Kan ramah hian pawl anga Mizote chunga hû nei lian ber chu kohhran hi a ni. An thurel apiang zawmin mi tin zah a hlawh ţhin a. Tunah erawh chuan a kalphungah fel lo tam tak a awm tak avangin khaktu a tawng zauh zauh ţan mek a nih hi.
Kan hnam ţawng hi boral mai tur an ti teh chhen a! Ka dam ve ţek ţek chhûng hi chuan kan ţawng hi a boral lo ang tih nachang hria kan tlem viau emaw ni! Pawl (Institution) rau rauah Kohhran aia sap ţawng hman tamna hi a awm kher emaw chu?
Inkhawm kaihruaitu aia Chairman tih hman duh zawk, Thusawitu aia Speaker tih chu thlarau riauna a ngai, Zaipawl tih aia Choir han intiha zai nung viau tura inngaihna, Inpawl khawmna tih aia Fellowship tihin mite hip riau tura ngaihnate hi hnama chian lohna chiangkuang ber pakhat a ni.
Kohhran Ţhalai lam lahin Kum Chanve Inkhawm aiin Half Yearly Meet hmanga ţhalaite koh haw an tum a. Pathian fakna leh chibai bûkna hun hman aiin Praise & Worship rau riaua ngaihna thinlung nei turin tet lai aţanga thluak sûksak kan ni mek a nih hi.
Thu leh hla zan tih aia Literature Night pui riaua ngaihnate hi changkanna changkang lo zet a nia! Kawmiti Peng tih aia Sub-Committee tihte hi changkanna emaw kan ti em ni zawk? Ei leh in tih aia Refreshment han tih hian puar a awl deuh zawk ni maw?
Thusawi Tawi aiin Short Sermon han tihte hi a ropui hle a lo ni ang e! Inkhawmpui Lian aia General Conference hmang duh ţhalai rual, mahni nihna hai der rualte hi harh a va ţul tawh tak êm! Khawtual thawktu tih aia Native Worker tia lam thlang zawk kohhran hian ngaihtuah chiang teh se.
Rinna Thutiam aia Pledge Card, Envelope kan tih zel si chuan kan ţawngte pawh hi boral mah se, mak kan ti hlek lo ang! Khualchhawntu aia Receptionist-in min lo dawnsawnte hian khawmpui hman a nuam zaih a ni mahna! Ţawng pawimawh em emna chu nun a nghawng tel zelna hi a ni.
Hnam upa leh changkang apiangin mahni ţawng an dah chungnung zel a. Paris-ah khuan English hmanga tuallen a har tluk zetin Japanese ramah phei chuan bo a awl zual! Tahan kan han zin khan Sap ţawnga thu ziak intarna ka zawng hlawhchham titih tlat.
An zirna in sâng (University) thleng khan anmahni ţawng vekin an ziak a nih khi! Aizawlahte phei chuan Mizo dawr a awm ta lo emaw tih mai tur a nih zawh tak hi! Rev Zairemate hun lai khan kawng laia Mizo lo awmte khan kalkawnga Sap an lo kal chuan ding meuha lû kunin chibai an lo bûk ţhin thu a ziah tak kha!
Hman ni lawka Agriculture Directorate-a Japanese mi thiamte ang khan kan English Medium-a pawl sawm zirlai pawh sap ţawngah chuan a tluk kher lo ang. Mahse, amah kha khawvel huap pawha mi thiam a ni tlat! Chuvangin Mizo ţawng hi kohhran aţanga hman uar kan inzirtir a, keimahni ngeiin a taka kan hman chuan kan ţawng mawizia, sapho hla phuahna bik pawh nei lo ai thlawt chuan kan ţawng a hausak zawkna hi ţhangtharte hian an hre thar mahna!
No comments:
Post a Comment