Literary Piece!
Min la ngai ve thin ang em le?
Tih ngaihtuahna lo awm thin chu,
Engvanga chutiang ngaihtuahna,
Lo piang nge tih ka ngaihtuah thin!
Literary Pieces!
An thusawi apiang thinlung tak tak a,
Ti tak tak thin mite dinhmun dik tak;
An nihna ang chiah chiaha midang te;
Ni ve tlat tura ngaihna avang a,
Vawiduai lo an nat vawng vawng thin ni le!
Literary Piece!
A hmangaih hmasa phawt zawng a ni e,
Chumi piahlamah nitin amah chu;
Hmangaih zui zel a thlang a ni zawk si,
Duhthlanna, hmangaihna chawm thautu chu!
Literary Piece!
Hmeichhia chuan a hmelthatzia hrilh hretu,
Mipa sang tam tak nei thin mahse la;
Thinlung taka fakna a ngaihthlak erawh,
Mipa, a hmangaih ber fakna a ni si!
Literary Piece!
Hringnun khawvel, a hmei a pa tin ten,
Hmangaihna chaka an phi ruainaah;
Mahni pawh inhmangaih thiam hauh lovin,
A hmangaihna a hlan che anih chuan;
Fimkhurna chuan i nun venghim rawh se,
Kawr neih loh vanga saruaka awmin;
Phal taka kawr hak tur pek tum ang chauh,
A ni dawn si a, fimkhur mawlh rawh khai!
Literary Blank Piece!
Hringnuna nat vawng vawngna lo thlengah,
Thinlung chuan englai pawn damna lam kawng;
Natna laka fihlimna hre mahse,
Ngaihtuahna chuan thinlung duhdan kalhin;
Ring takin thu a sawi chamchi si thin,
Natna laka dam intanna bul leh;
Tawp chu ngaihtuahnaa awm a ni e!
Literary Piece
Hre reng rawh i natna chhan bulpui chu!
An duh vang rengin an bum thin che a,
An theih vang rengin dawt an sawi thin a!
I manchhuah tak avangin tunah lem,
I ngaihdam dilin an hmanhlel leh si!
Englai pawn in nun hmandun chungchang hi,
Nangma chungchang thu a ni ngai lo ve!
Heti ema chinphar kual tur hianin,
I hringnun sawisaka awm phal ngai suh!
Literary Piece!
Tu chuan nge rilru natna tawp thlen che,
Tu chuan nge thinlung kehsawmna thlen che;
Tih chu thil pawimawh ber a ni lo ve,
Tu chuan nge i hmaifangah hlim vanga;
Nuihmel mawi lantir leh thei zawk tih chu,
Thil pawimawh ber a ni tawh zawk si a;
Rilru chu na theia siam a ni a,
Thinlung pawh kehchhe theia duan a ni;
Chuti ema natna thlentu che chu,
Rilru zawng zawnga i hmangaih theih chuan;
I hmaifanga hlimna thlen leh theitu,
I hmangaih nasat dan tur ngaihtuah rawh!
Literary Piece!
Darkar bi tam liama kan inbiak thin,
Tunah heti hi kan inbiak dan maw?
Chungturnipui meuh pawn Chhawrthlapui hi,
A hmangaih vangin zanah a thim hi!
Nang ngaih vanga lunglenna tuifawnah,
Chhantu nei lova ka tlak tak ni le!
Time Literary Piece!
Thinlung taka ngaihsakna ka neih hun,
Lawm tlang taka kan inthian tawnna hun;
Ka thlarau lam an saruak vekna hun,
Dan khermei lam tihtlawma an awm hun;
Hringnun tawnhriat duhawm kan chen dun hun,
Tawnhriat duhawm ten mual an liam zawh hun;
Tun hun, tun hun ngei hi a ni ta e,
Zamual liam atan tawnhriat kan vuiliam hun!
Love Literary Piece!
Nula hmeltha tak a ni si a,
Chuvang chuan rim mi a ni e;
Hmeichhia anih tlat si avangin,
A thinlung hneh mi a ni ngai e!
Aw, ka thinlung awrawl chu hre rawh!
I chunga ka mit fuk phat ata,
Ka thinlung chu i hman atan ngei;
I lam pana a rawn thlawk tak hi!
A Literary Piece!
He khawvel ram zau leili tamah,
Hringmi kara titi-na duhawm ber;
Hringfa ka-in zalenna pumhlum nen,
A sawhkhawk engmah thleng ngai dawn lo va;
A duh ang ang a sawi theihna mi leh,
A sawi ngamna ngei chu a ni si a!
A Literary Piece!
Hringnun dik tak chu ruahpui nasa tak,
A buak hawk hawk laia inchhung hul leh;
Hmun him atanga lo ral thlir lo va,
Ruahsur buan buante nena zaikhat leh;
Rem taka lamdun thiam hi a ni zawk!
Nipui sat vanglai, hringnun tluan laiah,
Tupawn hmangaih biahthu an hlan thei che;
Thlipui hrang hringnun i paltlang laiin,
Thinlung tak taka ngaihsak thintu che;
I hrechiang ngam tak tak thung dawn si a!
FB Literary Piece!
I thiltih dawn hunah reng reng,
Vawikhat inngaihtuah nawn thin rawh.
I ka i an dawn reng rengin,
Vawihnih tal inngaihtuah nawn rawh.
FB status update dawnah,
Vawithum tal inngaihtuah nawn rawh!
Life Literary Piece!
Hringnun harsatna khawvel zauvah hian,
Harsatna lian ber bera ngaihte hi;
Hringnuna thil ropui leh langsar sar,
An nih loh chang a awm fo thin si a!
Biakhlatna lak a, "I dam maw?" tih te,
SMS han hawn a, "Hey" han tih te;
"Ka thiam loh a ni" han tih maite hi,
Te tham mahse tih mai an har si a!
