Kohhran hi Mihring nge Pawl – Zofate kal sualna !

Rev Lalhmingchhuang Zongte - Siam Ţhatna Sermon Ropui chu!)

 

            He zawhna hi zawhna mawlmang ang tak anga lang, mahse Zoram Kohhran leh a chhûnga cheng kohhran mite’na kan hriat fuh tawk loh avanga, kohhran rawngbawlna reng reng, Ţhal laia ruahtui tla zuaiin, leilung hnâwn kim hman si lova, Ni a lo sata ro leh thuai thuai ang a nih phah mek a.

 

            Rev Lalhmingchhuanga hian zawhna pawimawh zet mai, ‘Kohhran hi min tipumkhattu nge min ţhendarhtu?’ tih a zawt a. He zawhna chhanna mawl tê chu, ‘Min ţhendarh chiang a ni’ tih hi a ni! Aizawl leh hmar lam khaw tam zawk chu PCI kohhran mi leh sa an ni a. Lunglei leh chhim lam khaw tam tak pawh BCM mi leh sa an ni.

 

            Lawngtlai leh a chhehvel khuate chu LIKBK kohhran an ni fur a. Siaha lam kan hawi chuan, ECM kohhran an ni deuh fur bawk. A hmingin rorêlna sâng berah han inpalai tawn eng ang mah ila, ţhalai inkhawmpui lianah pawh han inko haw tawn ţhin bawk mah ila, ‘Pumkhat an nih theih nân’ tia Lal Isua’n Pa hnena dilna a thlen, tihlawhtling thei hlawl lo Isua hnungzuitu inti kan nih fur hi.

 

            Kan ringtupuite lawina kohhran (denomination) hrang hrang, UPC, Salvation Army, IKK an lo keh chhiata, kohhran hrang hrang aţanga pawl chhuak an awm reng rengte hian, an inpumkhat leh theih nâna ţawngţai ţhin mi ai chuan, lo nuihzata, lo chirhtheh ţhin, fiamthu thawh nâna lo hmang bawrh bawrh duh ringtu kan tam zawkzia hian kan nihna, Pawl hmanga ţhendarh kan nihna chu a lan chiantir ngang a nih hi!

 

            ‘Kohhran hi Pathian ram tizautu nge, kohhranah kan thlung bet’ tih zawhna pawh, chhanna dang a awm lo. ‘Kohhranah kan thlung bet tlat!’ tih hi a chhanna chu a ni! Kohhran pawl pakhatin hlawhtling taka thlarau bo manna hmun a lo neih tawhna pawh, zuk luh chhuaha, therhlo fahrah tê tê hmanga beram inchhuhsak ching vek kan ni a!

 

            He Pathian ram hi, kan kohhran (Pawl) chhûngah lo chuan, a darhzaua a lo ţhanlen pawhin, kan lawm tak tak thei tlat lo! Kan kohhran chhûng a nih chuan kan thilphalin ui kan nei lo a. Mahse, kohhran dang hmalakna a nih erawh chuan, tel ve tumna thinlung reng reng pu hlei thei lo khawpa pawl atchilh, kohhran mi kan tam ber a nih hi!

 

            ‘Pawl (kohhran) buaipuitute chuan pawl ţhatna tur leh hmasawnna tur an ngaihtuah ber a. Mihring ngaihtuahtute erawh chuan kohhrana mimal tinte ţhatna tur an ngaihtuah ţhin’ a tih hian, Zoram kohhran mite ze dik tak a va tarlang chiang êm! Kohhran bil rorêlna thu chhuak zawng zawngte hian, mahni lawina Pawl bik ţhanlenna tur leh kawng hrang hranga hmasawnna tur bak a ngaihtuah thleng thei tawh lo a ni ber a!

 

            Tun hun thim tak kan hmachhawn mek lai pawh hian, chu kan nihna dik tak chu a lo lang chiang a nih hi! Presbyterian Tualchhûng Kohhran ţhenkhat hi chuan, Kohhran puipa nih an va tlin ţhin êm! Veng ţhenkhatah, kohhran (pawl) chhûnga mite bak, pawl dang zawng zawng a mite pawh thliar lova ţanpuina an sem dan han en te hian, kohhran awmze dik tak nunpuitu hi zawng an awm chiang, tih min hrilh ţhin.

 

            Mahse, tualchhûng kohhran dang zawng leh, a kohhran pui berte erawh, mahni pawl ringawt ngaihtuaha, hmanhlel kan ni zawk tlat si a nih hi! Tun dinhmunah hian kohhran hmangaih êm êmtu zingah, mahni lawina pawl chhûnga kan ringtupuite ngaihsaka, ngaihven ngai reng reng lo, an awm ve tih pawh hre mang lo hi Za-a 80% aiin kan tam a rinawm chiang a nih hi!

 

            Mahni ringtupui leh kohhrana kan lawipuite ngei ngei ngaihsak ai chuan, kan lawina pawl a lo ropuia, khawvel thil tak pawha a lo hausaka, a lo ţhanlen thûr thûr dan ngaihtuaha, hmanhlel ta reng reng kohhran mi, rawngbawltu leh Pastawr tamzia hi sawi maia fiah chi a ni lo. Serchhip-a CKŢP lamin Inkhawmpuia an neiha an thuhriltu pawh khan, Donald Trump-a a ţan chhan chu, ‘Presbyterian a ni tlat!’ tih a nih tel kha!

 

            Kan unau UPC-te mawlh hi he lam kawngah chuan mi aiin an nasa emaw tih mai tur an ni a. Kohhran dang zawng zawng hi chu Vanram pawh kai lo tur, Zoram khaw ţhenkhat, kohhran hrang hrang awmna reng pawh ramthima puanga, Tirhkoh tir duh hial khawpa Pawl atchilh niin an lang! Anni ang êm hian che firfiak lo mah ila, anmahni rilru ang bawk pu hi BCM, PCI, Salvation, ECM, LIKBK etc zingah hian kan tam lutuk tlat!

 

            Seventh Day pawh sawi kai ta law law ila. Thianghlimna leh insumtheihna ringawt buaipui pawl, chung an ti ve thei lo kohhran dang zawng zawng tling lova hmuh tlatna nei an nih ve bawk hi. Tu kohhran (pawl) mah hi kan bang chuang lo! Entirna turin kohhran hming hmerh leh remchang kan hmang mai a ni zawk!

 

            ‘Pawl hmangaih êm êmtu, pawl chhûnga mimal ngaihsak tak tak si lo a awm theih’ a han tite hi chu, a thu a dim mah mah a ni! Pawl tâna inpe zo êm êm, mahse mahni ringtupuite tâna thawk chhuak thei hlawl lo, an lam hawia rawngbawlna ke pawh chhep thei lo rual hi, leia ţiau vaivut zat zeta tam kan awm mek a nih hi maw le!

 

            Heti hian sawi chho ta mawp mawp ila. Pawl ngaihtuahtu chuan pawl len leh ţhanlen dan, leilung dana hausakna leh neih îm êmna an ngaihtuah a. Mihring buaipuitu chuan mimal tin kan dam tlâng em, rinna kawngah kan ţhanglian thei em, tiin a ngaihtuah ţhin.

 

            Pawl buaipuitute chuan bithliah neiin ramri an kham ţhin. An hmalakna reng reng huapzo hmalakna a tling thei ţhin lo. Mihring buaipuitute tân erawh chuan Pathian mite zawng zawng hi Krista kaltlanga kan taksa peng ang an ni a, inţhen hranna hi a awm thiang lo, tiin rawng an bawl ţhin.

 

            Kohhran hi pawl anga hmu tlattute chuan, kohhran pawl kaltlangin Pathian an dawr a, kohhran phen aţangin an inhawlh pùk hluai ţhin. Hei vang hian em ni, kohhran mi tak tak, maltlat nuna pachhe êm êm si kan tam chhan? Ni chiang e maw le, tih hi a chhanna chu a ni mai!

 

            Kohhran hi mihring anga hmutu chuan kohhrana kan tel theih chhan hi Krista thisen zara kan chan a ni tih hriain, mahni leh Pathian inkâr an ngai pawimawh ber. Kohhran, pawl anga hmutute erawh chuan kohhran kaltlanga prawkrem hmangte bakin rawng an bawl thei ngai lo. Prawkrem-ah innghatin, prawkrem khalh kal Kristian hi a tam zawk kan ni mek a nih hi!

 

            Presbyterian leh Baptist kan nihna ai chuan, Krista thisena lei Kristian kan nihna hi langsâr tur zawk a nih laiin, tu pawh thuhriltu hlawhtling leh Pathian mi hman an lo awm apiangin, eng kohhran nge tih aţangin anmahni kan lo teh phawt a. Channa azirin an rawngbawlna pawh kan lo dawngsawng hrang nuaih tawh ţhin a nih hi!  

 

            Zorama ringtu inti tam zawk hi chuan Isua aiin kohhran an hnaih zawk a. Isua rawng aiin kohhran rawng an bawl nasa zawk ţhin. Mahse, heng thu sawitu apiangte chu chirhthehin, pan hnâi la ang maia duhdak lovah kan chhuah chamchi duh zawk zel a. Kan Pathian thu ngaihthlak duh bik zawngte thleng hian, Pawl ang hlira buai kan ni zo titih ta mek a nih hi!

 

            A tawp berah chuan Kohhran awmze dik tak i chiang ang u! Kohhran chu Pathian mite kalkhawm, a mihringate kan ni a. Tam leh tlem, ropui leh pachhiat lam Lal Isua’n a ngaihven ve lem lo! Mi pahnih pathum kal khawmnaah chuan ka tel ve zel ang, a ti mai zawk a ni! khawvelah hian thil pahnih atchilh hlauhawm êm êm an awm a.

 

            Politik atchilhna leh kohhran ruihchilhna hi a ni. Politik atchilhtute chu ramtuileilo khawpa kan chirhtheh hreh loh laiin, a chirhthehtute ngei hi Pawl (kohhran bil) atchilhtute kan ni tih, engtikah tak inhre chhuakin, kan hmuhsit S. India  kohhran hrang hrangte anga kan inzawm khawm theih hun hi a lo thlen ve dawn ni?

 

            He thu ziak hawtu leh ngeih lo riau, Sermon ropui sawitu Rev Lalhmingchhuanga Zongte thu sawi pawh lem harsa ti fe fe kan lo awm a nih chuan, Chanchin Ţha Johana 17:21 kha lo chhiar tluk tluk se, Thlarau Thianghlim puina azarah a harh chhuakin, a lo inhmuh chhuah ve phah thei mial mahna!