𝐓𝐮𝐧 𝐡𝐮𝐧𝐚 𝐙𝐨𝐟𝐚𝐭𝐞 𝐭𝐡𝐥𝐚𝐫𝐚𝐮 𝐝𝐢𝐧𝐡𝐦𝐮𝐧, 𝐢𝐧𝐚𝐧𝐠 𝐥𝐨 𝐭𝐚𝐤 𝐜𝐡𝐮 !

        Paula lehkhathawn hnuhnung ber, Timothea hnena a lehkhathawnah khân, “Thu chu hril rawh, a hun lovahte pawh hril rawh” tiin Paula ţhahnemngaihna luangliam kan hmu a. Hetia inkharkhipna khawvela kan chen mek lai te, kan ramri a chiri nuaih lai te, thihnain Zoram a tuam chhuah mêk lai te hian, thlarau khawvel rawn inlâr mêk hmu thiam lo hi a tam zawk kan ni awm e. 

Inkharkhip ţan tirh ata tun thleng hian, Thlarau Thianghlimin a chenchilh ringtute chu, mawngvawmba ang maiin tihtur tih sen lohin a hmuak reng a. Thlarau Thianghlim chenchilh loh ringtu, kohhran leh prawkrem pathiantute erawh awmhmunah an ro ngawih ngawih thung. Chu chu engtin nge kan hriat theih kan tih chuan, an rah aţangin hai rual a awm lova nih hi. 

Zawlnei Joela kal tlanga hun hnuhnung chhinchhiahna; ţhalaite zinga harhna thleng tur leh inlârna leh mumang kal tlanga hriattirna lo thleng turte chu, hai rual lohin kan ramah pawh hmuh theihin a lo thleng ta mêk a nih hi. Nikum inkharkhip ţan tirh ata tun thlenga chawl miah lova rawngbawlna kalpuitu, kan ramah mi an lo chhuak mawlh mawlh reng a. 

Media hrang hrang kal tlangin heng rawngbawlnate hi nitin, Pathiana tuihalna nei ringtute leh siam thara awm mêk ringtute chuan, kham tik ni reng nei lovin an chhim mawlh mawlh a nih hi. Chutih mêk lai chuan, mak takin kohhran leh prawkrem khalh kal ringtute erawh, han dâk thar hluaina tawng lem si lovin, awmhmunah an nun a ro tial tial lawi si. 

Kohhran pawh bel tak tak ngai lem lo ringtu inti ve lawi site phei chuan, Pathian leh a hunbi ngaihtuahna leh ngaihvenna them pawh an nei lo emaw tih mai turin, khawvela thil thleng mêkte leh anmahni mimal nunah an buai ve êm êm bawk a nih hi. “Keimah leh Pathian inkâr a fel chuan ka duh tâwk” tia ngaih tihţhat tuma mahni inhnêmtute, mahnia Pathian pâwl a tâwk mai alawm tih nun neitute pawh an rawn inlâr ţiam ţiam bawk.

Mahse, an nun han bihchiang tak tak ila, thlaraua tuihna an pai lohzia leh, an nunah ei tur a awm lohzia, Thlarau Thianghlimin a kän ngai lohzia hre chiang bertute chu, anmahni vek hi an ni lawi si. Chuti chung chuan, inchiah hnâwn tumna emaw, chutiang hmun zawn tumna erawh an nei hauh si lo. Hun hnuhnung chhinchhiahna neitu (Pathian neitu ni si lo) mi chi hrang hrangte lah, phung velh ang maiin kan ramah an rawn pung tial tial bawk. 

Tun huna Thlarau Thianghlim chenchilh ringtute chuan, thlarau chaw an pe chhuak mawlh mawlh reng a. Thlarau Thianghlim chenchilh ringtute chuan, thlarau chaw lakna hmuna chamna tur zawngin ţhahnem an ngai êm êm a nih hi. Chutih laiin Pathian thu sawihona lama tui êm êm, thu fing leh ril tak tak hmanga inawmtlei ţhin, mahse thlarau chaw leh ei tur pe chhuak ngai chuang si lova Pathian ngaihventute pawh kan ramah an tam hle bawk.

“Pathian ngaihsak anna an nei ang a, nimahsela a thiltihtheihna chu an awih lo ang, chuvangin hawisan rawh” tia Paula’n hun hnuhnung mi leh sa a tihte kha, heng mite hi an ni. Pathian thu sawi leh chhui an peih êm êm a. Mahse, tun hunah thilmak (miracle) leh tihdamna leh chhinchhiahna thleng mêkte erawh, baibul aţanga chhui siin an awih chuang der lo! Pathian thu hi zawng, a lo rintlak chiang a nih hi.

Group lama Pathian thu post reng peih, sawiho reng thei, mahse Thlarau Thianghlim chenchilh si loh kan ramah ringtu an tam hi buaithlak tak a ni! Kan hma lâwkah hian, TLUKSANNA, Lal Isua ngeiin a sawi kha a lo la thleng dâwn zui lehnghal a! Ring lo mite ni lovin, ringtu intite ngei zingah a ni, he tluksanna hi a lo thlen dâwn ni. Hengte hi tun huna Zofate thlarau dinhmun inang lo tak takte chu an ni ta a ni. 

Tun hi fin hun a ni a, finna tlachham tân a neitu Pathian hnena dil hun chu a lo ni ta. Thawnthu lama beng za tlat a tam zawk kan nite hi a mak lo, baibul-in a lo sawi lâwk diam tawh zawk a ni si a. Thlarau Thianghlim chenchilh loh, nula thianghlim khawnvartui nei lo ang an tam hle pawh hi, hrilh lâwkna tihfamkimna a lo ni zawk e. Chuvangin, heng thute hian lo intiharh la. I awmna tur thlang thiam ang che.