𝐈𝐧𝐤𝐡𝐚𝐫𝐤𝐡𝐢𝐩 𝐭𝐡𝐮𝐭 𝐥𝐞𝐡 𝐍𝐠𝐚𝐰𝐥𝐯𝐞𝐢 𝐡𝐫𝐚𝐧𝐠 𝐡𝐫𝐚𝐧𝐠 𝐧𝐮𝐧 𝐢𝐧𝐦𝐢𝐥 𝐥𝐨 𝐳𝐞𝐭 𝐡𝐢 !

“Nichin lâwk khân an ţhukhawm a, naktuk zing dâr 4 aţanga kâr 1 chhûng inkharkhip tur a nih chu” tih thu lo thleng thut thut ţhin leh ngawlvei chi hrang hrang veite nun inrem lohzia hi, Leiţha khua ârpa hlui sen zai thiam an sawi ang maia titi-ikpui tham zu awm a maw le! Nitin peg hnih khat tel miah lova khawsak thiam lo, no hnih khat tal lem loh chuan mutmu pawh tuah hlei thei lo tân, chuti teh thuta inkharkhip chu Waterloo indona hmuna tluk luh ang maia hun khirh nanchilh ang a ni.

Rang takin sum ngaihtuah a ngai nghal a, zu awmna hmuna liam thlak thuai a, mite lak zawh hma ngeia zu lak khawl chu van agenda aia a nepna a awm bik chuang lo. Mahse, sum lakluhna hnâr pawh nei hlei lo, nitin ngaihtuah chawpa zu in mi tân chuti maia awlsama zu lei chu thil tihtheih a ni ngawt si lo. Vawi leh khatah ngaihtuahna zawng zawng chu, “Engtin nge zu ka lei khawl theih ang?” tih zawhnain luah khat nghalin, pawipang dang reng reng ngaihtuah theihna, he khawl ropui thluak hian zu nei thei ta miah lo a!

Chutiang bawkin ruihhlo ngaite pawh he harsatna tho hian a lo bawhbuai ve nghal zat a. Vawi khat lek pawh shot nghei chuan, tawrhna (suffer) namênlo tak lo thleng ngei tur huphurhawm lutuk avangin, râlpui ber phiara damdawi lei khawl dan ngaihtuaha phi nghal chéng chu, he inkharkhip thut nghawng chhuah a rawn ni ta nghal mai a ni. Mahse, a hma ang bawkin sum ngaihtuah a ngai a, hetiang rikrum thilah tu berin nge lei tur nei ang tih ngaihtuah tel a ngai nghal bawk! 

Hetia ngaih mai chuan, inngheina hun ţha tak a lo her chhuak a ni mai alawm kan ti a ni thei e. Mahse, chuti maiin zu leh ruihhlo hi nghei theih a nih tlat loh avang leh, ni khat lek pawh tih loh chuan taksa leh ngaihtuahna lama tawrhna nasa tak a thlen bawk si avangin, tumahin nghei thut hi an zuam lo reng a ni. Inkharkhip tur tih a rik rual chiahin, zu leh ruihhlo man a han pung nghal hluai bawk a. A hma pawha harsa ang reng taka lo rui ve hram hram ţhin tâna tawrhna lo thleng thut hi, chipchiara sawi lovin lo suangtuah ve mai rawh.

Tihian inkharkhip leh ngawlveina chu a tawp ta mai emaw i lo ti ngawt ang e. Inkharkhip rual chiah hian kohhran kal tlanga rawngbawlna zawng zawng tihtawp a ni ve nghal zat a. Rawngbawl ngawlveite nuna tawrhna nasa tak lo thleng ve nghal hi, mi tam tak suangtuah thiam phâk bâka hreawm a ni tlat a ni. Nun a zawi zova, thlarau nun a khawro nghal huam huam bawk. Tihtur ber a awm miau loh avangin, nun dan thiam a harsa nghal êm êm a. Khawvel mite’n an tih ang apiang lo tih ve ngawt lah a rem si lo.

Rei rial lovin beng a za a, TV kal tlanga thu sawi ngaihthlak a tui thei lo nghal bawk. Baibul chhiar leh fianrial ţawngţai nuna luh tumin han bei sateh mah ila, minute 5 chhûng lek han inlakbing pawh thil harsa lutuk a ni nghal thuai mai. Kâr khat a liam meuh chuan taksa leh ngaihtuahna a khawvel hrû tawh mai a. Khawvel lak ata koh hran kan nihna lantir pawh thil harsa ber a ni chho ta bawk. Rawngbawl ngawlveina a nih miau avangin, thu sawi ngaihthlak leh Zoom kal tlanga inpawlkhawmna tih vel mai maiah tleina kan hmu zo ve bawk hek lo. 

Kohhran ngawlveite pawhin awmngaihna an hre lova, awm dan lah an thiam bik bawk hek lo. Tihtur hriat loh luat avangin ni a rei a, zan a sei ngawih ngawih bawk. Biak in han thlir ila, a ro ngawih ngawih hian a hriat a. A chhûngahte chuan han lut vel ţhin mah ila, in zau pui ruak huau ang mai a lo ni a. Engmah min han khawih chetu leh min chet chhuahtirtu reng kan hmu zo lo a nih hi. Prawkrem khalh kal ngawl veitute nen an khawngaihthlak dan leh, an hreawm tawrh dan hi a inchen vel reng awm e.

A tir lamah hun rei lo tê chhûng tihtur han siam chawp mai chu a theih nameuh mai. Mahse, kâr a han liam meuh chuan tihtur han rawt chhuah thar apiang, SOP tih thumal hian a rawn chhilh zat zat zel si. In lamah mahni chauha khuang ben tleng tlenga zai tihte chu sawi mai a ni, a takin a nunpui theih hlawl loh. Thlarau nun ro tial tialin tisa lama nghawng a neih a rawn lang chhuak thuai a. Mission Field a ni emaw biak in hnaiha cheng nih emawin awmzia a nei thei tawh lo. A zawi hian kan zawi ngawih ngawih reng a ni ber! 

A tawp berah nitin Pathian nena lên dun ngawlveite an lo lang ve ta thung a. Rawngbawlna tih thumal te, kohhrana inhman tihte hian a tihbuai ve phâk loh nun nei an nih tlat avangin, leh pian dan tur dik taka piang, siam an nih chhan ang taka nung, Siamtu lungawina nun neitu an nih avangin a hma zawng aiin khawvel a thim chhah poh leh an êng a langsar a. Hreawm a nasat poh leh an tuihnâng ting mai a ni. Thil dang zawng aia Pathian nena lên dun thlang bertu an nih miau avangin, a bak engkim Siamtu’n an mamawh bak thleng thlengin a pêk belhchhah a. 

An awm mai mai pawh an kianga mite tân malsawmna, inhnemna, ţanpuitu kut chak an ni zel a. Khawvelin a pêk theih loh Lal Isua kal tlangin thlamuanna, zalenna, chhûngril nun ruak hnawh khattu an neih miau avangin, mi tin awh rawn an ni ta a ni. Hetiang mite hi kan ramah za-a sawm pawh kan awm ngut ang em tih tur an nih lawi si avangin, thlo tle anga hmun tina hmuh tur an awm lo lai erawhin khua an tihar zo a. Lung an tilêng váwng váwng mai a ni. He inkharkhip thut thutna nun leh ngawlveina chi hrang hrang veitute nuna thil lo thleng hi, a namênlo tih bak sawi tur kei chuan ka hre ta lo e.