‘Pathian leh Ram Tân’ tih chiah kan hmabak ta.

            Khawvel hmun hrang hrangah mi tam takin, vawiin hian mi engzatin nge hrilêng kai thara, ni khatah mi engzatin nge thihna kawngkhar kik mek ang, tiin an TV leh khawthluakneite chu thlaphanna nen an bel mek reng a. Kan ramah erawh a mite kaltlangin Pathian malsawmna chu, ruahpui ang maiin a rawn sûr thung a. Khawvelah mi, a sing tela an thih lai zawih zawih laiin, kan ramah erawh damlo kal thei lo leh natna chi hrang hrang veite’n damna an lo chang thung a! Thihna thlazap ri ṭihbaiawm hnuaiah ram tin lungngai leh lungchhe taka an kuna, an ṭah tlawk tlawk laiin, kan ramah erawh Pathian fakna hla ri mawi hmangin veng leh veng kan inchhawn tawn a, in chungah leh in chhûngah lamin hlim takin kan zai thung a nih hi!

            Thomas Nashe-a’n a hla hril ‘A Litany in Time of Plague’ hmanga, ‘Mangţha, leilung malsawmna tinrengte u; He khawvel hi rinrawla neih mi a ni lo, Kan ngainat a hlimhlawp bawlnate zawng, Thihna kutzâla min hnuh luhna hmanrua mai’ tia khawvel an mangṭha laiin, keini erawh Thufingte kaltlanga, “Ka zilhna che u lamah hian lo hawi rawh u. Ngai teh u, in chungah ka thlarau ka leih anga, ka thu ka hriattir ang che u” tia hmâna Pathianin thu a lo sawi lawkte chu kan chan a lo ni a. Isaia’n, “Tuihal chungah chuan tui ka leih dawn si a, lei rovahte chuan tuiluangte chu ka leih bawk dawn a ni. In thlahte  chungah ka thlarau ka leih anga, in fate chungah ka malsawmna ka leih bawk ang” tih chângte hi kan ta a lo ni ta bik a nih hi.

            Isaia hrilh lawknate chu Zofate chungah lo thleng mekin, thlaraua tuihalte inhnangfâk thawm chu rimawi tak lo niin, thlarau malsawmnain in leh a vel, dâi tâm leh ramri, ‘Tlawmngaihna’ thumal nen a hrut thawmte chuan beng an titlaiin, thlarau rahin thingtlang aṭanga ei tur a thlâwna a rawn phur thleng rite chu van hian mawi a ti ve ngei ang! Khawpui mite pawhin kan ramri vengtute leh an chhûngkuate tlakchham hlau taka, an neih ang ang thawh khawma, thlarau rah kaltlanga thingtlang hmun hrang hranga an luang chhuak thawm leh che velte chu khawvel khawi dangah mah hmuh tur a awm lo a nih ni. Zorama Lalpa thlarau ruah sûr mek dawngsawngtu, Chennai Ambulance khalhtute titi thlengin lairil a fan a nih tak hi.

            Kohhran (Denomination) hrang hrang hnuaia mipuite awpbehna lungbangte pawh tihchimin an awm mek a. Kum 1793-a Philadelphia ram ‘Yellow Fever’ an tih hripuiin a nuai chiam laia, hla hril siamtuin, ‘Thli lum huam huam a tleh reng a, Mitthite pawhin thlan hmun an inpan chhawk! Ruang phurtu tawlailir thawm awm rengin, Vuina thawm riin reh lam a pan thei lo! Daktawr inhnial leh innawr thawm a ringin, Thihna sipai rualin chawlh zai an rel thei lo!’ tihte chu, Thlarau Thianghlim zarah a chhin pawhin kan tem ve lo. Inlungrualna leh thuawihna nen, mi tam takte chuan thlarau rah kan keih hmawk hmawk a. Pathian hmangaihna leh khawngaihna nasa tak hnuaiah malsawm ruai kan kil mek a nih hi.

            Chutih rual erawh chuan Fredericka-‘n, “Tuikhawhthla liam pur pur hi, bucket mawng zawnga lo dawh mi tân chuan, bucket-a tui dawh khah theih mi a ni ngai lo” a tih mite pawh kan ramah hian an awm lo tihna phei zawng a ni lo. “Mi ṭhenkhat, Harhna sawi hnâwm zawnga ṭawng ziah mai, intifing khekrek deuha Pathian thila lo inrawlh ve ziah, Pathian nena kawmti duna, ‘Lalpa hei hi chu a ti dik chiah lo a ni’ tia ngaihdan fahrah tê tê lo rawlh ve ziah an awm a!” titute leh, rawngbawltute lo sawisel hmanhmawh mi khawngaihthlak, kohhran bil ang zawnga thil lo thlir tlata, ‘Feikhawh Thlarau’ changtute pawh an awm bawk e. Davida Sakeibaknei a hahum laia anni, kel ang maia lo be vete hi zawng, mêna thlak tlak pawh an ni lo!

            “Mi zawng zawng chhandamna awmah a duha” tih thupui neitu hian, mi zawng zawng chhandam an ni ang a ti lo mai ni lovin, kawngka zima lut chu mi tlem tê an ni, a ti zawk a nih kha. Mahse, tun huna Thlarau Thianghlim rawn che vel hian, kan rama chengte min va khawih kim êm! Ruihhlo ngai leh mi vantlâng hnuai lama tisa leh thlarau natna nei a hrut ang bawkin, mipuite lam hawi thuchah bakah, kan rama hriakthih rawngbawlna kengtute tih tur leh an sim tur chenin kan ngaithla a. Chu mai ni lovin, ram hruaitute tih tur chenin thuchah kan ngaithla kim ta biai a nih hi. Taksa lama harsatna nei leh, thlarau lama tuihalna nei chenin, Thlarau Thianghlim thuchah chuan min hrut kim ta barh a, a dawhthlengin a zir em tih erawh thu hran daih a ni tawh.

            Tichuan, Home Crusade a lo zo ta a. A tawp zanah Zoramin Lalpa hmaa a tih tur; mipui, kohhran, kohhran hruaitute leh ram rorêltute tih tur, inthuruala kan hmalakna tur chu hriattirin kan awm ta a nih kha. Ram pum huap chawnghei ṭawngṭai neih rawtna, “Kan tihmi a ni lo e” tiin chhanna lo ri ta kha ngaihtuah ang. Hindu sakhaw betute awpna hnuaiah, Mizoram chu Israel fate Babylon awpna hnuaia kum 70 sala an tang ang chiah khan, hei leh chen hi kan lo tang rei tawh a. Mahse, chuti chungin Pathianin min ensan lohzia, Pathian mite rawngbawlna, kum tam tak chhûng he ramah hian nung takin kalpui rengin a awm ṭhin.

            Zawlnei Isaia, Jeremia leh Amosa hun lai khan Israel ram chu a lo hnianghnar chhovin, a chhehvel ram aṭanga ṭanpuina lo luanglut thlahlel reng renga hun an lo hmang ṭhin ang bawkin, he Hindu lal ramah hian vai hnen aṭanga ṭanpuina lo thleng tur thlir reng rengin hun kan chhiar liam rei tawh a. Amosa’n duhthawh taka, “Nangni thil thlâwn chunga lawma, ‘Keimahni chaknain a ni lawm ni kîte kan lak?’ titute u” tia Israel mipuite leh rorêltute a demna kha, keini pawh Pathianin min demna a ni loh ring bik suh! Hei leh chen min hruaia, a mite kaltlanga Lalpa thilmak tihte leh Harhna lo thleng ṭhinte chuan, kan ram hruaitute a au harh zo bik lo a nih hi.

            Nehemia’n thupha a chawi ṭuma, ‘Nimahsela…chapo takin thil an ti a, an intiluhlul a, i thupêkte an pawm lo a. An awih duh lo a, an zinga i thilmâk tihte pawh chu an hre duh tawh hek lo’ a tih zawng zawng hi kan rama ram hmangaih intite zia hlir zia hlir a nih tak hi. Hindu lal hnuaia kun chu chhuanlama hmang chungin, Lalpa thupêk zawm aiin an thlanga, ‘An helin an bawih nihna lama let leh turin hotu an ruat ta zawk a!’ tiin, India ram hruaitute hmaa bawkkhup chunga thil dil chu, Lalpa hmaa thinlung thlera bawhkhup aiin, kum hei leh chen an lo thlang tawh ṭhin a nih hi. Chuvang chuan a ni, Chakma nula tlangval pawh thiamna lamah kan ṭhalai rualin an tluk tak loh fo ni!

            Dueteronomy chuan, “Ram dang mi in zinga awmte chuan an sân khalh telh telh ang che u a, nangni chu in hnuai telh telh ang!” tia kan chung thu rel fel a nihna chu min hrilh ta a nih hi. Kan ram hruai tawhtu leh hruai mek tawhtute hian, khawvel ngaihah leh kohhrante mithmuhah chuan thil ṭha tam tak an tiin, an ti mek a. Mahse, II Chronicles kan en chuan, anmahni ang bawka thil ṭha ti ve ṭhin Juda lal Amazia nen khan danglamna reng reng an awm lo! “Lalpa mit hmuhin thil ṭha a ti a, amaherawhchu, a rilru a pe famkim lo!” tiin, thil ṭha ti an intih reng reng hian, mipui aiin anmahni zawkin a hlawkna an tel tam ziah ṭhin a nih kumkhua hi!

            Chuvangin Jeremia kaltangin, “Lalpa i Pathian chunga i helna te, thingbuk hnuaia awze mite hnena i inphalraina te, ka ṭawngka chhuak i awih lohnatea i khawlohnaah chuan thupha chawi rawh!” tiin kan rama rorêltute hnenah Pathianin thu a sawi phah ta a nih hi. Israel ram chhiatzia an hmuha, “Hawh u, sawi chhiat kan nih tawh loh nân, Jerusalem kulh chu i din leh ang u” titu kha Nehemia, Israelte hruaitu a nih kha! Ram leh hnam damna hi kohhran leh a rawngbawltute kutah chauh a awm emaw ti ram hruaitute an tam ta. Chutiang bawkin berampute leh puithiamte zingah pawh, mipui simna ringawt ngaihtuaha, mahni inhmu thei reng reng lo an kàt nùk bawk.

            Zoram mipui zawng zawng, kohhran leh a hruaitute, ram rorêltute leh rêl ve lote thlengin kan hmabak kan tih tur chu hei hi a ni. Zawlnei Joel-a chuan, “Chaw nghei hun serh thianghlim ula, inkhawmpui urhsûn tak ko rawh u…” tiin mipuiin bul kan ṭan a ngai a. “Puithiam, Lalpa rawngbawltute chu hulhliap leh maicham inkârah chuan ţap sela, ‘Aw Pathian, i mite zuah la…’ ti rawh se” tiin mipuite tân leh ram tâna thupha chawina chu a berampute leh a puithiamte kuta innghat a ni. Ram rorêltute hnenah pawh Exodus chuan, “Lalpa in Pathian rawng chu in bawl tur a ni. Tichuan, i chhang leh i tui chu mal a sawm anga, in zing ata hrî hi ka tikiang daih dawn nia” a lo ti ta a nih hi. Jeremia Pathian, “Aw Lalpa, ka chakna leh ka kulhpui, Mangan nia ka inhumhimna!” a tih Pathian hnenah hian i kun mawlh ang khai.