Kohhran huangah leh zel pawh SIR !

            JNM Sikul, a hun lai na nâ nâ chuan Chhim lama Mizo sikul ţha berah khan, kan hotute kha mipa an nih chuan, ‘Hotupa’ kan ti mai a. Hmeichhia an nih pawhin, ‘Hotunu’ tih kan hmang leh mai ţhin. He ţawng ţial, sappui ţawng, awze ţawng hi engvanga uar ta êm êm nge kan nih?

 

            He ţawngkam phenah hian thil tam tak inphum awmin ka hre ţhin. Midangte hnuai enna hmanrua, mite zah phurhna nia inngaihna hmanrua, mi chaldelhna ţawng rua, midang chungtlakna, mite aia indah hran bikna, chungnung zawk nia inngaihna min petu a ni.

 

            He ţawngkam neitu ber sapte hian, he ţawngkam hi Mizote ang teh huam hian an leklam lem lo! Sap nunphunga awpbeha lo keu ta, sap ngaihsânna reh thei lo nun nei, changkanna tehfung berah pawh sap nun hmang tlat Zofate hian, ţawngkam nazawnga Sir tih kan chelek fo hi sim teh ang u!

 

            Kan rama rawn ching lâr hmasatute chu vai IAS rawn awmte kha niin an lang a. An inti lal thiamin, an intih thu thiamzia kha ţhangtharte chuan an hre kher tawh lo ang. An pisa luh dawnah pawh, ‘May i come in, Sir?’ tih phut tlat ţhin an ni a.

 

            Histawri kan en chuan, heng mite hi nasa takin Pu Hawla khan an nunphung a tihvulsak a. Intih ngêng deuh ngâlh nun kha a neihtir a ni ber. Pu Laldenga a rawn lal ve ta thunga, ‘Nangni IAS tel lo pawh hian, ka MCS rualte nen hian sawrkarna kan kalpui thei tih hria ang che u’ tiin a rawn bengdai ta thung a.

 

            Pu Laldenga ţhat deuhna chu, sawrkarna a han siam pawh khan, mipui rawngbawltu leh an aiawhtu kan nih avangin, nitin Hnam Rûnah MLA/Minister pakhat tal in awm ngei ngei tur a ni, tiin mipui tân a inhawng tlat ţhin a nih kha.

 

            Mahse, hun a lo kal zel a, thawhpuite chung en nihna hmanrua, aia hniam zawkte beng hniamna atân he ţawngkam hi sawrkar leh a hnathawktute hian an rawn uar chho tial tial a. Tunah phei chuan kan nitin ţawngkam hman rim ber pakhatah kan chhuah ta der a nih hi!

 

            Sawrkar inrelbawl dan nasa taka entawntu sakhaw puithiamte êm chuan, he ţawngkam hi an chelek ve turah ka lo ngai ngai lo. Mahse, ka rin loh deuh maiin Hqrs lama kohhran hotu lian rualte hi, anmahni dawrtu Pastawr rualte chuan, ‘Sir’  tiin an lo ko ve reng a ni tih hman niah hrilh ka ni hlawl mai a!

 

            Mak ka tih tawh nak alaiin, kan IAS pension pakhat phei chuan kan sakhaw puithiamte hi Officers’ Meeting tia an invuah thu leh Pastawr Senior-te chu sawrkara Senior Officer Level angah an indah thu min hrilh tak deuh deuh a! Nuamtawl sawrkar hnungzuitu kohhran tih article ka ziahte kha ka hre chhuak chuai chuai mai!

 

            Lal Isua rawngbawlna hi chhiahhlawh nun a ni, tih thupui nen chuan inhmeh lo tak, inlaichinna reng reng awm lo a ni. Lal Isua ngeiin, ‘Tu pawh in zingah hmasa ber nih duh apiang chu, in chhiahhlawhah an awm bawk tur a ni’  a tih nunpuina leh he Sir tia inkohna boruak hi chu chhim leh hmar ang hlauh a nih hi!

 

            Mizo kan nih ang ngeiin mi zahawm leh mi chunga lêngte leh aia upate kohna mawi tak, ‘Ka pu, ka pi, hotupa, hotunu’ kan nei ve reng a! Chutih laia miin ‘Sir’ tia an koh vang maia inngai ropui ta viau, nuam ti riau, chungnung deuh lârha inngai leh, chutianga mite han koh chu changkang ta riaua ngaitute hi chu mi dazât tia koh mai loh chu, hming dang vuah tur ka hre mang der lo nia! Zirtirtute bak han Sir emaw Madam emaw chiam tumna pakhatmah ka nei lo ve!