𝗭𝗮𝘄𝗹𝗻𝗲𝗶 𝗙𝗿𝗲𝗱𝗲𝗿𝗶𝗰𝗸-𝗮 𝗹𝗲𝗵 𝗮 𝘁𝗵𝘂𝗽𝘂𝗮𝗻 𝗹𝗼 𝘁𝗵𝗹𝗲𝗻 𝗱𝗶𝗸 𝗺𝗲̂𝗸 𝗱𝗮𝗻 𝗺𝗮𝗸 𝘁𝗮𝗸 𝗵𝗶 !

Kan thupui ringawt pawh hi lo helh tâwk a, mit kham chunga beng thlep nghal êm êm kan awm ngei ang. Amah Frederick-a tak pawh hian, zawlnei a nih loh thu leh Evangelist a nih thu a sawi uar hle. Mahse, baibul ngeiin thlarau thilpêk zinga a sawi, thu hril (prophesy – thu puan theihna tia lehlin zawk tur) a dawn miau avang leh, chu thilpêk a dawn chu a taka a lo hman tawhzia kan hmuha kan hriat miau avangin, zawlnei hming ka han pe lâwk a ni e. 

Tun hunah hian eng nge thleng mêk i hria em? Bethel Ministry te, Dr Dennis-a kal tlangin Glory Mizo Channel te, Zohnahthlak Kristian Network te, Mawitei te, One Vision Gospel te, Evan Zothansânga leh midang dang kal tlangin, ţhalai rual tam takte’n Pathian lam an hawi ţhuap a. Chu chu thil thleng palh satliah mai a nih lohzia leh, Pathian thu ang zel zawka thil lo thleng a nih vang leh, Frederick-a ngei pawhin a lo puan tawh a nih thu kan sawi dâwn a ni.

Kan Pathian thu chuan, “Chung niahte chuan ramah ţam ka tir ang a, chaw châka ţamna emaw, tui châka tuihalna emaw ni lovin, Lalpa thu hriat châka tuihal/ţamnana (KJV) ka tir ang” tia Amosa’n hun hnuhnunga thil thleng tur a sawi lâwk ang ngei leh, Johana’n (16:13-15) tun lai inhnialna thu lian tak, zawlnei an awm tawh lo em ni tih chhanna, “…thu a dawn apiang chu a hril zawk ang, thil lo thleng turte pawh a hriattir ang” a lo tih ang ngeiin!

A nih leh eng nge Frederick-a chuan a lo sawi reng? Kum naupang tê a la nih laiin, kan rama harhna lo thleng tur, a bik takin ţhalai rual zinga harhna lo thleng tur Pathianin a hmuhtir a. A hmuhtir satliah mai ni lovin amah ngei pawh tel ve (participate) tur a nihzia a sawi lâwk chu, tunah hian a lo thleng dik ta mêk a nih hi. Ţhalai zinga harhna a lo thlen theihna tura hmanraw pawimawh berte zinga mi ni tur hian, Frederick-a leh kan rawngbawltute hian hian kum tam tak tuaihriamna an lo paltlang zet a.

Chu chu hre lovin kum hnih khat lek Pathian zui hnua, rawngbawltu hlawhtling nih tum ta mai, kan ramah hian ringtu kan tam êm êm a nih hi. Mahse, Pathian mi hmante reng reng hi han en ta la, kum tam tak tuaihriamna paltlang zette chauh lo chu, Pathian mi hman tak tak an ni ngai lo tih hi i hre thar mawlh ang u. Tichuan, kan rama ţhalai rualte chu inkharkhip kan nih hnu aţang chiah khân, zawi zawiin kan rama harhna lo thlentirtu ni turin buatsaihin an awm ta tlat mai a.

Inkharkhip vanga kohhran a chet hleih theih miah loh lai pawhin, kan ram chanchina Ministry hrang hrangte rawngbawlna puah darh nasat ber hun a rawn thleng ta phut mai a ni! Heng Ministry-te lah hi han en ta ila, an puipate hi ţhalai rual hlir, mawlmang taka Pathiana innghat bur leh, Pathian thuin chutianga in awm chuan chutiang chuan ka ti ang tih ring burtu, Pathian tâna â ngam ţhiau an ni ta bawk! Pathian rin kawngah tun hma lama mite khûm ngam khawpa mahni inthunun ngam ţhiau an ni hawt e.

Heng ţhalai rual harh thar mekte hian, an ringtu nun kal zel tura tisa leh thlarau lama an mamawh leh châk tinreng, anmahni leh anmahni kal tlanga midangin harhna an chan theihna tura kawng dik an zawh theihna tur leh, Thlarau Thianghlim thuamna an chan theihna tura an mamawh tinreng an hmuh theihna tur leh, thlarau chaw pe chhuak theitu ni tura finna leh hriatna tinrenga thuama an awm theihna turin, tunah hian tuaihriamna (spiritual training) chhum lo chat lovin an la ta mup mup mai a nih hi!

Mahse, kan rama mi tam zawk erawh chuan thil thleng mêk ka sawi hi hriat chu sawi loh, chhe tê pawhin an ngaihven lo thung. Mahse, tun huna Pathianin a rawngbawltute kal tlanga a chher mêkte erawh, mi tlem tê ni mah se ringtu satliah leh tun hma lama inkhawm ţhin satliah ang an ni hauh lo. Thinlung leh tihtak zeta Pathian zawngtu leh autu, Pathian thu hriat châka tuihal huam huamte an ni ta tlat thung!

Khawvel pal darh tur leh al chhuak tura zirtir 12 chauh an tâwk ang khân, kan rama harhna thlentir tur hi mi tam tak mamawh an ni lem lo tih chiang taka kan hriat a pawimawh hle. Van thiltihtheihna pawt thla tur leh, Thlarau Thianghlim hnathawh thlentir tur hian, Pathianin a mamawh chu mi tak tak an ni mai zawk a. Welsh, French leh Philadelphia kawtthlera harhna thlentir turte khân, mi tam mamawh an ni lo! 

A nih leh heng ţhalai rualte hian eng tuaihriamna chiah nge an neih mek? Engtin nge Thlarau Thianghlim leh a thilpêk dawn dan tur, engtia ţawngţai tur nge, Pathian mi hman ni turin tisa leh thlarauah eng nge mamawh ka neih, thiltihtheihnaa thuam ni turin eng nge ka mamawh, mite harsatna haihawng tur leh ţanpuina kut thawh theih dan, hriatna leh finnaa thuam nih theih dan, etc zawng zawngte chu, a taka tawnhriat nei tawh heng rawngbawltute kal tlang hian an zir ta tluk tluk mai a lo ni.

Heng zirtirna pe thei tura kan rawngbawltute Pathianin a lo tuaihriamna kawng thui tak chanchinte hi, ngaihnawm tham a tling takzet a. Kan rama thu hriltu tam zawkin an dai phâk loh thlarau ram chan, baibul meuhin a sawi ringtute chan, mahse keini’n kan chan phâk loh nia kan ngaih leh chan châkna pawh kan neih meuh loh Thlarau Thianghlima thuamna leh thiltihtheihna nena rawngbawlna, Paula leh mi huai kaltate’n an lo chan ang chang zeta, tun huna Pathian kut ke an lo nih tak dan zawng zawngte hi, Pathian thu ang zel a lo ni ta mêk a lo ni e.

A tawp berah chuan he thu hi i lo chhiar mial a nih chuan, Pathian lam hawi tur leh, tun huna kan ram tuam mektu heng Ministry rawngbawlna hrang hrangte hi, ral thlirtu mai ni lova a taka chhimtu leh inhnimphumtu nih tum ve turin, engkim theihnghilhin Pathian hnaih rawh. Ring lotu leh nuihsantute lo chhuah hun a ni tawh si a. Hun hnuhnung sawia hun hlauhawm leh râpthlâk, manganna namênlo lo thleng tur kan sawi vul chúk lai hian, hun hnuhnung lawmawm êm êmna thurûk, ringtute he leia kan pâr vul hun tur, Pentecost nun kan chan hun tur leh chhanhim kan nih hun tur a lo ni reng zawk si a. Chung lam thlamuanna, leiin a pêk theih loh nun nena kan lên hun tur zawk chu!