𝐊𝐚𝐧 𝐫𝐚𝐦𝐚 𝐏𝐚𝐬𝐭𝐚𝐰𝐫 𝐚̂ 𝐚𝐰𝐦𝐜𝐡𝐡𝐮𝐧 (?)

        Zofate’na kan ngaihsan sap ramah, in leh lo din fel diam tawhin chhûngkaw member tinte lahin, eizawnna puitling tak tak an thawk ţheuh a. Zoram tlabirha chengte ai thlawt zawngin, khawvel thil tak pawhin an nuamsain tudang an ngai bik lo. An hma lam hun tur lah a êng nuamin, sap ram khua leh tui nihna lah an nei vek tawh bawk si.

Mahse, heng lei ropuina leh nawmsakna zawng zawngte hi, thawklehkhatah hnawl thutin Zofate’na an ngaihsan loh ber leh an nuihzat buaipui turin, sap rama an thil neih zawng zawng ti ralin Zoramah a rawn haw ta thut a! Chu mai a ni lo, a nupui fanaute pawhin an duhthlanna thiang tak kal tlangin chutia pa berin thutlukna dangdai tak a siam chu, an thlawpzui ta vek bawk!

A fanute lah pasal nei mai tura intintuah uaih uaih tawhte an ni a. Zoram lamah lah chuan in leh lo ding sa leh nuam an nei a zeng a ni bawk si lo. Mahse, sap rama an eizawnna zawng zawng, an in leh lo, an pasal turte nen lam kalsanin, Rev Dr Zaichhawna Hlondo leh a nupui fanaute chuan kan ramah vahvaih an rawn thlang ta tlat mai a nih hi!

Han ngaihtuah ngial pawhin, a thiltih hi a atthlak a nih hi! Kan rama pastawr ţhenkhat, Pathianin a kohna ata dinhmun ţha zawk luah duha sawrkar hna pawimawh thlang ta te, an pension hnu ngaihtuaha Revenue Dept lama lêng du du ţhin te, an chhûngkaw khawsak chhuanlama thuneitute hnena therhlo (contract) hna diltute nen chuan an inang lo takzet a ni.

Sap ram chhuahsana Zoram an rawn pan chhan ber an han buaipuite chu, mite’n an nuih liam mai mai a. Fiamthu thawh nâna lo hmang pâwlte lah bo hek suh. Zoram an rawn chuan chhuah chhan an han buaipui kawngah lah, phungbawm leh sangawizawnpui tur mi chhe te te an hmu zo ţâwk a ni ber a. Mi pangngai chin chuan an tukhum an chhawn hmak hmak a ni ber.

Mahse, kan Pastawr-a leh a chhûngkuate hi vawi khat pawh, a hnungtawlh zawng leh an thim tum bansan zawngin an la khawsa ta ngai reng reng lo a. Thenzawlah Zorama biak in lian ber sain an thawk chhuak awl lo a ni zawk si a. Nimin deuh maiah lah, pa ber chuan kohna dangdai tak a han dawng zui a. Zorama lal ber hnenah lênglutin, Zoram hian saiip puan sinin sual thupha chawina kan nei tur a ni tiin, ke ngatin Aizawl aţangin Thenzawl thleng Zoram sual phurin ke a han pe hmasa tak deuh deuh a nih kha! 

Reverend satliah mai ni lo Doctorate Degree hial nei pha ni si, a khawsak duh dan hi ral thlirtute tân chuan, a chiang lo deuh a ni lo maw tih mai tur a va ni chiang êm? Kan rama mi tam zawkte’n an awih loh leh an deusawh ţhin Zoram Thar buaipui tura, engkim kalsana Zorama rawn chuan chhuah ngawt  mai hi, mi pangngai tih duh loh tur thiltih a va ni mawlh e! Mahse, Pathianin a kohnaah a chiang mai a ni lo, a fate pawhin Pathian hnen ata fiahna an hmuh zet hnuah, pa ber hnung an rawn zui ngam a nih si hi.

He kan Pastawr leh a chhûngkaw chungchang thu kan ngaihtuah châng hian, a châng phei chuan Nova ang mai kha niin ka hre ţhin. Tuma phûrpui loh leh ngaihven hlawh lovin Rev Zaichhawna hian lawng a tuk mawlh mawlh mai a ni si a! Nakin lâwkah chuan tute hian nge kawng dik zawh a, tute hi nge ti sual zawktu tih a lang chiang thuai dâwn a ni. 

Hei leh chen sawrkarin min khungbeh tawh hnuah pawh, kan Pastawr-duhawm leh smart pui puite’n, Zoramin Pathian laka tihtur kan neih chungchang thua Pathian hnen aţanga pawlna leh hriattirna pakhatmah an la dawn loh lai leh, lûngmuang taka kohhrante min thlahthlam an awlsam êm êm reng lai hian, Zoram damna tur, mimal leh khawtlâng damna tur, Pathianin Zoram tâna ruahmanna a neih a rawn hriattirna Pastawr hi, a thuchah kente nen hian ngaihven tlâk ber a lo ni reng lo ang tih kei chuan ka sawi ngam ta lo!