Hriat Fiahna !

Chhe lailet der chu zahawm ber angin,
Rinawmna diar khumtu a ni ang maw?
Zahpuiawm ber chuan fel ber ang maiin,
Thianghlimna silhfen a sin ngam ang maw?

He thinlung khawngaihthlak ber hi em ni,
Lainatna tel lova an sawisak chu?
Rinna laka rinna nghattu em ni,
Rinawm lo taka an bum nilen chu?

Hmangaihna chuan hmasâng ata tawh kha,
Diriam leh chêksawlh lo hlawh tawh mah se,
Tukdawl rual loh thahrui a neih ţhin kha,
Tenawmnate'n hual vel eng ang mah se.

Ngaihdamna nun khawiah nge a awm tak?
Hriat thiamna chuan nâ tak maia mi khák!

𝐀𝐰 𝐇𝐦𝐞𝐢𝐜𝐡𝐡𝐢𝐚 !

I hmêl mawina duhawm ber phenah khân,

Rûl mi chùk nâ ber a invial si maw!
I hmêl pawisawi lo ber phenahte chuan,
Nunrãwnnain bupui a chhep tak a! 
Lemchan thiam chungchuang ber an sawi anga,
Ţhuro nun nêm, choak nungchang pu si, 
Beramno hmul hliahkhuh, sihal thinlung pu,
Thianghlimna pathiante kâra bawlhhlawh,
Pawnchhe hnângkhâia tenawm ber an sawi,
Sakruang duhawm phena hmelma koham, hlauhawm ber,
Hremhmun luah lum tur zinga mi thianghlim,
Mi suaksual zahawm ber, ka hmangaih chu!

Pachuau Hla Thûk

 

Hun kut 'râwngin a nuai chhiat ka hmuh a,
Hausakna chapo phum bova awmin,
In ropui tlusawp chhe tate zawng nen,
Biak in laichhuatah hringfa ruang zalhin,
Tuipui mangang rum thawm lûngchhiatthlâkah,
Thil nihpung inthlak danglam ka hmuh khân,
Thil reng reng ţawih ral ta ka ngaihtuah a,
Tlâkchhiatna chuan nâ taka min ţhialin,
Hun chu rawn hrângin ka hmangaih ngei chu,
A la rawn la bovin, duhthlanna pawh,
Hnuaichhiahin chân hlauhna vanga mittui,
Ka ngaihtuah, chu bak thlan tur awm loh hun.

Hringnun Tuifinriat Lawnglêng.

Tuifinriat zau taka lawnglêng vakvai,
Tui fawn nawrna lam apianga tawlh ţhin,
Vaukam thleng tura kal ngaihna hre lo,
Pan tur pawha tha chakna nei lo chu!

Vawi tam thlipui leh ruahpui do hântu,
Enkawltu mumal reng tawng ngai lo chu! 
Lawng thing leh a karfungte làm mawih tawh,
Li vir pana muang taka tawlh del del chu!

Chhei! a vanglai nite chuan lawng chungnung,
Mit la tak, chuan hlawh ber a nih vei nen!
Chhul thinga a keu tirh phat ata tawh,
Tuipui thlifimte nghahfâk a ni kha!

Litengsawl leh suar kam chhia dai dárin,
Tui zàng khauh lakah hnehna a chang ţhin,
Tuipui suamhmang leh thil chhe vakvai pawh,
Hmar arsi êng hnuaiah a tudawl ţhin!

Hriatpuitu lawngin a sut hma loh zawng,
A  hriat chian lawngin a suasam hma leh,
A thahrui chakna a chhàh hma kha chuan,
Hnehtu lawnglêng, tuipui ngamtu a ni!

Thahrui chakna ni lo, hmuh theih loh thâ,
Hmanrua reng thawh lova mi tudawl thei,
Tuifinriat mawnga rûn rem tawh tura,
Nawr piltu lawng a tawn hma loh kha chuan!

𝐀 𝐛𝐫𝐨𝐤𝐞𝐧 𝐦𝐚𝐧 !

 
He was a man of secrets,
Of pain and anger inside him,
He closed the door of his heart,
And tight laces on his brows.
He once opened himself naked,
Stood bare in front of love's garden,
Proudly praying a love of songs,
And he made a hell of a mistake!
Hence, a person of interest and conflict,
Of a heart wounded deep inside,
Roaming the earth without a plan,
And hope he abandoned along the way.
What do you know of him?
Why would you judge first,
But cast a judgment upon his life?
And blamed him for not being perfect!
Flee, flee thou sadistic thoughts,
Away, away thou impertinent mind,
Find a cocoon and learn from it,
How a butterfly breaks it and became a beauty!

That Woman !

Ani chu rakzu fir tûi ber ang hian,
Kâm chhûngah thlum taka inchiahzawpin;
Hrawka sâ thla riai riai, nawmna paia,
Pumpui siam nuam ţhin ang a ni si a.
Ani chu ri mawi fân riai ang a ni,
Bengin lungchim taka a ngaihthlak a,
Tisa peng tinrenga mur rawn thlentu,
Lunglênna khawvel mi hruttirtu chu.
Chuvang chuan a ni, ngawlvei ang ka nih,
Ka kâ leh beng reng, nitin nâ an tawrh!

Nun khaw râm !

Lang theia lemchanna, chhûngril ţahna,

Hmuh theiha pang dam, chhûngril dam lohna,

Kal hmasate'n an paltlang nun khawhar,

Khawvel ngaiha nun hausa neite kha!

An chauhna kâwlrâwnah ngei hniak chhuiin,

Pindan lairila an ţahna hringnun,

Chhun lai tak anga puanzar châkawm hi,

Anni iang thlanah ka phum dawn em ni?

Ţiauvut delh reng anga rit ka hringnun,

Ruahpuivanawn sûr hnan ka mittui far,

Hma lam pan tura chakna reng nei lo,

Nun hrâng kâra relh bona zawngtu chu!

Vawiin chuan hlimna reng her chhuahpui lovin,

Naktukin beiseina vüng a chhuah lo'ng,

Thla tamah hlimna a zai thei lo a, nun khaw râm !

Kum tamna pawh lungngaihna mai a ni!

Hlimna a sosân poh leh lungngaih a hnai,

Lawmna pawh dumde mei dêt chhûng daih ţawk,

Ka pian ni chhul reh pin ni se la aw,

Chhula a keu ni a her chhuak lo tur!

𝐍𝐠𝐡𝐚𝐤 𝐳𝐞𝐥 𝐧𝐚𝐧𝐠 𝐞

Leitlangpuiah thlang tla har lenkâwl,
Liampui zai rel se lalngo zûn min phuartu;
Lunglai luahtu nghilh hlen thei ang maw?

Her li liai Hmartlangpui lamtluanga'n,
Ka ngaih a bang lo ka dite mengmawi kha;
A ngaiin lelte ka kiu váwng váwng!

Zûn phur uai hne hne valriang tawnah,
Rûnsang kaia lêndun ni herchhuak thuai se;
Chutin relthang thawm hnawk a reh ang.

Nghaki iang lêngi nghak zel nang e,
Tuai leh thar zawng lo vul duah hluah mai ta se;
Pârlai tlan ni la her ve ngei ang.

🅜🅐🅝🅖ţ🅗🅐 !

 

Hmartlangpuiah khua a hnim ruai e,
Ka thinlung iang chung khaw ri a rum hem hem;
Hmarah nêmpuan zâr reng ka tawng lo.

Hnutiang ngaiin vâl ka kûr diam diam,
Romei tlâng bawm ang lungdi kâwl an liam zel;
Ka thlang hêr mai dawn ê pialleiah.

Khawnge ka Zopui pâr, Tuktin pâr,
Ainâwn pâr, Chhawkhlei pâr leh Zozam pâr kha?
Kâwlah rûm vung vungin an liam zel.

Ka lenrual lungduhte an liamna,
Min ngai lo renga ţuan an ţulna khuavel;
Fâm chang ila ka nuam zawk awm  e.

🆃🅷🅻🅰🆂🅸🅺 🅽🆄🅽 🆁🅰🅼 !

 

I tel lo ka nun thlasik vin túk ang,
Aw nang, kumpui linglet nawmna duhawm!
Vawtin mi ţham a, ni te lah an nguai,
Nipui duhawm! i ngaiin ka chau e!

Sirva zai thawm leh April pâr meuh paw'n,
Hman ang min awih tlei zai an rêl thei lo,
'Rûkru duhawm! i zâlna hmun khawiah?"
Ka nun sikpui hrâng a nâ lua ka ti.

Hriat rengna chimawm mi kiansan lul rawh!
Sulhnu ngaihawm, vüng thar mi chhuah lo'ng maw?
Beiseina thâmral lo, zahngai lul rawh!
Kei zawng, tha thawh turin ka chau zo ta!

𝐎𝐥𝐝 𝐅𝐥𝐚𝐦𝐞

 

Dawt ngaina lo mah se dawt mamawhin,
Duhsakna lawm mah se a tlanchhe ţhin,
Thu khâl tak hmanga a nun hliahkhuhin,
Thu mai mai lakah a vuivai si ţhin,
Inrintawkna nun chaponaa thuam,
Insumtheihnaa a kâ ţhui ping chu.
Ngainep taka hmangaihna chêksawlhin,
Nuihsawh chunga a lûng tilian mi chu,
Khawhar takin a birûkna hmunah,
Khawngaih mamawhin a inhre mawlh lo,
Hmeichhe duhawm chhe thei tawp ni bawk chu,
Hmeichhe duhawm ber a lairil luahtu!