𝐋𝐚𝐥 𝐈𝐬𝐮𝐚 𝐥𝐨 𝐥𝐚𝐧 𝐡𝐦𝐚𝐚 𝐦𝐢𝐭𝐭𝐡𝐢𝐭𝐞 𝐤𝐡𝐚𝐰𝐢𝐚𝐡 𝐧𝐠𝐞 𝐚𝐧 𝐤𝐚𝐥 ?

 

            Mi tam tak hriat châk, zawhna khirhkhan tak, Baibul-a chhanna chiang lem lo taka lang zeuh zeuh, Lal Isua lo lan hma zawnga mitthite, ringtu leh ring lo mite kha khawiah nge an kal tih zawhna hi, tun ţum hi i han chaiho dâwn teh reng ang. Pilata’n Rom lalber Tiberius-a hnena lehkha a thawn ka han tarlanah khân, Lal Isua thih laia mitthi tam tak thlan aţanga an lo thawh thu, Baibul thu nena inmil thlap chanchin a va hrilh thu kan hmu a nih kha.

 

            Baibul kan en chuan, Lal Isua kraws lera a thih ve leh thlante lo inhawngin, mi thianghlim muhil tawhte thlarau tam tak kaihthawhin an awm ta a. Lal Isua thihna hneha a lo thawh leh hnu khân, heng mi thianghlimte thlarau hi khaw thianghlimah an lut ta tih Matthaia chuan chiang takin min hrilh. Chuti a nih si chuan, Thuthlung Hlui huna ringtu thi tate zawng zawng kha Lal Isua lo lan hma loh zawng, thlanah phumin an awm tihna a ni.

 

            Matthaia ziak aţanga kan hmu leh hriat theih bawk chu, Thuthlung Hlui huna mi thianghlim thi tate kha van ram, khaw thianghlimah an thlarau hruai chhohin an awm lo tih hi a ni leh bawk. Lal Isua a thiha a thawh leh hnuah chauh Khaw Thianghlima an luh thu Matthaia hian a ziak chiang hle a nih hi. Chuti a nih si chuan, mitthi khua kan tih hi eng ang nge maw ni ta chu le? Lazara leh mi hausa thi tate thlarau dinhmun kan enin, mi zawng zawng chan a inang hauh si lo.

 

            Matthaia hian ring lo mite thlarau kaihthawha an awm thu a sawi lang ve hauh lo bawk. Lal Isua lo lan hma zawng tu mahin thihna an ngam lo, mi pahnih chauh lo chuan. Enoka leh Elija-te chauh lo chuan thihna an tem vek tih Thuthlung Hlui kan en chuan kan hmu a. Mi fel Joba leh ka thinlung ang pu mi ti meuha a chhal Davida-te ngei pawh thihna chuan a ângchhûngah la lutin, mitthi khuaa an kal thu kan hmu a nih kha.

 

            Thuthlung Hluia thihna chungchang sawi lanna reng rengah, lei hnuaia mitthi khuaa an kal thu, an kal dâwn thu kan hmu zel a. Mitthi tate pawh muhil tia sawi an ni ţhin. Thupuan kan en chuan, Thihnaa leh Mitthi Khuaa tih thu kan hmu a. Mi sawina an ni tlat tih kan hmu thiam em? Setana ţhuihhruai ramhuaite zingah mi zawng zawng zûk hlumtu thlarau sual a awm a. Chu thlarau sualin a zûk hlum zawng zawngte lo tuamhlawmtu mitthi khuaa, Setana tirhkoh tho a awm bawk tihna a ni.

 

            He thlarau sual pahnihte hi, Lal Isua lo lan hma loh zawng tu mahin an ngam loh an ni a. Nimahsela, Lal Isua a han thiha a rawn thawhleh chiah khân, Thupuan vek kan en chuan, “Thihna leh Mitthi khaw chabite chu ka nei ta bawk a” tiin, heng thlarau sual pahnihte hi a rawn hneh ta a. Lalpa mi, mi thianghlim thi tate thlarau an chelh beh reng, tan ina an tantirte kha Lal Isua khân mitthi khuaah zuk kalin a zuk chhuah zalen ta a lo ni.

 

            Chu thu chu ka rin thu mai em ni? Ni lo, Petera ziak kan en chuan, “Tan ina thlarau awmte hnenah chuan thu a zuk tlângaupui” tiin, Lal Isua a thih khân a awm mai mai loh dan, ni thum leh zan thum chhûnga a thiltih min hrilh tlat a nih hi. Roman Catholic kohhrante chuan mi an lo thih hian, mitthi khuaah Pathian ţangchhûngah a mite chu an chawlin an ring tih, an kohhran rin dan kan chhiar chuan kan hre thei.

 

            Near Death Experience tawngtute tawnhriat kal tlanga kan hriat theih bawk chu, ring lo mite an thih hian hmun pakhat; beiseina reng reng awm tawh lohna hmun thim zawl duaiah, lûngngai takin eng emaw nghah neiin an awm niawm tak a ni. Tin, mitthi khua hi Baibul kan en chuan lei hnuaiah a awm tih sawi a ni zel bawk. Mi thiamte chhut dan chuan lei hnuai, lei kawrawng chhûngah hian mihring lo piang tawh zawng zawngte, thawl taka kan awm len theihna hmun zau tak a awm bawk.

 

            Aw le, Lal Isua khân thihna leh mitthi khaw chabi kawltu ni turin thihna a tem zet a. Tichuan, mitthi khuaah zuk kalin Chanchin Ţha a zuk tlângaupui a, tan ina mi thianghlimte thlarau thihnain a tantirte thlarau pawh a zuk chhanchhuak ta bawk. Chuvang tak chuan thihna hneha a thawh leh hnu khân, “Lei leh vana thuneihna zawng zawng ka hnenah pêk a ni tawh” tiin a thuneihna a puangchhuak ta reng a nih kha. Tunah erawh Krista-a mitthite chu lei hnuaiah ni tawh lovin, khaw thianghlimah an thlarau lak chhohin an awm ta zel a lo ni e.