𝗧𝗛𝗨𝗥𝗔𝗪𝗡 !

Hmeichhia, hmeichhia, hmeichhia, hmeichhia, nula!
Pawitihna chuan inchhirna pakhatmah,
I tun hunah pe hauh che suh se;
Mipa reng reng chu dawheh kumkhua ţhin,

Thutiam phawvuak mai mai hmanga i tân;
Vana arsi lak inhuam reng ţhin mi,

Ke leh lam tuipuia chiah reng chunga;
Tuipui leh lam vaukam rap ţalh paha,

Themthiamna tinreng nena mi lëm hmang;
Engtik lai maha nunze nghet nei lo,
Buhsi thliin a len ang a ni si!

𝐌𝐚𝐧𝐠 𝐏𝐡𝐞 𝐑𝐮𝐚𝐢 !

 

I chanchin hriat kawngah ka beng tawngchhamin,
I hlimthla thlir tur paw'n mit a del zo ta,
Hriat châka ngaihven ţhintu thinlung pawh,
Hriat lohna laitual nuam a chang ta si!

I hming lam ţhin lei pawh dângah bet tlatin,
Lam nuam a tih ber hming a hai zo ta,
Mangţha, ka kawl atân i hlu chuang e,
I hlutna pawh i hriat tawh ngei dawn hi.

I inhlutna chuan mi kalsan phalna,
Kan inlaichinna tih chah theihna nen,
Thuneihna nâ tak a inpêk tak hi,
Thuneihna, keia dan phâk rual loh chu!

Pawm tur chein theihna ka nei reng em ni?
I duhthlanna ngeia pawm mai che ka ni,
Chuvangin, tunah ngei hian mi haw rawh,
Khawvelin mi tih hreawm lai tak hian!

Hringnun mi chûmna chhel taka ka tawrh,
A mi nghaisak mawlh mawlh lai hian ka ti,
Thil dang zawng tawrh ka nawm theih nân a ni,
I laka tawrhna chhel taka ka tawrh!

Chuti chuan, nang ka pawm lai hunte chu,
Mang duhawm phe ruai ang mai lo niin,
Lal ang maia ropuia inngaiin,
Ka han harh a, mi mai ka lo ni si!

μελαγχολία

Nguina thlarau ka hnena awm reng chu,
Tha tho lohna thahrui mi phuar rengtu,
Chawlawlna ninawm ka bâna kaitu,
Laktlâkna reng awm lo ka hringnun hi.

Sapui ţam takin ka ţam huam huam a,
Thlaler ang maia ka nun khaw rãmah,
Tuihna chik chhuah tur reng ka pai ta lo,
Ka chhawlhalna chhawktu pawh ka hmu lo.

Thangvan mû tê iang lêng del del ila,
Kâwlkil piah ramah chawlh ka nuam mang e,
Chutah chuan ka nun hahdamna tawngin,
Nun khawrãm chhawktu ka tawng dah law maw?

𝕬𝖓𝖌𝖚𝖎𝖘𝖍

 
Nangmaha fel lohna, i hming chhiatna,
Ngêtin pangpâr a tih vuaina ngei chu,
Thiam taka thup boin i vul ni le!
Lang thei duhawmnate'n i hliahkhuh a,
I nihnaa puhtu puhna che làm,
Fak hla mawiah i chhuah tak ţhin hi le!
Nangmahah khawlohna chu nuamsain,
A tâna i siam biakbûkah chengin,
I duhawmnain i hliah bo hneh e!
Nimahsela, ka duh tak fimkhur rawh,
I pawn lam mawina i hman khawloh chuan,
Chem, a hriamna hloh ang mai i ni ang!

𝐃𝐢 𝐄𝐧𝐜𝐡𝐢𝐦𝐥𝐨𝐡 !

Ka lunglênna khawharthlâk riangvai chu,
A zâr bel ţhin sirva leh a zai thawm mawi,
Khaw lum lam pana an hnutchhiah thing mal tla!

Thlasik vanglai taka thinghnah tlakawlh,

Thlalera hnimbùk ţo ri rë ang ka ni,
Tuihna reng pai lo vut khawro ang chu,
Ţhalchar chhum, ruah reng pai lo va lêng chu,
Natnate'n lungchim taka an tuam chhuah!
Ka natna kawltu ka damna neitu chu,
Hriat thiam lohna thlipuiin a nuai chiam a,
Hriat fiahna pawh a hnenah a awm lo,
Chuti'n a lêng e, lunglam vai ruaiin! 

𝕴 𝖙𝖊𝖑 𝖑𝖔 𝖈𝖍𝖚𝖆𝖓...

Nunrâwnna, râwng taka mi chiltu chuan,

Kir lehna lamtluang reng a chhui mawlh lo,

Hringnun kal chhiar kim ni a awm ang maw?

Khuareiin nang thlah zai a rêl lo’ng e.

Chinlem nei lo lunglênna thângvanah,

Hliamthla mi chhiah reh thei tawh lo tura’n,

Thinlai dam ni a her chhuak thei ang maw?

Nang ngaih banzai rêl zawng ka thiam mawlh lo!

Aw, nun hian engtin awmzia a neih ang?

I tel lo hringnun chhiar kim a har e,

Uitu nei lova hmangaih thâmral tur,

Kei zawng ka ngai thiam thei mawlh lo va ni!

𝐁𝐥𝐚𝐧𝐤 𝐕𝐞𝐫𝐬𝐞 (𝐍𝐨𝐧-𝐦𝐞𝐭𝐫𝐢𝐜𝐚𝐥).

Muanga lûngkham buai nei lova laitual,
Khawthlir tlâng chuan lova kan lên laiin;
Chakma lûngmawl tia kan sit rualte’n,
Sir sawn zâi rêlin hmatiang min pansan.

Zofa lûngmawl, chapo âtnaa thuam,
Changkanna ei tling lo thar chhuaktu chu;
Chakma lûngmawl tia kan hmuhsitte’n,
Thangchhuah diar min khimsan, min harh khalh e!

Hmanah zawng laisen lûng an mawl ngei e,
Tunah zawng kan laisen lûng a mawl zo;
Babute tia Chakma valrualte,
Zo lanu’n chibai a bûk hnai zo ta!

Kan lûngmawlin chinlem a nei lo e,
Changkang taka tlakranna kawng zawhin;
Chapo, mahni hmasialin kan tlawm mêk,
Harh zai rêlin kan tho chhuak dâwn lo’m ni?

Pipu lûngmawl tia kan selte kha,
Lei thuahriat ata lo tho leh se zawng;
An thlahte ţahin luaithli an nûl ang,
A pawi ngei e, harh zai rêl rawh tiin!

Zo lanu valrual, i tlai lua ang e,
Chhak thlang, chhim hmara hnam dang lêng zawngte’n;
Hnutiang hawi lote’n hmatiang an sawn hi,
Aw harh lul rawh, i muthlu rei lua e!

(Blank Verse chu lambi 10, iambic pentameter hmanga remkhawm, rhyme scheme hmang lo, William Shakespeare-ate hun laia lemchan an ziahna Poetry Form)

𝐌𝐢𝐧 𝐚𝐮 𝐯𝐞 𝐡𝐢𝐚𝐧 𝐤𝐚 𝐫𝐢𝐧𝐠 𝐬𝐢 𝐚...

Rûn a ngui ruai, khawmual tlângtluanin,
Ka thinlai hmarpui suar ang a chim ni kha;
Nêmte'n tlai tin a her chhuak ţhin e.

Pûkpui angin ka hmu thim ruai ruai,
Ka di lênna chûl ram fan changin;
Kan nun puan ang a hlui thei lo'ng e.

Awmhar tinkim ka dawn zo lo ve,
Suihlûng ti lêng pualchang rual mual an liam e;
Zatlâng lam kaia ka zuk hmuh le.

Min tuarpui thiam lo ka di ngaih chu,
Chunnu lûng a lêng zan thla êng zâm kârah;
Phunchawng lelthâng ţahna kan vuan e.

Hlimte'n lên lai ni a liam zo ta,
Ka ngai mang e kan sul i hnu mual liam lo;
Chûl hnu'n ngaiin mi au ve ngei ang.

𝐓𝐮 𝐧𝐠𝐞 𝐡𝐫𝐞 𝐭𝐡𝐢𝐚𝐦 𝐧𝐢 ?

𝐓𝐮 𝐧𝐠𝐞 𝐡𝐫𝐞 𝐭𝐡𝐢𝐚𝐦 𝐚𝐧𝐠 𝐧𝐢 ?

𝐴 ℎ𝑚𝑒𝑙𝑎 𝑎𝑛𝑐ℎℎ𝑒 𝑧𝑢𝑛𝑔𝑧𝑎𝑚 𝑖𝑛𝑝ℎ𝑎𝑚𝑎𝑛,

𝐴 𝑚𝑖𝑡𝑚𝑒𝑛𝑔 𝑑𝑢𝑙 𝑟𝑎𝑖ℎ, 𝑡ℎ𝑙𝑎𝑛𝑚𝑢𝑎𝑙 𝑎𝑛𝑔𝑎 𝑟𝑒ℎ,

𝑇𝑖𝑠𝑎 𝑣𝑢𝑛 𝑚𝑎𝑚 𝑡𝑎𝑘 ţℎ𝑖𝑛, 𝑐ℎ𝑢𝑙 𝑟𝑖𝑎𝑖 𝑟𝑖𝑎𝑖 𝑐ℎ𝑢,

𝑇𝑎𝑤𝑟ℎ𝑛𝑎 𝑛𝑎𝑚𝑒𝑛𝑙𝑜 𝑧𝑖𝑎𝑟𝑎𝑛𝑔 𝑎𝑛 𝑛𝑖 𝑠𝑖!

𝑇𝑖𝑠𝑎 𝑝ℎ𝑢𝑟𝑛𝑎𝑡𝑒'𝑛 𝑚𝑢𝑎𝑙 𝑎𝑛 𝑙𝑖𝑎𝑚𝑠𝑎𝑛 𝑎,

𝑇ℎ𝑎𝑡ℎ𝑜𝑛𝑎 𝑝𝑎𝑤ℎ 𝑣𝑎𝑢 𝑧𝑎𝑚𝑖𝑛 𝑎 𝑘𝑖𝑚𝑘𝑖!

𝑇ℎ𝑎ℎ𝑟𝑢𝑖 𝑐ℎ𝑎𝑘𝑛𝑎, 𝑟𝑖𝑎𝑙 𝑎𝑛𝑔𝑎 𝑑𝑎𝑖 𝑧𝑜𝑣𝑖𝑛,

𝑀𝑖𝑡ℎ𝑚𝑢ℎ 𝑡𝑖𝑛𝑟𝑒𝑛𝑔𝑡𝑒 𝑝𝑎𝑤ℎ ℎ𝑛𝑒𝑎𝑤𝑚 𝑧𝑎𝑤ℎ𝑛𝑎!

𝑇ℎ𝑙𝑎 𝑚𝑎𝑤𝑖𝑛𝑎 𝑐ℎ𝑢 𝑡ℎ𝑖𝑛𝑙𝑢𝑛𝑔 𝑙𝑢𝑛𝑔𝑐ℎℎ𝑖𝑎𝑡𝑛𝑎 𝑚𝑎𝑖,

𝑇ℎ𝑙𝑎 𝑏𝑖𝑎𝑙 𝑣𝑎𝑛𝑔𝑙𝑎𝑖 𝑑𝑢ℎ𝑎𝑤𝑚𝑛𝑎 𝑝𝑎𝑤ℎ 𝑑𝑎𝑤𝑡 𝑡ℎ𝑢!

𝐹𝑎𝑣𝑎𝑛𝑔 𝑘ℎ𝑎𝑤 𝑛𝑎𝑤𝑚𝑛𝑎 𝑐ℎ𝑢 ℎ𝑢𝑛 𝑡𝑖𝑎𝑚 𝑐ℎℎ𝑢𝑛𝑔 𝑐ℎ𝑎𝑢ℎ,

𝑇𝑖𝑎𝑚𝑡ℎ𝑢 𝑙𝑒𝑘 𝑝ℎ𝑒𝑖 𝑐ℎ𝑢 𝑒𝑘 𝑙𝑢u𝑛𝑔 𝑡ℎ𝑢𝑏𝑎𝑟𝑎𝑤ℎ!

𝑀𝑖ℎ𝑟𝑖𝑛𝑔 ℎ𝑟𝑖𝑎𝑡𝑛𝑎 𝑝𝑎𝑟𝑢𝑘 𝑘𝑎𝑖ℎ𝑡ℎ𝑎𝑤ℎ𝑎 𝑎𝑤𝑚,

𝐻𝑟𝑖𝑎𝑡𝑛𝑎 𝑓𝑎𝑚𝑘𝑖𝑚 𝑡ℎ𝑙𝑒𝑛𝑡𝑢 𝑙𝑎𝑘𝑏𝑜𝑛𝑎𝑎ℎ,

𝑀𝑖ℎ𝑟𝑖𝑛𝑔𝑎 𝑏𝑒𝑖𝑠𝑒𝑖𝑛𝑎, ℎ𝑚𝑎 𝑙𝑎𝑚 𝑝𝑎𝑛𝑛𝑎,

𝐴 𝑘𝑎𝑤𝑛𝑔𝑡𝑒 𝑙𝑎𝑚 𝑐ℎℎ𝑖𝑙ℎ 𝑏𝑜𝑣𝑎 𝑎𝑤𝑚 𝑡𝑎 𝑐ℎ𝑢!

𝐴𝑛𝑖 𝑐ℎ𝑢 𝑘𝑎𝑤𝑙𝑝ℎ𝑒 𝑙𝑒ℎ ţ𝑒𝑘 𝑡𝑙𝑎 ℎ𝑛𝑢𝑎𝑖𝑎,

𝐻𝑚𝑎𝑛𝑔𝑎𝑖ℎ𝑛𝑎 𝑓𝑎ℎ𝑟𝑖𝑛, 𝑎 𝑙𝑜𝑣𝑎 𝑡𝑙𝑒𝑖 𝑙𝑜,

𝑁𝑢𝑛𝑘ℎ𝑎𝑤 𝑛𝑎𝑤𝑚𝑛𝑎 𝑡𝑒ℎ𝑓𝑢𝑛𝑔 𝑙𝑒𝑘𝑙𝑎𝑚 𝑏𝑢𝑙 𝑏𝑒𝑟,

𝐶ℎ𝑢 𝑛𝑔𝑒𝑖𝑖𝑛 𝑎 ℎ𝑟𝑎𝑛𝑠𝑎𝑛 𝑎 𝑛𝑖 𝑠𝑖 𝑎!

𝑇𝑢 𝑛𝑔𝑒 𝑎𝑛𝑖 𝑐ℎ𝑢 ℎ𝑟𝑒 𝑡ℎ𝑖𝑎𝑚 𝑛𝑔𝑎𝑖 𝑎𝑛𝑔 𝑛𝑖?

𝑇𝑢 𝑛𝑔𝑒 𝑎 𝑛𝑢𝑛 𝑐ℎℎ𝑢𝑛𝑔𝑟𝑖𝑙 ℎ𝑚𝑢 𝑓𝑖𝑎ℎ 𝑛𝑔𝑎𝑖 𝑎𝑛𝑔?

𝕿𝖍𝖎𝖒 𝖍𝖓𝖚𝖆𝖎𝖆 𝖑𝖊𝖓𝖌 !

 

Engah nge ka thinlung mei vâm a mih,
Thim hnuaia hnutchhiaha mi kalsan theih?
Pangpâr huan, a lai taka nunna thing,
Lei ţhaa chawm, duah hluah hluah kan nih nen!
Ka thinlung huan pal chu ţhiat lui zetin,
Hmangaihna kung engah kih i phal ni?
Nipui thing pâr ang kan inhmangaihna,
Thlasikah pawh a hnah uai ngai lo tur!
Hmangaihna avanga lungngaihna ruama,
Lunglên hla hril phuahtu an ţhathnem nen!
Engah anni ang maia mi chhuah tak?
Aw, ka ţhian lungngaihna leh lungchhiatna,
Ka nunah hmangaih mei vâm chhêm nungin,
Ka nun thim taka ênna chhi êngtu,
Engah thim chhah leh zualah mi hnutchhiah?

𝐍𝐮𝐧𝐡𝐥𝐮𝐢

 

Aw ka thinlung natna thawm ri zet chu,
Tuifinriat rüm thawm aia a nat hi,
Aw ka chhûngril natna vawrtawp zet chu,
A inmûng thawm ngawt râpthlâk tham hi!

Luipui luang lai meuh an chawlhna hi,
Arsi in her meuh pawh an chiaina,
Leilung meuhin lû a sûnna hi,
Hringmite an inchaldelhna mai mai!

Thâwk lak khat lek pawh a nâ ngawih ngawih a,
Mit hmuhna tinreng an thim zo ta bawk,
Thinlung ber chu a chavai ngawih ngawih a,
Mahni hmasialna khawvela khat hi!

Khuanu hualin hlimte'n lêng nang che aw,
Thinlung erawh damin a lêng tawh lo'ng!