur, êng leh thim chena an kawng tur a ruahman fel vek dan Pathian ngeiin ama kâ ngei hmanga Joba hnena a sawite hi, leilung dân hian vawi khat mah a la kalh lo mai hi lovin, tun thlengin an la zawm kim biai zawk a nih hi!

Heng thute G’Nie-a buaina, zawhnate hi an rawn chhang chiang a ni. Hnam hrang hrang thawnthua an pathiante’n Universe leh leilung indin dan an sawite leh, Kristiante Pathianin a sawi dan bik leh, tun thlenga vanthengreng leh leilung awm dan hi han khaikhin ngial pawhin, tu hi nge rin ber tur tih Logic hian min hrilh chiang a ni, mi anglo kan nih nghal ngawt loh chuan! Davida chuan, “Amah chauha thilmak ropui tak ti ţhintu…” a tih Pathian lo tu nge i han rin tur chu?

Tunah hian NASA chuan a khawl thluak ţha ber ber hmangin vanthengreng pumpui hi 3D Mapping an siam thei tawh a. Universe pumpui hi Glands an tih maiin a phuar khawm tlat a. Science hian zawi zawiin Pathian thute hi an rawn nemnghet chho tial tial tihte hi, kan chhiar thleng phâk ţhin emaw chu? G’Nie-a’n Big Bang an sawi lai khân, kha Big Bang lo awm hun lai taka sik leh sâ siamtu thahrui hlang hlak, God Particle, Dark Matter an tih bawk, mihringin CERN khawl hmanga an siam chhuah dante hi a chhiar ve tawh reng em?

A nih leh chu thahrui hlang hlak chu, engtin nge Energy ni chung si a, Mass a nih kawp theih a, hun rengin a thunun loh a nih theih? Mafela sawi ang takin, Bing Bang lai hian Time, Matter leh Space hi a ruala an awm a ngai a tih taka kha a ni! Chu zia chu Pathian zia a nihzia, zawi zawia an hmuh chhuah mek dan ropui lutukte hi, Einstein-a formula E=MC2 nena a inzawm daih dante hi chhiar teh se. 

Davida chuan Enoka bu mil thlapin, “Arsi tam chin a chhiar a, an hming a vuah ţheuh hlawm ţhin a!” a ti mai zawk a ni. Mihringin a awih leh awih loh erawh thu dang daih a ni. Hebrai ziak ang zawkin, “Rinnain a ni khawvelte (Universe hi khawvelte tiin an letling a!) hi Pathian thua siam a ni tih kan hriat ni” tiin Kristiante Pathian hi engkim siamtu a nihzia keini chuan kan pawm mai a lo ni. Kan uan dan leh chapo dante hi ka chhut ţhin. 

Ani chu thil a chhiar zauin a chhut peih bawk a, tiin tu emaw lam kan hawi ţhuap a. Finna leh hriatna zawng zawng awmna Baibul ber chhiar ngai map si lo, a chhûnga zawhna tinrengte chhanna awmzia pawh hre lawi si lo, mahse baibul kal tlanga chhanna rawn chhawptute thu lo awih leh duh bawk si lo kan ni tlatte hi kan khawlhna lai tak zawng a va ni chiang êm! Kan awih loh chhan pawh kan hriat tlem luat vang mai mai zawk a lo ni zel. 

G’ Nie pawh hian Mafela’n Matter, Time leh Space awm kawp ngai hmanga Kristiante Pathian rinawmzia a sawi kha, a hmêl han enin a hre thiam pha hlawl lo niin a lang. Ni lo se, Mafela’n he thu kan hriat hi chuan kan mur sung sung mai a ni tih awmzia kha a tawn (feel) phâk ve a rinawm tlat a ni. A chhan chu maw, mihring thiamnain a phâk ngai loh tur, Siamtu ropuizia leh thiltihtheih turzia kha, science hmangin a thawi faihin kan zuk tem phâk ve tlat vang a ni! 

E khai! An inkawmhonaa an thupui pakhat lek chai chhûng pawh a rei duh ngei mai. A dawt leha G’Nie-a buaina chu, Engkimtithei leh thil lo la awm tur pawh hre lâwk vek, mimal tin dam chhûng nun kalsiam pawh hre vek si Pathian hian, engvangin nge khawvelah hian tawrhna leh hreawmna a siam, engvangin nge sual khawvelah a awm, heti lo deuh hian khawvel hi a awmtir thei lo em ni, tih zawhna a lo awm leh ta a. Tin, mimal duhthlanna (free will) chungchang thuah an lut ta bawk.

Heng zawhnate hi mi tam takin an lo zawh tawh ţhin thote kha an ni a. Chuvangin, thil bulţhut tak tak kan zuk luhchilh a ngaih dâwn phah ta a ni. Engvangin nge Pathianin lei leh van bakah mihringte a siam? Pathianin mihringte hi a lên dunpui tur atâna a siam kan ni. Tichuan, an chenna turin he lei hi a buatsaih fel vek hnuah (mihring a siam hma ni 5 chhûngin mihring mamawh zawng zawng a siam zo hmasa zet a nih kha), he lei leh a chhûnga awm zawng zawngte enkawltuah a ruat ta bawk. 

Hetih hun lai hian khawvelah natna, tawrhna, rilru hreawmna engmah a la awm bawk hek lo. Tichuan, he lei hi mihringin a duh dan dan, Pathian inrawlhna tel hauh lova a enkawl tur a lo ni ta a ni. Chu chuan mihringah duhthlanna Pathianin a dahzia a tarlang nghal bawk. Mahse, Pathianin thil a tih reng rengin, kalphung (condition) fel tak a siam tel ziah ţhin a. Mihringte hnena condition a siam pawh, huan lai taka a chhia leh a ţha hriatna thing rah an ei tur a ni lo, tih hi a ni.

An ei vaih chuan Pathian nena an inzawmna a chhe nghal ang a. Pathian ngaihah an thlarau pawh thi a ni tawh bawk ang. Chu thu chu zawm duh lovin, Adama khân hre reng chungin Pathian condition siam chu a bawhchhe ta a. Thei rah a ei ruala thil lo thleng ta chu, he leia thuneitu ber a nihna kha, sual hnenah a hlan ta nghal a. Lei chu Setana lalna ramah a lo chang ta nghal bawk. Chu mi rual chiah chuan sual leh a sangawizawnpui zawng zawng; tawrhna, hreawmna etc te pawhin, he lei hi lû nghah nân an rawn hmang ta nghal bawk a ni. 

“Mi pakhat avangin sual khawvelah a lut a, thihnain ro a rêl ta a…” tih ziak ang khân. Mihring pawh nâ tuar thei, hreawm hria, thi thei a lo ni ta nghal bawk. Heng zawng zawng lo thlen chhan hi Pathian vang a ni lo tih G’Nie leh Mizo Atheist zawng zawngte hian an hriat atân a ţha hle. Bawhchhiatna avanga mihring chunga Pathianin thlentir a phal tak, sual leh a sangawizawnpui thil zawng zawngte chu, Rome lehkhathawnah chiang takin Paula’n min hrilh ta a. 

“Fel lohna zawng zawng, sualna, duhamna, suahsualna, itsikna, tualthahna, inhauna, bumna, nungchang ţhat lohna, mi rêl hmangna, se sea thu lakna, intihveina, chapona zawng zawng…” Hengte hian mihring min luah ta a ni. Engvangin nge Pathianin a phal? A tirah condition neiin he leia cheng turin mihring a siam kan ti a. Chu condition bawhchhiatna chu hremnain a zui ngei tur thu pawh chu condition-ah chuan a awm tel tlat vang a ni. 

“Pathian hre siin Pathian angin an chawimawi duh lo, lawmthu pawh an sawi hek lo. Thil lawilo an ngaihtuah ta zawk a…” tiin bawhchhiat hnua mihring nuna thil thleng zawng zawng Paula hian min hrilh kilh kelh ta a ni. Chuvangin, hnial hrat chana chan tumna vang leh, hriat lohna vang liau liau zawkin, he leiah hian tawrhna leh hreawmnate hi Pathian awmtir, Pathian siamah mihring hian a puh leh mai ţhin a ni zawk. Solomon-a chuan, “Pathianin tluang taka nung turin mihringte a siam a, anni erawh chuan an tikhirhkhân zo ta vek a” a lo tih phah ta reng a nih zawk kha. 

Heng zawng zawng lo awm theih chhan chu, mihring bawhchhiatna vang liau liau a ni zawk. Adama khân bawhchhe lo se, he khawvel hi Eden Huan nun ang, nat leh hreawm reng awm lohna, thihna pawh awm lohna a la ni reng dâwn a ni zawk. Nuihzatthlak ang reng tak chu, Pathian awm ring hauh lo khân, Meidila tlak chu a hlau hle tho a. Meidila tlak ai chuan, robot nih thlan theih ni se, robot nih a duh zawk dâwn thu a sawi a nih kha. 

Tichuan, G’Nie-a’n Pathian hian tawrhna leh hreawmna tel miah lovin Pathianin khawvel hi a siam thei si a, engvangin nge a siam loh, tih zawhna a neih pawh chhanin a awm ta a nih hi. A tirah Pathianin khawvel a siamin, a thil siam engkim kha ţha a ti vek a. Kan sawi tawh angin tawrhna leh hreawmna mai bakah, thihna reng reng he leiah hian a awm bawk hek lo. G’Nie-a hian a hriat ţhelh tak êm êma chu hei hi a lo ni ta bawk. 

Khawvel hi hreawm tur reng, tawrhna ram ni tur renga Pathian siam, dân a zam niin a lo hria a, a sawi bawk a nih kha. Mahse, hriat ţhelh a ngah ang reng hle. Solomon-a thu sawi pawh a hre ţhelh fu bawk. Mihringin a duhthlanna a hman dik loh tak avang liau liauin, he lei hi hreawmna leh ţahna ramah, hmun khirhkhân takah Solomon-a sawi angin mihringin a lo siam ta zawk a ni e. Hei hi kan la pawm duh lo a nih chuan, kan thu thu ni rawh se.

A dawt lehah chuan G’Nie hian mihringte hian Free Will kan nei lo a ti leh a. Kan duh reng vanga lo piang kan ni lo a, kan pianna hmun, kan seilenna hmun, ka kawr hak duh zawng, ka ei duh zawng tinrengah, duhthlanna ka nei lo a ti leh bawk. Tin, ka nuna thil thleng reng reng hi, a hma lama thil lo thlengiin a nghawng chhuah vek an ni a, chutiang mi Determinist chu ka ni e, a ti bawk. Hei hi thutaka lak tlak a ni em tih G’Nie nun aţang hian kan la en dâwn a ni.

Lir a lo nghing ta phut mai a. Kan chenna in a chim a, mahse engmahin min delh lo hlauh mai. Chu hunah tak chuan dam khaw chhuah duha hmun him lam mihring tawh phawtin a panna hi, Free Will chu a ni ta mai a ni. Hmun him lam pan tura ngaihtuahna min neihtirtu kha, keima thu a ni lo. Lir a nghin miau avangin, inhumhim turin hmun him lam panin ka tlanchhe mai a ni zawk, tiin G’Nie hian a nihna sawi fiah a tum ngial a ni ber. 

Mihring rilruah a chhia leh ţha hriatna thing rah eina chuan, ama tâna chhia leh ţha thliar hran thiamna a neihtir tlat tawh a. Chuvang tak chuan, lir a lo nghin pawhin, a nunna humhim turin hmun him pam pan nachâng a hriat phah ta reng a. Chu chhia leh ţha hriatna erawh chu, duhthlannain a zui tlat tih hi, thu dik chatuan tur chu a ni. G’Nie erawh chuan, ka duhthlanna a ni lo, lir a nghin vang liau liau zawkin, ka nun humhim turin hmun him lam ka pan a ni zawk a ti ta tlat mai a ni, tiin kan sawi thei ang.

Lir a lo nghin a, hmun him a awm a ni tih hriattirtu chu a chhia leh ţha hriatna kha a ni a. Mahse, chu hmun him pantirtu zawka erawh chu, a duhthlanna liau liau a ni. A duh chuan, hmun him lam a pan lo thei a. A duh chuan che sawn miah lo pawhin a awm reng thei bawk. A duh leh a mu thei a, a duh leh a âng phuau thei bawk. Chung zawng zawng tihtirtu chu Pathianin mihringa duhthlanna a dah hi a ni a, chhan dang pakhatmah a awm thei lo. Insawi mak tumna leh inlak dangdai tumna satliah mai mai niin ka hria. 

Mafela pawh hian, “I nuna choice i siam hi tu siamtir che nge?” tiin a zawt ta reng a. G’Nie hian ngaihdan neihtirtu sawi lang lo mah se, mi pakhat thu sawi a rawn tarlan zauh danah, ngaihdan neihtirtuah mihring a hmang tih hai rual a awm lo. Chu pawh chu duhthlanna tho a ni. Mihringah duhna lo awm hi a hrang hlak a, chu duhna kan thlanna taka chu duhthlanna hi a ni e, tiin G’Nie hian a sawi a ni ber awm e. Mihringa duhna leh duh lohna awmtirtu zawka chu, mihringa a chhia leh ţha hriatna a ni tih chiang takin kan sawi tawh kha. 

G’Nie-a buaina bul chu tihian lo sawi leh ta ila. Mi pakhat hmaah arsa leh vawksa an rawn chhawp ta a. Arsa aia vawksa a thlanna kha a duhthlanna chu a ni ngei a. Mahse, amahah khân arsa aia vawksa tui tihtir zawktu thil awmsa a lo awm avang zawk chauhin, vawksa kha a thlang ta a ni. Chuvang tak chuan, a duhthlannaa vawksa kha thlang ta ni lovin, amaha vawksa duhna lo awmtir hmasa zettu zawka vang khân, amahah duhthlanna a awm lova ni, tih hi a ţanchhan bul ber chu a lo ni ta a.

Kan ţhiannu pakhat hi sa duh tak mai a ni a. A kâah chuan eng sa pawh a tui vek mai. Mahse, vun hrisel ngaina tak mai a nih vangin, vawi khat chu daktawr a inentir a. Vawksa hrisel lohzia leh vunin a ngeih lohzia alo hrilh tak nék avangin, tun thleng hian sa lam chi reng reng a ei duh ta lo bur mai a. Restaurant-a han hruai nikhuate hian a ngeiawm duh phian! G’Nie-a ngaihdan angin kan chhui dâwn a nih chuan, engtin nge ka ţhiannuin duhthlanna a siam hi, a duhthlanna a ni lo kan tih tak ang?

G’Nie-a hian Determiners/Determinist nia a insawina hi, lehkhabu a chhiar aţanga amaha inhmehbel ta mai a ni tih a chiang hle a. Lehkhabu ţhen khat a chhiar aţanga he rin dan hi pawm ta mai a nihzia, a thu sawi aţang khân kan hre thei ang. A chhan chu, a thu han sawite reng renga kha, ziaka chhiar tur an awm del dul vang a ni. Tin, baibul hi a chhiar ve ţhin niin lang mah se, Solomon-a thu sawi leh Pathian thu a hriat dan a han sawi chhuahte aţang khân, Pathian thu hi a chul ram fan thuak thuak a.

Hriat chianna tak tak a nei lem lo tih a hriat hle bawk. Tichuan, lehkhabu chi hrang hrang, baibul tela a chhiarna aţangin, a rilruin a awn ber lam a hawi a. Tichuan, Determinism-in Pathian chungchang leh a thil rêl dan a sawi ang kha rawn sawi chhawngin, a buaina bul ber angah a rawn hmang ta tih, Determinism chungchanga thu ziak kan hmuhte aţangin a hriat theih ta bawk. Baibul-ah chiang lutuka thil bul inziak pawm ai chuan, mi ţhenkhat rin dan leh pawm dan kha a pawmpui ta mai a ni tih kan hriat vek ka duh.

Problem of Evil tihte kha a thupui ber anga a sawi laiin, heng thute hi Dertimism kaihhnawiha an thu khel ber pakhat a ni tih, lehkhabu i chhiar zau ik chuan i hre thei nghal ang. Ama irawm chhuak thu hla pakhatmah kha inkawmnaah khân a rawn aupui lo tih hi Zoram mipuite’n kan hriat ka duh bawk. A chhan chu, a thu hla reng rengte kha Determinism kaihhnawiha an thu khel hlir a nih vang a ni. Chu chu Zoram ţhalai rual, mi nuai 2 chuangin an an ngaihven ta êm êm mai hi, a tha nat thlak ta êm êm a nih hi!

“An bengte chu thutak lamah an chhu ngawng ang a, thawnthu lam panin an peng tawh ang” tia Paula’n hun hnuhnunga ţhangtharte awm dan tur a sawi kha, kan rama ţhangtharte nun chiah chiah hi a rawn ni ta. Nu leh pa tam tak hian, an fate khawsazia leh ngaihven zawng hi an hre ta lo êm êm niin a lang. Khati khawpa thu vuvuk an ngaihven lai reng khân, Youtube kal tlang vek hian thutak Pathian thu, nitina ringtu nuna kan mamawh ngawih ngawih chungchanga inkawmna chhawp chhuaktu an awm ve bawk.

Mahse, chung inkawmnate erawh, heng ţhalai nuai 2 chuangte hian thlir enah pawh an en si lo. Boralna lamah chak takin an pen fua fua ta zawk a nih hi. Miin Pathian thuin chiang taka engkim min hrilh fiahna a pawm duh miau loh a, Pathian siam mihringin a ngaihtuah chhuah ve leh chhawng rin dan leh pawm dan a neih lam a hawi miau chuan, Pathian hmaa thiam kan chan nâna vawi khat vaukhan chu kan tih theih tâwk a ni ta mai a ni. 

Ţhangtharte thinlungah miin min hria se, ka ngaihdan leh rin dan hi hi hria se tih ngaihtuahna, mahni indah pawimawhna a thleng nasa êm êm a. Heti taka kohhran uap a natna ram ni lo phei ila chuan, Scientology tih leh rin dan hrang hrang lam awn duh mai tur ţhangthar kan ngah turzia, mi aia danglam châkna leh mi langsâr nih kan duh huam huamzia aţang hian a lang chiang hle. Chuvangin, engmah hi zahah pawh kan la duh tawh lo.  

Determinism hian Pathian thu leh Pathianin mihring a siam dan zawng zawng a kalh fai vek tih, ţhalai rualte hian kan hriat ka duh hle. Thil reng reng, a hma lama thil lo thleng tawhin, tun huna kan awm dan zawng zawng rawn thunun ni ngat se, robot nen danglamna reng kan nei lo ang. Computer nen angkhat reng ka ni tihna a lo ni bawk ang. Mahse, chutiang mai maiin miohringte hi Pathianin min siam lo tih, Lal Davida-te ang kha chuan an lo hre chiang êm êm a.

Determiners rualte’n ramsa nena danglamna reng nei lo (an sawi anga duhthlanna kan neih si loh a, thil lo thleng tawhin tun huna kan awm dan zawng zawng a thunun a nih si chuan, duhthlanna neia siam ni lo, ramsate nen danglamna reng kan awm lo) anga min chhuah lai hian, “Ani chu Pathian aia hnuai deuh chauhin i siam a. I kutchhuak chuangahte hian thû i neihtir a” tiin Davida chuan kan nihna dik tak min hrilh hi, keini chuan lâwm takin kan pawm mai tur a ni zawk. 

Heti chinah hian duh tâwk phawt ila. an inkawmna hi a thui tham deuh avang leh, an thu chai ţhenkhatte hi tawi fel taka chai theih an nih loh avangin, vawi hnih khat maia he inkawmna hi chinfel theih rual a ni lo. Hei erawh hre reng ang khai. Mi a mangan takzet a, mihring aţanga ţanpuina beisei tur pakhatmah a awm tawh loha, thihnain min ban zuai zuai meuh hi chuan, “An thinlungah chuan chatuan a dah a” tia Pathian thu sawi ang takin, mihring hian a awm pawh a rin loh Pathian lam a hawi leh nge nge ţhin! 

Paula chuan Tita hnenah, “Rin hran nei mi chu vawi hnih khat zilh hnu chuan, zilh duh tawh suh. Chutiang mi chu kal pengin a sual a ni tih a inhria e, amah leh amah thiam loh a inchantir a ni si a” a tih hi, Pathian awm ring lo mi langsâr pui puite’n an thih dâwn ruaia an duh lo chung, hlau leh khur chunga khawvel mihringte min thlah nâna an Testimony, a tawpkhâwkah meuh chuan Pathian awmzia leh tisualtu zawk an nihzia an lo puan chhan a ni si a!